Klei Aê Diê Blŭ: I Y-Pêtrôs 3:13-17
Êlan kliăng: “Ƀiădah hlăm ai tiê diih brei diih mpŭ kơ Krist jing Khua Yang” (I Y-Pêtrôs 3:15a)
Klei êmuh ksiêm mĭn: Si pô mpŭ kơ Khua Yang jing Pô Doh Jăk srăng ngă? Ya ngă? Hlăm ya knuih hdĭp klei hdĭp mpŭ kơ Khua Yang jing Pô Doh Jăk brei bi êdah? Si drei srăng mpŭ kơ Khua Yang jing doh jăk?
Hlue si klei khăng mâo, tơdah drei hur har ngă bruă jăk snăn amâo mâo ôh hlei pô ngă kơ jhat kơ drei (êlan 13). Ƀiădah ăt mâo mơh boh klei drei hur har hdĭp kpă ênô, gĭr ngă bruă jăk, ƀiădah ăt tuôm hŏng klei arăng ngă jhat, amâo mtăp mđơr. Khădah snăn, wăt tơdah tuôm hŏng klei si klei arăng ngă jhat, klei arăng amâo mpŭ, snăn pô mpŭ kơ Khua Yang jing Pô Doh Jăk hlăm ai tiê pô ăt srăng tŭ nanao “klei knap mñai kyua klei kpă”, amâo ngêñ, amâo mâo ai tiê phĭ, ƀuah ăl ôh (êlan 14). Kyua hlei đăo kơ Khua Yang ƀiădah ăt adôk jing “phung anak điêt hlăm Krist” (I Kôrantô 3:1), ka iêô ôh Khua Yang jing Khua hlăm ai tiê pô snăn ênưih tŭ lu klei ti lăn ala anei ngă kơ drei huĭ. Ƀiădah sa čô mnuih mpŭ Khua Yang jing Pô Doh Jăk kiă kriê klei hdĭp pô snăn diñu srăng knŏng huĭ mpŭ kơ hjăn Aê Diê jing “Pô dưi bi mdjiê mngăt wăt asei mlei hlăm war pui” (Y-Mathiơ 10:28 ). Kyua anăn, ya klei huĭ hyưt ti lăn ala, wăt klei djiê ăt kăn dưi ngă kơ diñu rŭng klei mĭn tơl hdĭp mdê hŏng Klei Aê Diê Blŭ mtô ôh (êlan 14).
Knuih hdĭp mpŭ kơ Krist jing Khua jing Pô Doh Jăk brei dưi bi êdah ti krah lăn ala hlăm dua mta. Tal sa, klei blŭ brei jing doh jăk, čiăng tơdah tuôm hŏng klei arăng ngă jhat, bi kdơ̆ng hŏng klei đăo, drei srăng jhŏng, păn kjăp Klei Aê Diê Blŭ čiăng “dưi lŏ wĭt lač kơ hlei pô êmuh čiăng thâo săng kơ klei diih čang hmăng” hŏng knuih “êdu leh anăn hŏng klei mpŭ”, amâo djŏ jing klei blŭ ktang, klei amâo jăk, bi tăng mgăl hlei pô dưi. Klei sĭt kơ Klei đăo kơ Krist brei dưi hưn mdah hŏng klei jăk hŏng klei khăp leh anăn knuih thâo pap, amâo djŏ jing klei blŭ khăng leh anăn mčhur ôh (êlan 15). Tal dua, kơ bruă ngă, phung mpŭ kơ Khua Yang jing doh jăk snăn srăng hdĭp doh jăk, “brei mâo ai tiê jăk”. Brei wĭt kơ phung mưč mač, bi kdơ̆ng hŏng sa klei hdĭp arăng amâo dưi ƀuah ăl ôh. Anăn ăt jing klei mă hĕ klei arăng mưč mač, ƀuah ăl, ngă kơ diñu lŏ dlăng wĭt klei diñu blŭ jhat leh kơ drei leh anăn mâo klei hêñ (êlan 16).
Tơdah drei čuăn mpŭ kơ Khua Yang jing Pô doh jăk hlăm ai tiê snăn brei gưt kơ Khua Yang kluôm ênŭm, gĭr hlue ngă klei Khua Yang mtô, leh anăn brei doh jăk hlăm klei pô dôk dơ̆ng ƀơ̆ng huă. Brei bi êdah klei anăn hŏng hdră klă klơ̆ng leh anăn ngă nanao hlăm ƀăng kƀông mâo Khua Yang bi doh, hŏng knuih hdĭp luă gŭ, êdu êun, amâo bi kdơ̆ng, ƀuah ăl. Mbĭt anăn bi êdah sa knuih hdĭp jing doh jăk kyua anăn mơ̆ng hlăm lam ai tiê, mơ̆ng klei dôk hdĭp hŏng klei khăp, klei pap, klei gĭr, amâo brei ôh klei amâo jăk hlăm tiê gĭt gai klei blŭ leh anăn klei hdĭp drei.
Ya hdră drei srăng bi êdah knuih hdĭp mpŭ kơ Khua Yang jing Pô Doh Jăk?
Wah lač: Ơ Khua Yang Ti Dlông hĭn, kâo bi mni kơ Ih jing Pô Doh Jăk kâo. Akâo kơ Yang Mngăt Jăk đru kâo jing doh jăk grăp hruê, akâo Ih thiăm brei ai ktang leh anăn klei thâo gĭr čiăng kâo bi êdah nanao knuih hdĭp doh jăk, mơ̆ng klei blŭ truh bruă ngă, čiăng kơ pô mkăn ƀuh Khua Yang leh anăn đăo kơ Ñu. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Ôsê 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
