Klei Aê Diê Blŭ: Klei Mtô Mñă Klei Bhiăn 32:1-20
Êlan kliăng: “Ñu jing Boh Tâo Prŏng, bruă Ñu jing klă, kyuadah jih jang êlan Ñu jing kpă. Aê Diê Pô sĭt suôr leh anăn amâo mâo klei wê ôh, Ñu jing kpă leh anăn djŏ.” (Klei Mtô Mñă Klei Bhiăn 32:4)
Klei êmuh ksiêm mĭn: Si klei yuôm klei mmuñ khua pô hưn êlâo Y-Môis? Ya bruă mâo mơ̆ng klei Aê Diê jing kpă hlăm klei bi mguôp ti krah phung ƀuôn sang Israel leh anăn Aê Diê? Si drei dôk hdĭp tơdah thâo săng kơ Aê Diê jing Pô kpă ênô?
Klei Mtô Mñă Klei Bhiăn kdrêč 32 jing sa klei mmuñ duê khua pô hưn êlâo Y-Môis čih čiăng mtô lač kơ phung ƀuôn sang Israel. Kyua jing klei yuôm snăn ñu iêô mthưr brei jih jang mnuih mđing knga hmư̆ leh anăn djă pioh jih klei ñu blŭ (êlan 1). Kluôm jih klei mmuñ jing klei mtô lač kơ klei đăo wăt jing klei hưn êlâo djŏ kơ klei hơĭt ênang leh anăn klei djă pioh klei hdĭp djuê ana ñu, msĕ si êa nguôm, êa hjan êdu yuôm kơ ana kyâo kơ rơ̆k. Klei ñu mtô klei đăo kčưm dơ̆ng mơ̆ng Yêhôwa, Pô ñu iêô jing Aê Diê drei. Ñu iêô msĕ snăn kyuadah ti krah Aê Diê leh anăn phung ƀuôn sang Israel mâo sa klei bi mguôp mdê yuôm hŏng sa klei bi mguôp ngă leh. Hlue hŏng klei anăn, diñu jing phung ƀuôn sang dŏ Aê Diê pô (Klei Kbiă 19:5-6), leh anăn Khua Yang “jing Aê Diê diñu” (Klei Kbiă 29:45). Hŏng phung ƀuôn sang Israel, Anăn Khua Yang jing Yêhôwa. Bruă jao kơ diñu hlăm klei bi mguôp anei jing “Kyuadah kâo srăng hưn anăn Yêhôwa” leh anăn “Yap bĕ Aê Diê drei jing Pô prŏng” (êlan 3). Khua Yang năng mpŭ mni kyuadah “bruă Ñu jing klă, kyuadah jih jang êlan Ñu jing kpă. Aê Diê Pô sĭt suôr leh anăn amâo mâo klei wê ôh, Ñu jing kpă leh anăn djŏ” (êlan 4). Klei kpă ênô amâodah klei kpă Khua Yang mâo bruă yuôm prŏng snăk, anăn jing atur klei bi mguôp hŏng phung ƀuôn sang Ñu.
Klei kpă Khua Yang jing sa hlăm dua knuih Aê Diê, klei khăp leh anăn klei kpă ênô (Klei Mmuñ Hđăp 89:14). Aê Diê kpă ênô mâo bruă yuôm jing Boh Tâo Prŏng răng mgang wăt jing Khua Phat Kđi kpă; jing klei ƀuăn wăt klei phat kđi. Tơdah phung ƀuôn sang djă pioh klei bi mguôp snăn “Ñu kwang jŭm digơ̆, Ñu răng kriê kơ digơ̆, Ñu kiă kriê digơ̆ msĕ si asăr ală Ñu pô.” (êlan 10). Bi mklăk wĭt, tơdah diñu “lui wir Aê Diê Pô mjing ñu leh, leh anăn mưč kơ Boh Tâo Pô bi mtlaih ñu. Diñu mčhur brei Yêhôwa trih hŏng phung yang tue; hŏng mnơ̆ng ñu bi êmut kheh diñu bi riêl ai brei Ñu ăl. Diñu ngă yang leh kơ phung yang jhat amâo djŏ kơ Aê Diê ôh;” (êlan 15-16) snăn “Yêhôwa ƀuh klei anăn, leh anăn hngah kơ diñu êjai Ñu ngêñ, kyua klei mčhur mơ̆ng phung anak êkei mniê Ñu” (êlan 19).
Aê Diê klei khăp ruah phung Israel mjing ƀuôn sang Ñu, ƀiădah Ñu ăt jing Pô kpă ênô. Kyuanăn, Y-Môis čih klei mmuñ anei čiăng mtô mtă kơ phung ƀuôn sang Israel brei čuăn ruah, gưt ngă hlue si klei bi mguôp leh anăn srăng mă tŭ klei Khua Yang hơêč hmưi, amâodah hngah kơ klei bi mguôp anăn leh anăn wiă klei truh knap mñai.
Hlăm klei mtô ti dlông čư̆, Khua Yang Yêsu mtô mnuih thâo mĭn jing pô “hmư̆ leh anăn gưt” Klei Blŭ Khua Yang mtô, čiăng kơ sang klei hdĭp myang pô anăn dưi dôk kjăp nanao ti anăp adiê hjan, êa lip, angĭn êbŭ ktang thut ktang hlăm klei hdĭp. Ƀiădah tơdah mluk hmư̆ leh anăn amâo gưt ngă hlue ôh snăn sang anăn “êbuh, leh anăn rai jih” (Y-Mathiơ 7:24-27). Aê Diê Pô kpă ênô, Ñu bi êmut kheh kơ klei soh leh anăn Ñu amâo tŭ ôh knhuah hdĭp ai ngăm.
Drei hmư̆ Klei Aê Diê Blŭ grăp hruê kăm ƀiădah si ngă drei mđing gưt ngă hlue leh mơ̆?
Wah lač: Ơ Ama Pô Kpă ênô! Akâo Ih mñă kâo leh anăn đru kâo amâo dôk hdĭp ai ngăm ôh ƀiădah djă pioh Klei Ih Blŭ čiăng kơ kâo dưi mă tŭ klei kiă kriê leh anăn klei hơêč hmưi mơ̆ng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
https://www.youtube.com/c/bhkthn
