Klei Aê Diê Blŭ: Y-Luk 1:26-38
Êlan kliăng: “Dĭng buăl jăk truh kơ H’Mari leh anăn lač, “Kkuh kơ ih, Ơ pô Aê Diê pap. Khua Yang dôk mbĭt hŏng ih” (Y-Luk 1:28)
Klei êmuh ksiêm mĭn: Klei dĭng buăl jăk kkuh kơ H’Mari “Ơ pô Aê Diê pap” si mblang? Si H’Mari wĭt lač kơ klei Khua Yang iêô? Ya klei mñă kơ drei tơdah Aê Diê ruah leh anăn iêo?
Pô čih hră Y-Luk čih kơ klei Khua Yang Yêsu hriê ti lăn ala hŏng klei yăl dliê dĭng buăl jăk hưn klei mơak kơ Y-Sakari leh anăn H’Êlisabet jing phung khua thŭn plao anak, srăng ba tian leh anăn kkiêng sa čô anak êkei jing Y-Yôhan Pô ngă ƀaptem, pô mprăp êlan kơ Khua Yang Yêsu (Y-Luk 1:5-25). Leh anăn jing klei yăl dliê dĭng buăl jăk Ñu Gabriel hưn hŏng H’Mari jing sa čô mniê hrông “srăng ba tian leh anăn kkiêng kơ sa čô anak êkei, ih srăng bi anăn Ñu Yêsu” (êlan 31). Hlăm kdrêč čih anei, pô čih hră Y-Luk lŏ čih leh klei dĭng buăl jăk blŭ hŏng H’Mari: “Kkuh kơ ih, Ơ pô Aê Diê pap. Khua Yang dôk mbĭt hŏng ih” (êlan 28). Klei kkuh anei amâo djŏ jing kyua H’Mari mâo klei pap, bŏ hŏng klei pap ôh, ƀiădah dĭng buăl jăk hơêč hmưi kơ ñu jing mnuih mâo klei pap kyua ti krah lu phung mniê mkăn Aê Diê ruah leh ñu. Hlăm boh sĭt, ti anăp Aê Diê amâo mâo ôh sa čô mnuih ti lăn ala amâo jing mnuih soh, kyua jih jang mnuih soh leh sơăi (Rôm 3:23), kyua anăn H’Mari ăt knŏng jing sa čô mnuih soh čiăng mâo klei Aê Diê bi mtlaih. Ñu ruah leh gơ̆ kyua anăn jing klei Ñu čiăng amâo djŏ kyua ruah hlue si hnơ̆ng čuăn anak mnuih ôh.
Leh ƀuh H’Mari “rŭng răng”, dĭng buăl jăk lač: “Đăm huĭ ôh, Ơ H’Mari, kyuadah ih mâo leh klei pap ti anăp Aê Diê. Nĕ anei, ih srăng ba tian leh anăn kkiêng kơ sa čô anak êkei, ih srăng bi anăn Ñu Yêsu” (êlan 30-31). Sa blư̆ dơ̆ng, dĭng buăl jăk lŏ mñă H’Mari jing mnuih mâo klei pap ti anăp Aê Diê, leh anăn klei pap ñu mă tŭ jing mâo Aê Diê ruah leh anăn yua ñu ngă sa bruă yuôm bhăn snăk jing kkiêng kơ Khua Yang Yêsu. Aê Diê pô myang, Pô Myang Hĭn ruah leh leh anăn yua H’Mari hlue si klei Ñu čiăng ngă klei kñăm bi mtlaih anak mnuih. Klei Aê Diê ruah H’Mari kyua klei pap Aê Diê. Bi mni kơ Aê Diê, leh hmư̆ klei dĭng buăl jăk mblang klă mngač (êlan 30-37), H’Mari kui kŏ đup gưt, ñu lač: “Nĕ anei, kâo jing dĭng buăl mniê kơ Khua Yang. Brei klei anăn truh kơ kâo tui si klei ih blŭ leh” (êlan 38). H’Mari luă gŭ thâo pô knŏng jing “dĭng buăl mniê kơ Khua Yang”, ñu akâo kơ Khua Yang srăng yua ñu hlue si klei Khua Yang čiăng.
Hlăm yan bi hdơr Hruê Khua Yang Yêsu hriê ti lăn ala thŭn anei, drei lŏ bi hdơr klei Khua Yang ruah leh anăn iêô leh H’Mari čiăng hdơr snei phung đăo ăt jing phung Aê Diê ruah, iêô leh anăn tiŏ nao. Đăm hưn ktưn ôh tơdah thâo Khua Yang ruah drei. Ăt kăn drei huĭ rei leh ƀuh msĕ si Aê Diê amâo ruah ôh. Aê Diê ruah grăp čô hlue si klei hdră Ñu, leh anăn grăp čô mnuih Aê Diê ruah mă sa bruă hlue si klei Ñu čiăng. Brei drei bi mni kơ klei pap Khua Yang leh anăn luă gŭ đup gưt hlăm bruă klam Aê Diê dưm.
Drei luă gŭ đup gưt mă bruă kơ Aê Diê tơdah Ñu iêô leh anăn tiŏ nao drei mơ̆?
Wah lač: Ơ Khua Yang, kâo bi mni kơ Ih kyua kâo amâo năng ôh ƀiădah Ih mơak ruah leh anăn tiŏ kâo nao mă bruă kơ Ih. Akâo kơ Ih đru kâo thâo hdơr knga kơ Ih leh anăn luă gŭ đup gưt mă bruă hlue si anôk Aê Diê dưm kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
