Klei Aê Diê Blŭ: I Bruă Mtao 13:1-3
Êlan kliăng: “Kyuadah Yêhôwa Aê Diê diih jing sa mkăm pui dôk ƀơ̆ng, jing Aê Diê thâo trih.” (Klei Mtô Mñă Klei Bhiăn 4:24)
Klei êmuh ksiêm mĭn: Ya ngă khua pô hưn êlâo nao kơ ƀuôn Bêthel leh anăn ƀuah kơ knưl ngă yang hrô kơ ƀuah kơ mtao Y-Jêrôbôam? Ya phŭn knhal mtao ngă kơ pô hưn Klei Aê Diê Blŭ? Si knuih drei mâo hŏng Klei Aê Diê Blŭ?
Kyua čiăng bi kjăp jhưng mtao pô, mtao Y-Jêrôbôam ngă klei mluk leh ngă rup dua drei êđai êmô mah dưm ti ƀuôn Bêthel leh anăn ti ƀuôn Dan, ngă kơ phung ƀuôn sang ngă soh hŏng Aê Diê, snăn Khua Yang yua sa čô khua pô hưn êlâo mơ̆ng krĭng dhŭng nao hưn êlâo klei Khua Yang srăng bi kmhal. Tơdah khua pô hưn êlâo anei truh ti ƀuôn Bêthel ƀuah kơ knưl ngă yang hrô kơ ƀuah kơ mtao Y-Jêrôbôam, brei ƀuh Khua Yang čiăng hưn klă Ñu lui leh mtao kyuadah mtao ngă soh leh hŏng klei Khua Yang ngă leh klei bi mguôp hŏng mtao. Leh anăn klei blŭ ƀuah kơ knưl ngă yang ăt jing klei hưn klă kơ klei kkuh mpŭ mtao Y-Jêrôbôam mdưm jing klei čhŏ mrŏ amâo mâo tŭ yuôm ôh.
Klei hưn êlâo anei mâo dua kdrêč phŭn, kơ hruê êdei leh anăn kơ ară anei hin. Tĭng kơ hruê êdei, klei hưn êlâo blŭ klă mngač, srăng mâo sa čô mtao mơ̆ng găp djuê Y-Đawit anăn ñu jing Y-Jôsia srăng bi rai anôk kkuh mpŭ mtao Y-Jêrôbôam mkra mdơ̆ng leh, čiăng lač kluôm jih jang hdră bhiăn mtao mkra mdưm srăng bi rai kluôm dhuôm, kyuadah anăn jing klei kkuh mpŭ “djiê” (êlan 2). Leh anăn 300 thŭn êdei, klei hưn êlâo anei truh bi sĭt kluôm dhuôm (II Bruă Mtao 23:15-16). Si ngă khua pô hưn êlâo anei dưi hưn wăt anăn klă sĭt hlăm klei ñu blŭ hưn êlâo tơdah amâo djŏ kbiă hriê mơ̆ng klei Aê Diê bi êdah! Tĭng kơ ară anei hin, “‘Nĕ anei knưl srăng klưh, leh anăn hbâo ti dlông gơ̆ srăng hŏk kơ tač.’” (êlan 3). Tui si Klei Bhiăn, knưl ngă yang brei bi doh hŏng klei ba tuh hwiê hĕ hbâo ti anôk mkăn (Bruă Lêwi 6:10-11). Klei hbâo hŏk mơ̆ng knưl ngă yang kơ tač čiăng lač kơ knưl ngă yang anăn jing čhŏ mrŏ snăk.
Hơưi êdi tơdah mtao Y-Jêrôbôam amâo đup gưt ôh Klei Blŭ mơ̆ng Khua Yang leh anăn amâo kmhal kơ klei soh ôh, ƀiădah mklăk wĭt, mtao ăl ngêñ snăk leh anăn čiăng ngă jhat kơ pô hriê hưn Klei Blŭ mơ̆ng Khua Yang (êlan 4). Klei anei brei ƀuh: Tal sa, mtao amâo đăo ôh kơ klei hưn êlâo mơ̆ng Khua Yang. Wăt tơdah klei blŭ hưn êlâo anei hưn klă sĭt anăn pô mtao srăng bi truh klei bi kmhal, ƀiădah si mtao dưi đăo kyuadah hlăk anăn ƀuôn ala mtao tĭng dưr dôk jhŏng ktang snăk! Tal dua, kyua klei ñu ăl čôñ, tơdah ƀuh khua pô hưn êlâo anei adôk hlăk ai, kyua kơ êdei lŏ mâo sa čô khua pô hưn êlâo mduôn khua, leh anăn kyuadah pô bi sĭt klei hưn êlâo anei êdei kơnăn 300 thŭn jing sa čô mtao mơ̆ng ƀuôn ala mtao tĭng dhŭng. Phŭn knhal prŏng hĭn jing klei krưh mgao. Tơdah khua pô hưn êlâo mơ̆ng čar dhŭng truh kơ ƀuôn Bêthel čiăng bi tuôm hŏng mtao Y-Jêrôbôam, hlăk anăn mtao dôk myơr mnơ̆ng ngă yang, anei jing bruă phung khua ngă yang, leh anăn jing sa mta bruă mtao amâo dưi ngă ôh. Klei anei hưn bi sĭt klei mtao jing mgao snăk.
Hruê anei, brei drei dôk răng hŏng jih ai tiê, kyuadah ênưih snăk ngă kơ drei “êmưt hmư̆” Klei Aê Diê Blŭ ƀiădah “djăl blŭ” klei ăl čôñ, klei ngêñ klei phĭ bi kdơ̆ng hŏng Klei Aê Diê Blŭ, leh anăn tơl wăt djăl ăl hŏng Klei Ñu Blŭ. Kyuanăn brei hdơr snei, amâo dưi ôh ngă klei ăl čôñ kơ Klei Aê Diê Blŭ (Y-Yakơ 1:19-21).
Si ngă drei kăp luă gŭ mđing hmư̆ Klei Aê Diê Blŭ leh anăn gưt ngă klei Ñu čiăng mơ̆?
Wah lač: Ơ Khua Yang, brei kâo mâo klei luă gŭ leh anăn đup gưt tơdah hmư̆ klei Khua Yang mtô lač. Akâo Khua Yang brei kâo thâo kmhal kơ klei soh grăp blư̆ Klei Ih Blŭ ktrâo atăt kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 70-71
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
