I Pêtrôs 3:13-17
“Mă-lei gah Yêsu Krist bơ̆n athei chu yom kơ Sư yua kơ Sư Kră Yang bơ̆n.” (I Pêtrôs 3:15a)
Nơ̆r jet tơchĕng pơwao:
– Bơngai mă pôk pơ ư ang kơ Kră Yang mă ‘Lơ̆ng Rơgoh gô arih thoi yơ? Yua kơ kiơ?
– Arih pôk pơ ư ang kơ Kră Yang ‘Lơ̆ng Rơgoh kăl kơ tơ’bôh lăm tơdrong kiơ?
– Lu bơ̆n gô pôk pơ ư ang kơ Kră Yang ‘Lơ̆ng Rơgoh thoi yơ?
Kiơ̆ kơ tơdrong juăt, tơdah bơ̆n mơnơh dêh kơ pơm tơdrong ‘lơ̆ng lei rŏ lăng ưh kơ đei bu wă pơrơ̆ng pơm kơnê̆ kơ bơ̆n (trong 13). Mă lei tơpă đei ‘bơm tơdrong âu lu bơ̆n adrin pơm ‘lơ̆ng arih wă kơ hiôk hơiă dih băl, adrin pơm ăn tơdrong ‘lơ̆ng kơ bơngai nai, mă lei đe nai pơm tơwih ăn kơ bơ̆n ưh kơ ‘lơ̆ng, ưh kơ trŏ thoi mă bơ̆n đei pơm. Mălei, mă đei tơdrong tơ’bơ̆p thoi yơ, mă khan đe pơm kơnê̆ thoi yơ, Khŭl bơngai mă pôk pơ ư ang kơ Kră Yang ‘Lơ̆ng Rơgoh kŭm krăng kơ chăng wă chu iŏk tơdrong “yua kơ pơm tơdrong ‘lơ̆ng na chu pơmat”, ưh kơ đei ơh klai, dah chrih kơ bơngai nai (trong 14). Yua kơ bơngai lui bơih ră kơ Kră Yang mă lei oei “nhen thoi kon nghe lăm Kră Yang Yêsu Krist” (I Kôrintô 3:1), ưh tam mă đĭ jơhngơ̆m sơng iŏk Kră Yang pơm pơtao pơgơ̆r lăm jơ-hngơ̆m lei gô ba ăn dôm tơdrong lăm teh đak âu pơm ăn đei tơdrong hli krê. Mă lei tơdah bơngai bu mă pôk pơ ư kơ Kră Yang ‘Lơ̆ng Rơgoh lăm jơhngơ̆m sư kơdih lei sư jơ̆ hli kơ minh ‘nu ‘Bok Kei-Dei đĕch jơ̆ “Tơ’ngla gơh phak pơrăm bơhngol păng akâu jăn lăm dơnâu ŭnh” (Mathiơ 10:28). Thoi noh tơdrong hli tơrơ lăm teh đak, dah mă tơdrong lôch ưh kơ gơh pơm kơ lu sư ngĭl ngŭl na jing arih pha ra kơ Nơ̆r Kră Yang đei bơtho ôh (trong 14).
Tơdah pôk pơ ư ‘Bok Krist pơm Yŏng Tơ’ngla păng Kră Yang ‘Lơ̆ng Rơgoh kăl kơ tơ’bôh ăn kơ teh đak âu lăm ‘bar tơdrong. Mă mônh, nơ̆r pơma bơ̆n kăl kơ ‘lơ̆ng rơgoh, tơdah tơ’bơ̆p hăm bơngai wă pơma pơpleh, pơma ayăt kơ tơdrong lui, lu bơ̆n kăl kơ pơ̆n nuih, chĕp kơjăp Nơ̆r Kră Yang wă kơ “Tơl ăn kơ dôm ‘nu lu bơngai mă apinh tơdrong chang sơmĕng bơ̆n ei” hăm jơhngơ̆m đon “iơ̆m dim păng tơdrong hli yom”, ưh kơ hăm tơdrong jô̆ jŏk, pơjah pơjăng wă kơ jei bơ̆n đĕch ôh. Tơdrong sĭt tơpăt kăl kơ tơ’bôh ăn kơ bơngai nai hăm tơdrong mă gơ̆p ‘maih mơ̆ng hăm jơhngơ̆m ‘mêm mơnat hăm tơdrong mơnat ăn kơ bơngai nai mă ưh kơ hlôh, ưh kơ trŏ hăm dôm kơnơ̆r pơ ang păng nơ̆r tơ an (trong 15). Mă ‘bar, gah tơdrong bơ̆n pơm, bơngai mă pôk pơ ư ang Kră Yang ‘Lơ̆ng Rơgoh lăm jơ-hngơ̆m kăl kơ arih ‘lơ̆ng rơgoh, “athei đei jơ-hngơ̆m ‘lơ̆ng”. Athei tơl lu bơngai mă pơjăm, lu bơngai mă ayăt hăm tơdrong arih mă ưh kơ đei bu gơh chrih. Noh jơ̆ nhen thoi hiŏng “tŭk lê̆ tơmam ayăt” đơ̆ng lu bơngai mă ling lang kơ chrih kơ bơ̆n, gô pơm ăn kơ lu sư lăng kơdih akâu dôm tơdrong mă sư đei pơma kơ bơ̆n na ba ăn tơdrong mơlâu kơ lu sư (trong 16).
Tơdah bơ̆n pôk pơ ư Kră Yang ‘Lơ̆ng Rơgoh lăm jơ-hngơ̆m bơ̆n lei athei chu yom kơ Kră Yang lăm tôm tơdrong, drơ̆ng wă pơm kiơ̆ dôm tơdrong đêl Kră Yang đei bơtho khan, păng kăl kơ arih ‘lơ̆ng rơgoh lăm dôm kơ tơdrong bơ̆n pơm. Athei pơm tơ’bôh tơdrong ‘noh mă tơpă rơ-đah hơ-đăl păng pơm ling lang đơ̆ng ‘bơ̆r pơma đơ̆ng Kră Yang pơm rơgoh ăn bơih hăm tơdrong tơjur akâu jăn kơ dih, iŏk đon ala, iơ̆m dim, ưh kơ pơjah pơjăng, dah chrih kơ bơngai nai, ưh kơ ăn tơdrong ‘bônh kơblĕk klai pơm ăn kơ tơdrong arih bơ̆n jing ưh kơ ‘lơ̆ng.
Kơkuh kơ Kră Yang tih hloh, ư ang kơ Ih bơih Tơ’ngla Lơ̆ng Rơgoh inh. Apinh Yang Bơhngol ‘Lơ̆ng tơgŭm inh ‘lơ̆ng rơgoh rim năr. Apinh thim kơ inh jơ-hngơ̆m pran păng tơdrong chu kĕ ĕnh wă kơ inh ling lang tơ’bôh ăn minh chăl arih ‘lơ̆ng rơgoh, đơ̆ng nơ̆r pơma truh kơ tơdrong pơm jang, wă kơ bơngai nai ‘bôh Kră Yang păng lui sơng iŏk Ih. Yua anăn Kră Yang Yêsu Krist, Amen.
Lu bơ̆n gô tơ’bôh tơdrong arih mă bơ̆n đei pôk pơ ư Kră Yang ‘Lơ̆ng Rơgoh hăm tơdrong kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hôsia 13
Kênh Youtube BHKTHN:
