II Hơ’mon 36:1-4
“’Bok Kei-Dei sek tơlang kon bơngai, Sư pơlong lăng thoi âu: Sung Sư, Sư ‘măn hiă rim kơ tơnơm ‘long boih. Dah ‘long ayơ ưh kơ đei plei ‘lơ̆ng lei ‘Bok Kei-Dei gô kăl tŭk ‘long noh klơ̆m tơ ŭnh.”
(Luka 3:9)
Nơ̆r jet tơchĕng pơwao:
– Kon pơlei pôk bu pơm pơtao tơplih kơ pơtao Jôsia?
– Đơ̆ng lu tơdrong kiơ pơm kơ pơtao jing jur lê̆ tơdrong jang?
– ‘Bai pơhrăm ‘nâu tơ’blŏk kơ lu bơ̆n tơdrong kiơ?
Đơ̆ng rŏng kơ pơtao Jôsia, minh ‘nu pơtao pơm tơdrong ‘lơ̆ng tuch luch lăm dêh Juđa lôch lăm tơpang ti pơtao Nêkô pơlei Êyiptơ na kon pơlei pôk Jêhôahas pơm pơtao, kon drŏnglo pơtao Jôsia, pơm pơtao lăm pơlei Jêrusalem. Pơtao Jôsia, đei puăn ‘nu kon drŏnglo, Jêhôahas kon mă puăn, đe krao sư anăn Salum (I Hơ’mon 3:15). ‘Nâu bơih pơtao tuch luch lăm dêh Juđê đơ̆ng kon pơlei pôk pơm pơtao. Tơplih kơ nơ̆r krao apinh Kră Yang păng rơih minh ‘nu bơngai hli yom kơ Kră Yang na tŏk pơm pơtao na kon pơlei kiơ̆ kơdih wă na rơih iŏk Jêhôahas pơm pơtao.
Pơtao Jôsia đei ‘bar jĭt pêng sơnăm kơplah sư tŏk pơm pơtao. Hla bơar Hơ’mon đei chih kơđeh dêh gah pơtao ‘nâu lăp puăn trong đĕch, mălei yua đơ̆ng Sơ̆p hla bơar Pơtao tơbăt: “Sư pơm tơdrong kơnê̆ ‘bơ̆t anăp Kră Yang Yêhôwa, pơm lei-lăi tôm tơdrong thoi đêl lu ‘bok sư pơm bơih sơ̆.” (II Pơtao 23:32), lu bơ̆n băt thim ‘nâu bơih jơ̆ minh ‘nu pơtao pơm kơnê̆. Pơtao Jêhôahas pơgơ̆r ‘nao lăp pêng khei đĕch na pơtao Nêkô dêh Êyiptơ tơ jur lê̆ đơ̆ng pơm pơtao păng pôk Êliakim pơm pơtao, ‘nhŏng pơtao pơm pơtao tơ pơlei Jêrusalem. Sơ̆p Hla bơar Pơtao tơbăt pơtao Jôsia đe chông sư tơ Ripla (II Pơtao 23:33), đe rôp sư, đơ̆ng noh đe rôp tah sư pơm đĭch đe Êyiptơ păng lôch hloi tơ noh. Pơtao Jôsia đơ̆ng Êyiptơ tơ jur đêl pơm pơtao yua kơ pơtao ưh kơ wă tơgŭm bơngai Êyiptơ. Tơpă, dôm tơdrong đei truh ‘Bok Kei-Dei âu oei lăm tơpang ti Kră Yang pơgơ̆r. ‘Nguaih kơ đe tơ jur đêl pơm pơtao. Pơtao Êyiptơ phak dêh Juđa ra pêng tân puăn hrĕng ky̆ jên hu păng pêng jĭt puăn ky̆ maih, Juđa athei ra jên phak noh kơ Êyiptơ, noh wă tơ’bôh Juđa jing đĭch kơ dêh Êyiptơ.
Hla bơar Hơ’mon ‘nâu đei chih roi tơdrong: Pơm yoch pơlơ̆k pơle păng ưh kơ wă tơbral gô đei tơdrong răm truh. Pơtao Jôsia lôch, minh ‘ nu pơtao tuch luch pơm ‘lơ̆ng lăm dêh Juđa, đei roi tơbăt lê̆ tơdrong tôch lăm dêh Juđa mă đêl rơngei. Lu dêh tơmoi tơblah dêh Juđa, pơtơm đơ̆ng pơtao Nêkô dêh Êyitơ. Lu pơtao đe Juđa păng kon pơlei ưh kơ chu kiơ̆ nơ̆r Kră Yang lăm đunh sơnăm, ưh kơ bơwei ‘năr Sa’bat, păng kơkuh kơ rup yang, thoi noh na jơ ‘nâu trŏ jơ lu sư pŭ iŏk tơdrong phak blŭng a iŏk đơ̆ng kơplah pơtao hli yom kơ Kră Yang noh Jôsia lôch bơih. Sung ‘nâu wă tơbăt lê̆ wă kăl tŭk đơ̆ng tơm sư, wă khan tơbăt lê̆ dêh Juđa gô răm tơpă păng kon pơlei gô pơm đĭch lăm dêh Babilôn lăm sơnăm 586 AK. ‘Bai pơhrăm ‘nâu tơ’blŏk kơ bơ̆n wă kơ bơ̆n tơbral hloi kơplah băt mơn kơ bơ̆n pơm yoch. Kră Yang iơ̆m dim gô mơnat kơplah bơ̆n tơbral, mălei Kră Yang gô phak dah bơ̆n oei arăng kơ̆l ưh kơ wă tơbral.
Ơ Kră Yang, inh bơnê kơ Ih lăm ‘bai pơhrăm năr ‘nâu, dah đei tơdrong kiơ pơm kơ Ih ưh kơ lăp đon lăm chăl arih inh, apinh Ih tơbăt ăn, chrih, pơmat păng tơgŭm inh tơbral, achăng, wă huay pă pŭ iŏk tơdrong phak. Krao khan yua anăn Kră Yang Yêsu Krist, Amen.
Đei tơdrong kiơ lăm chăl arih bơ̆n pơm kơ bơ̆n đêl pơm yoch păng gô pŭ iŏk tơdrong phak đơ̆ng Kră Yang?
Đŏk Sơ̆p Hla bơar ‘Bok Kei-Dei lăm pêng sơnăm: Jôel 2
Kênh Youtube BHKTHN:
