I Petus 3:13-17
Nqe cim:
“Nej yuav tsum hwm Yexus Khetos thiab cia nws ua tus Tswv kav nej lub siab.” (I Petus 3:15a)
Lus nug xav:
– Tus neeg uas hwm Tus Tswv ua Tus Dawb Huv yuav coj li cas? Vim li cas?
– Txojkev ua neej hwm Tus Tswv ua Tus Dawb Huv yuav tsum tshwm los ntawm cov seem twg?
– Peb yuav hwm Tus Tswv ua Tus Dawb Huv li cas?
Raws li ibtxwm, yog peb siv zog ua zoo ces tsis muaj leejtwg yuav ua phem rau peb (nqe 13). Tiamsis kuj muaj tej thaum peb kub siab ua lub neej ncaj ncees, siv zog ua tej yam zoo, los tseem raug lwm tus ua phem, tsis tau kev ncajncees. Tiamsis, txawm yuav ntsib kev ua phem li cas, tsis tau kev ncajncees li cas los xij, tus neeg uas hwm Tus Tswv ua Tus Dawb Huv hauv nws lub siab yeej npaj txhij ua “lub neej zoo”, tsis chim, tsis iab siab, tsis yws lossis hais thuam (nqe 14). Rau qhov tus neeg uas twb ntseeg tus Tswv lawm tiamsis tseem yog “menyuam mos” hauv Yexus Khetos (I Kauleethaus 3:1), tsis tau caw Tswv Yexus ua Tus Tswj kav hauv nws lub siab tiag tiag ces yuav yooj yim raug ntau yam hauv ntiajteb no ua rau txhawj ntshai. Tiamsis tus neeg uas txiav txim siab hwm Tus Tswv ua Tus Dawb Huv kav nws lub neej ces lawv tsuas paub ntshai Vajtswv ib leeg, yog “tus uas muab tau… lub cev thiab nej tus ntsujplig pov rau hauv ntujtawg” (Mathais 10:28). Yog li ntawd, tej kev ntshai hauv ntiajteb, txawm yog kev tuag los tsis muaj hwj chim ua kom lawv ntxhov siab uas ua lub neej txawv rau Vajtswv Txojlus qhia (nqe 14).
Txojkev ua neej hwm Yexus Khetos ua Tus Dawb Huv yuav tsum tau qhia tshwm rau hauv ntiajteb ntawm ob seem. Yam xubthawj, hauv kev hais lus yuav tsum dawb huv, kom thaum raug iab liam, raug tawmtsam txojkev ntseeg, peb yuav tsum ua siab tawv, tuav ruaj Vajtswv Txojlus kom teb tau cov neeg nug peb hais tias “vim li cas nej muaj chaw cia siab”, tsis yog teb phem, ntxhib, chim, lossis sib cav kom yeej xwb. Qhov tseeb ntawm cov ntseeg yuav tsum tau qhia tawm kom ntxim nyiam los ntawm txojkev hlub thiab lub siab ntev, tsis yog siv tej lus khav theeb thiab lus twv (nqe 15). Yam ob, hauv kev ua haujlwm, tus neeg hwm tus Tswv ua Tus Dawb Huv yuav tsum ua lub neej dawb huv, “yuav tsum muaj lub siab mos siab muag”. Cia li teb cov neeg hais lus thuam, lus tawmtsam los ntawm lub neej tsis muaj chaw thuam. Qhov ntawd yog txojkev tshem “riam phom” ntawm cov neeg pheej thuam thiab cem peb, ua rau lawv yuav tsum tau xav txog tej yam lawv tau hais phem rau peb thiab raug txaj muag (nqe 16).
Yog peb twb txiav txim siab hwm tus Tswv ua Tus Dawb Huv hauv peb lub siab lawm, ces yuav tsum mloog tus Tswv lus txhua yam, txiav txim ua raws li tus Tswv txojkev qhia, thiab yuav tsum dawb huv hauv txhua yam kev coj noj coj ua. Cia li ua qhia tshwm qhov ntawd kom meej thiab tsis tu ncua dhau ntawm lub ncauj uas tau tus Tswv ua kom dawb huv, nrog lub siab mos siab muag, txo hwj chim, siab zoo, tsis tawmtsam, tsis thuam. Nrog rau qhov ntawd, kev qhia tshwm lub neej dawbhuv yuav tsum pib hauv lub siab tuaj, dhau ntawm txojkev coj yam ntxwv muaj kev hlub, zam txim, siab ntev, tsis pub tej kev xav phem tswj peb cov lus hais thiab peb lub neej.
Thov Vajtswv,
Tus Tswv uas muaj hwjchim, thov qhuas Koj uas yog nyuam yaus tus Tswv uas Dawbhuv. Thov Vaj Ntsujplig pab kom nyuam yaus dawb huv txhua hnub, thov ntxiv zog thiab lub siab ntev kom nyuam yaus niaj hnub ua lub neej dawb huv, txij cov lus hais mus txog rau kev ua haujlwm, kom lwm tus pom tus Tswv thiab ntseeg txais yuav Nws. Nyuam yaus tuav Yexus Khetos lub npe thov, Amees.
Peb yuav qhia tawm txojkev ua neej hwm Tus Tswv ua Tus Dawb Huv li cas?
Nyeem Vajluskub hauv peb lub xyoos: Hauxeyas 13
Kênh Youtube BHKTHN:
