2 Kevcai 32:1-20
Nqe cim:
“Tus TSWV yog lub pobzeb uas tiv thaiv nej, nws yog tus uas zoo kawg nkaus, tej uas nws ua yeej ncaj ncees;Nej tus Vajtswv yog tus ncaj thiab tseeb; nws ua qhov yog thiab qhov tseeb xwb” (2 Kevcai 32:4)
Lus nug rau sawvdaws xav:
– Zaj nkauj ntawm tus Cevlus Mauxes tseemceeb npaum li cas?
– Vajtswv kev ncajncees ua dabtsi hauv kev sib txuas coglus ntawm Vajtswv thiab haivneeg Yixalayees?
– Peb ua neej li cas thaum uas paub Vajtswv yog Tus ncajncees?
Hauv 2 Kevcai 32 yog zaj nkauj ntawm tus Cevlus Mauxes sau los qhia cov Yixalayees. Vim tseemceeb Mauxes thiaj nqua hu sawvdaws cia li ua tib zoo mloog thiab cim nco tej uas nws hais (nqe 1). Tagnrho zaj nkauj ke yog kev ntseeg, ke yog cov lus cevlus ntsig txog kev nyab xeeb, thiab nws haivneeg yuav ciaj nyob taus, zoo li tej lwg thiab dej nag cheem tsum rau tej nroj tsuag. Mauxes qhia kev ntseeg pib ntawm tus Tswv los, tus uas nws lees hais tias peb tus Vajtswv. Nws hu li ntawd vim ntawm Vajtswv thiab cov Yixalayees muaj txoj kev sib raug zoo tshwjxeeb dhau los ntawm txoj kev coglus. Raws li ntawd, lawv yog Vajtswv haivneeg (Khiavdim 19:5-6), thiab Vajtswv “ua lawv tus Vajtswv” (Khiavdim 29:45). Ntawm cov Yixalayees, tus Tswv lub npe yog Yehauvas. Lawv tes haujlwm hauv kev coglus yog “tshajtawm tus Tswv lub npe” thiab “piav txog Nws lub hwjchim uas loj kawg nkaus” (nqe 3 HNJ 2022). Tus Tswv tsimnyog tau txhawb nqa vim “Nws yog tus uas zoo kawg nkaus thiab txhua yam uas Nws ua yeej ncajncees; Nej tus Vajtswv yog tus ncajncees thiab tseeb; Nws ua qhov yog thiab qhov ncaj xwb” (nqe 4 HNJ). Vajtswv kev ncaj ncees muaj feem xyuam tseemceeb heev, ntawd yog lub plag rau kev coglus nrog Nws haivneeg.
Vajtswv kev ncajncees yog ib yam hauv Vajtswv tus yam ntxwv kev hlub thiab ncajncees (Ntawv Nkauj 89:14). Vajtswv ncajncees Nws ke yog lub pobzeb uas tiv thaiv ke yog tus nom txiav txim ncajncees, ke yog lus cogtseg, ke yog kev txiav txim. Yog Vajtswv haivneeg coj raws li kev coglus tseg ces “Tus TSWV hlub thiab tsomkwm lawv ib yam li nws txuag nws lub qhovmuag” (nqe 10). Yog tsis ua li ntawd, thaum lawv “tsis lees paub Vajtswv tus uas tsim lawv, thiab lawv tso lawv tus cawmseej uas muaj hwjchim tseg. Lawv pe mlom ua rau tus TSWV khib lawv heev, … ua rau tus TSWV npautaws rau lawv” (nqe 15-16), Nws thiaj tso nws tej tub tej ntxhais tseg (nqe 19).
Vajtswv hlub Nws thiaj xaiv cov Yixalayees ua Nws haivneeg, tiamsis Nws kuj yog Tus ncajncees. Vim li ntawd, Mauxes thiaj sau zaj nkauj no ntuas cov Yixalyees yuav tsum xaiv, ua raws kev coglus tseg tau txais koob hmoov lossis tsis ua raws kev coglus tseg txais yuav kev puastsuaj.
Hauv zaj lus qhuab qhia saum roob, Tswv Yexus qhia tus neeg txawjntse yog tus “hnov thiab ua raws” Vajtswv Txojlus qhia kom tus neeg ntawd lub tsev sab ntsujplig ruaj khov thaum muaj cua daj cua dub hauv lub neej. Tiamsis yog ruam hnov tas tsis ua raws ces raug “vau thiab puastsuaj tas huv tibsi” (Mathais 7:24-27). Vajtswv ncajncees, Nws ntxub kev txhaum thiab tsis txais yuav lub neej uas ntsejmuag ncaj siab nkhaus.
Thov Vajtswv,
Vajtswv Tus ncajncees!Thov pab nyuam yaus ua neej tsis ua ntsejmuag ncaj siab nkhaus, tiamsis coj raws li Koj tej lus qhia kom nyuam yaus tau txais Koj txoj kev tsomkwm tiv thaiv. Nyuam yaus tuav Tswv Yexus Khetos lub npe thov, Amees.
Peb hnov Vajtswv Txojlus txhua lub thiv peb puas ua raws lawm los tsis tau?
Nyeem Vajluskub hauv peb lub xyoos: Tes Haujlwm 21
Kênh Youtube BHKTHN:
