Mathiơ 23:25-26
“Hum hơrao bĕ mă rơgoh! ‘Bơ̆t anăp Inh lu iĕm athei hŭt lê̆ đĭ dôm tơdrong kơnê̆. ‘Nĕ pă pơm tơdrong kơnê̆ dơ̆ng.” (Êsai 1:16)
Nơ̆r jet tơchĕng pơwao:
– Kră Yang Yêsu khan kơ lu thây bơtho đe Juđê păng bơngai Pharisi gah tơdrong kiơ?
– Kră Yang pơma yua iŏk kơchŏk păng pơnhan wă bơtho tơdrong kiơ?
– Dang ei, tơdrong arih ‘bơ̆r đak klak ŭnh ngăl đei tơ’bôh thoi yơ?
Kră Yang oei pơma dơ̆ng gah tơdrong ‘bơ̆r đak klak ŭnh lu thây bơtho đe Juđê păng bơngai Pharisi yua kơ lu sư pơgŏ bơngai nai mălei kơdih sư arih măk ai mơ̆ng kơ wă. Kră Yang pơma yua iŏk pơnhan pang kơchŏk jơ̆ tơmam mă lu bơngai Juđê juăt kơ sơng iŏk tơmoi wă bơtho khan kơ lu sư gah tơdrong ‘bơ̆r đak klak ŭnh. Bơngai Juđê gơh sơng iŏk tơmoi, lu sư ưh kơ wă sơng iŏk tơmoi mă lu sư lăng gĭt na yua tơmam kơchŏk, pơnhan ôp rơgoh gah ‘nguaih đĕch mă loi gah lăm ưh kơ rơgoh, noh jô̆ tơdrong sơng iŏk ưh kơ pơyom păng ưh kơ ‘lơ̆ng. Kră Yang pơma yua iŏk tơdrong ‘nâu wă pơdah tơdrong tơpă lu bơngai pơgơ̆r tơdrong lui, gah ‘nguaih nhen thoi ‘lơ̆ng dêh, ling lang pơm tơ’bôh đĭ jơhngơ̆m hăm Kră Yang, mălei gah lăm lu sư ‘bĕnh ‘bang kơ tơdrong kơnê̆ ‘mê̆ ‘mach păng tơdrong yoch. Lu sư lăng kăl dêh gah tơdrong kơ̆m giĕng, pơm gah ‘nguaih mălei tơdrong arih pơm kư̆ kă, ưh kơ ‘lơ̆ng rơgoh. Nơ̆r “tơtông” wă khan tơgar iŏk đĕch, nơ̆r “hloh kơ ai” wă khan ưh kơ đei tôch ding ‘bơ̆t yơ noh noh ôh, yua kơ lu sư ham, wă yua iŏk kơdih hiôk đĕch thoi noh ưh kơ lê̆ ôh dôm tơdrong kiơ wă đei lơi yua kơdih păng tơgar iŏk đơ̆ng bơngai nai. Lu bơngai pơgơ̆r tơdrong lui bơngai Juđê oei lăm tơdrong măng mu, măt tol gah bơhngol, lu sư ưh kơ băt kơdih tơdrong arih ‘bĕnh ‘bang tơdrong yoch. Kră Yang bơtho lu sư athei ôp rơgoh tơdrong yoch đơ̆ng gah lăm hơdrol hloh. Phŏ lơ wơ̆t bơ̆n hiơ̆k dêh gah tơdrong hơmet gah ‘nguaih wă kơ mă ‘lơ̆ng wă kơ đe lăng ‘bôh păng bơnê. Mălei nơ̆r ‘Bok Kei-Dei lăm I Samuel 16:7 tơ’blŏk kơ bơ̆n: “… Inh ưh kơ lăng kiơ̆ thoi kon bơngai lăng, kon bơngai lăng gah ‘nguaih, mălei Kră Yang lăng ‘bôh lăm jơhngơ̆m.” Bơ̆n gơh arih pơm gah ‘nguaih ‘bơ̆t anăp kon bơngai mălei ưh kơ gơh arih pơm gah ‘nguaih ‘bơ̆t anăp ‘Bok Kei-Dei, yua kơ Sư ‘bôh lăm jơhngơ̆m kon bơngai bơ̆n tơpă thoi yơ, rim ‘nu lu bơ̆n kăl lăng kơdih bơ̆n yua kơ kiơ bơ̆n bơ̆jang kơ Kră Yang, tơdah bơ̆n hăt dêh gah tơdrong pơm gah ‘nguaih na tŭk lê̆ tơdrong tơ’bưh hăm Kră Yang păng oei sa pơma dơnuh hăm ‘nhŏng mai oh ưh kơ ‘lơ̆ng lei bơ̆n oei arih ‘bơ̆r đak klak ŭnh. ‘Bok Pêtrôs đei bơtho lu bơngai bơ̆jang kơ Kră Yang. “Iĕm athei wei lăng lu bơngai mă ‘Bok Kei-Dei pơjao kơ iĕm mă ‘lơ̆ng, thoi tơ’ngla triu wei lăng triu sư. Iĕm jang ‘nĕ gô đe bơtho, gô đe khan, iĕm athei jang kơdih mă tơnăp kiơ̆ thoi ‘Bok Kei-Dei lăp đon, ‘nĕ kơ jang pơtrŏ wă kơ gơh sa jên đĕch ôh, athei tơgŭm lu sư mă tơpă.” (I Pêtrôs 5:2). Bơ̆n kăl kơ ‘bôh băt kơdih rơdu, bơngai yoch wă krao khan apinh Kră Yang ôp rơgoh păng tơplih jơhngơ̆m ‘nao lu bơ̆n (Êsêkiên 36:25-26). Mưh jơhngơ̆m đei Kră Yang tơplih ‘nao bơih lei bơ̆n gơh đei tơdrong ‘mêm mơnat, hiơ̆k tơtăm păng tơgŭm ‘nhŏng mai oh bơ̆n hăm tơdrong bơ̆n pơm tơpă. Dah jơhngơ̆m bơ̆n oei ‘mê̆ ‘mach lei mă đơ̆ng bơ̆n wei kơ̆m giĕng pơm gah ‘nguaih dang yơ hĭ kư̆m ưh kơ yua kiơ.
Ơ Kră Yang ‘Bok Kei-Dei, apinh pham kăp Kon Ih Kră Yang Yêsu Krist ôp rơgoh tơdrong yoch inh inh jơ ‘nâu wă kơ inh arih ưh kơ pơm gah ‘nguaih đĕch, pơang gah ‘nguaih mălei arih ‘mêm mơnat hiơ̆k tơtăm păng tơgŭm dih băl tơpă đĭ jơhngơ̆m. Yua anăn Kră Yang Yêsu Krist, Amen.
Bơ̆n đei tơ’bơ̆p Kră Yang păng chu yom Kră Yang wă kơ Sư tơplih ming ‘nao bơngai gah lăm bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hôsia 6
Kênh Youtube BHKTHN:
