II Xwmtxheej 36:1-4
Nqe cim:
“Nimno twb muab rab taus tso rau ntawm lub hauvpaus ntoo lawm, twb yuav ntov tus ntoo; txhua tsob ntoo uas tsis txi cov txiv zoo, luag yuav muab ntov thiab muab pov rau hauv cub hluavtaws” (Lukas 3:9)
Lus nug xav:
– Cov pejxeem tsa leejtwg los ua vajntxwv hloov Vajntxwv Yauxiyas chaw?
– Yam dabtsi ua rau tus vajntxwv no raug tshem tawm?
– Zaj kawm ceebtoom peb txog yam dabtsi?
Tom qab Yauxiyas, uas yog tus vajntxwv zoo kawg ntawm tebchaws Yudas tuag tom tshav rog hauv Vajntxwv Nekaus uas kav tebchaws Iziv txhais tes, cov pejxeem tsa tub Vajntxwv Yehau-ahas, uas yog Vajntxwv Yauxiyas tus tub, los ua vajntxwv hloov chaw hauv Yeluxalees. Vajntxwv Yauxiyas muaj plaub tug tub, thiab tub Vajntxwv Yehau-ahas yog tus tub thib plaub, uas tseem hu ua Salus (I Xwmtxheej 3:15 HMOWSV). Nov yog tus vajntxwv kawg ntawm tebchaws Yudas uas cov pejxeem tsa los ua vajntxwv. Tsimnyog nrhiav Vajtswv lub siab nyiam thiab xaiv ib tug neeg hwm Vajtswv los ua vajntxwv, cov pejxeem ho ua raws li lawv siab nyiam thiab xaiv tub Vajntxwv Yehau-ahas.
Vajntxwv Yehau-ahas muaj hnub nyoog nees nkaum peb xyoos thaum nws los ua vajntxwv. Phau Xwmtxheej sau luv luv txog tus vajntxwv no hauv plaub nqe xwb, tiamsis los ntawm phau Vajntxwv sau tseg: “Yehau-ahas ua txhaum rau tus TSWV, thiab nws ua phem ua qias ib yam li nws cov yawgkoob ua” (II Vajntxwv 23:32), peb paub ntxiv tias nov yog ib tug vajntxwv limhiam. Vajntxwv Yehau-ahas tsuas kav tau peb hlis xwb ces raug Vajntxwv Nekaus ntawm Iziv tshem tawm thiab tsa tub Vajntxwv Eliyakees, uas yog nws tus tijlaug los hloov chaw hauv Yeluxalees. Phau Vajntxwv qhia tias Vajntxwv Yehau-ahas raug ntes mus kaw hauv lub nroog Lilas hauv tebchaws Hamas (II Vajntxwv 23:33), tom qab ntawd raug coj mus ua qhev rau Iziv thiab tas sim neej rau qhov ntawd. Vajntxwv Yehau-ahas raug cov neeg Iziv tshem tawm vim vajntxwv tsis koom siab nrog cov neeg Iziv. Qhov tseeb, txhua yam xwm txheej rau lub tebchaws uas Vajtswv pub tshwm sim yeej nyob hauv Nws txojkev tswjhwm. Tsis tas li ntawd xwb, Vajntxwv Iziv tseem yuam tebchaws Yudas them se xya txhiab tsib puas choj nyiaj thiab xya caum tsib choj kub, tebchaws Yudas yuav tsum them cov nyiaj no rau teb chaws Iziv, qhia tau tias Yudas twb dhau los ua tebchaws qab tes ntawm tebchaws Iziv lawm.
Phau Xwmtxheej pheej hais txog tsab xov: Kev txhaum uas pheej ua tsis tu ncua thiab tsis lees txim yuav coj mus rau kev puas tsuaj. Qhov kev tuag ntawm Yauxiyas, uas yog tus vajntxwv zoo kawg ntawm tebchaws Yudas, qhia txog qhov xaus ntawm lub tebchaws Yudas uas muaj kev ywjpheej. Yudas pib raug lwm haivneeg tej vajntxwv tswj kav, pib ntawm Vajntxwv Nekaus uas kav tebchaws Iziv. Cov Yudas tej vajntxwv thiab cov pejxeem tau ib lub sijhawm ntev heev tsis ua raws li Vajtswv Txojlus, tsis hwm hnub Xanpataus, thiab ua txhaum teev mlom, yog li ntawd tam sim no twb txog lub sijhawm lawv yuav tsum tau txais thawj rab taus txiav txim txij thaum tus vajntxwv hwm Vajtswv yog Yauxiyas tas sim neej. Rab taus no ua lub cim qhia tias lawv yuav raug ntov ti nkaus hauv paus, txhais tau tias Yudas yuav raug puastsuaj huv tibsi thiab cov pejxeem yuav raug ntes mus rau Npanpiloos xyoo 586 U.Y. Zaj kawm ceebtoom peb cia li lees txim sai sai thaum paub tias yus ua txhaum. Vajtswv uas muaj lub siab hlub yuav zam txim thaum peb lees txim, tiamsis Nws yuav txiav txim yog peb pheej tawv ncauj tsis mloog lus.
Thov Vajtswv,
Tus Tswv, ua Koj tsaug txog zaj kawm hnub no. Yog muaj yam dabtsi tsis haum Koj siab hauv nyuam yaus lub neej, thov Koj qhia, qhuab ntuas, zam txim thiab pab nyuam yaus lees txim, tso tseg, kom tsis txhob raug lwm rab taus txiav txim ntxiv. Nyuam yaus tuav Yexus Khetos lub npe thov, Amees.
Puas muaj yam dabtsi hauv peb lub neej ua rau peb twb tau txais lossis yuav tau txais thawj rab taus ntawm tus Tswv?
Nyeem Vajluskub hauv peb lub xyoos: Yau-ees 2
Kênh Youtube BHKTHN:
