Luka 1:26-38
“Linh jang ‘lơ̆ng ei truh tơ Mari khan hloi thoi âu: Kơkuh kơ ih, duch. ‘Bok Kei-Dei wă yua ih păng Sư lăp đon kơ ih boih.” (Luka 1:28)
Nơ̆r jet tơchĕng pơwao:
– Nơ̆r Linh jang ‘lơ̆ng kơkuh kơ Mari “’Bok Kei-Dei lăp đon kơ ih” wă khan kiơ?
– Duch Mari tơl tơwih nơ̆r Kră Yang thoi yơ?
– Tơdrong kiơ đei tơ’blŏk kơ lu bơ̆n kơplah Kră Yang rơih păng krao lu bơ̆n?
Luka đei chih roi tơdrong đe tơpŭ kơ Kră Yang hăm tơdrong roi hơ’mon Linh jang ‘lơ̆ng năm tơbăt kơ bre ‘bok Sachari păng yă Êlisabet bơngai hơwŏng sơnăm đĭ kră ngăl bơih, gô anăp păng tơpŭ kơ minh ‘nu kon drŏnglo ih anăn sư Yôhan ‘batem, sư gô hơmet trong kơ Kră Yang (Luka 1:5-25). Đơ̆ng noh Linh jang ‘lơ̆ng anăn sư Gabrel roi tơbăt kơ Mari “Ih gô anăp, klaih kơ noh tơpŭ kơ minh ‘nu kon drŏ-nglo. Ih anăn Sư Yêsu.” (trong 31). Lăm tơdrong chih roi hơ’mon ‘nâu, ‘bok Luka đei chih răk nơ̆r Linh jang ‘lơ̆ng khan kơ Mari: “Linh jang ‘lơ̆ng ei truh tơ Mari khan hloi thoi âu: “Kơkuh kơ ih, duch. ‘Bok Kei-Dei wă yua ih păng Sư lăp đon kơ ih boih.” (trong 28). Nơ̆r kơkuh ‘nâu ưh kơ trŏ kơ Mari pơm ‘lơ̆ng, dah mă sư trŏ kơ thoi noh ‘bĕnh tơdrong pŭn, mălei Linh jang ‘lơ̆ng sơkat kơ sư khan ‘Bok Kei-Dei lăp đon kơ sư pŭn hloh kơ lu bơngai drŏkăn nai na Kră Yang rơih iŏk sư. Tơpă sư, ‘bơ̆t anăp Kră Yang ưh kơ đei minh ‘nu bơngai bu lăm ala teh âu ưh kơ đei yoch, yua kơ đĭ đăng kon bơngai tă kơ yoch ngăl (Rôm 3:23). Thoi noh na duch Mari kư̆m dai minh ‘nu bơngai yoch kăl kơ ‘Bok Kei-Dei mơnat dŏng pơklaih. Sư rơih iŏk Mari yua kơ sư lăp đon ưh kơ trŏ kiơ̆ kon bơngai wă ôh.
Kơplah ‘bôh Mari “tơtăm hli” na Linh jang ‘lơ̆ng khan kơ sư: “Linh jang ‘lơ̆ng ei khan kơ sư dơ̆ng: “Ơ Mari, ih ‘nĕ kơ hli yua kơ ‘Bok Kei-Dei lăp đon kơ ih tơpă. Ih gô anăp, klaih kơ noh tơpŭ kơ minh ‘nu kon drŏ-nglo. Ih anăn Sư Yêsu.” (trong 30-31). Minh wơ̆t dơ̆ng, Linh jang ‘lơ̆ng tơ’blŏk ming dơ̆ng khan kơ Mari ‘Bok Kei-Dei lăp đon kơ ih, păng sư đei pŭn đơ̆ng Kră Yang rơih păng yua iŏk sư lăm tơdrong jang gĭt kăl dêh noh sư tơpŭ kơ Kră Yang Yêsu. ‘Bok Kei-Dei mơsêh, Yang tih hloh đei rơih păng yua sư kiơ̆ thoi Kră Yang wă pơm keh tơdrong dŏng pơklaih sư, tơdrong Kră Yang rơih iŏk Mari noh đơ̆ng tơdrong ‘mêm Kră Yang. Bơnê kơ Kră Yang, đơ̆ng rŏng kơ kơtơ̆ng Linh jang ‘lơ̆ng tơblang rơđah hơđăl (trong 30-37). Na Mari drap kơkuh pơm kiơ̆ na sư khan: “Inh âu jơ̆ đĭch đam Kră Yang, inh mơ̆ng kơ Sư ăn kơ inh thoi ih khan kơ inh hei.” Na linh jang ‘lơ̆ng ei wih hloi đơ̆ng sư tŏk tơ plĕnh ti.” (trong 38). Mari sư băt na Mari băt kơdih akâu sư minh ‘nu “đĭch đam Kră Yang” na sư apinh Kră Yang yua sư lăm tơdrong jang kiơ̆ thoi nơ̆r Kră Yang.
‘Blŏk hơdơ̆r kơ phĕt đe tơpŭ kơ Kră Yang sơnăm ‘nâu, lu bơ̆n pơhrăm ming dơ̆ng tơdrong Kră Yang rơih păng krao iŏk păng wơh. Lăm lu bơ̆n ‘nĕ kơ pơang kơplah Kră Yang rơih krao bơ̆n, păng kư̆m ‘nĕ kơ ơh klai mưh Kră Yang ưh kơ krao iŏk bơ̆n. Kră Yang rơih iŏk kiơ̆ kơ Sư wă. Na rim kơ bơ̆n Kră Yang rơih bơ̆jang kiơ̆ kơ Sư pơjao. Athei bơnê kơ tơdrong ‘mêm Kră Yang păng iŏk đon ala chu kiơ̆ tơdrong jang Sư dan.
Kơkuh kơ Ih Kră Yang, inh bơnê kơ Ih yua kơ inh bơngai ưh kơ rơa kiơ mălei Ih rơih iŏk păng wơh inh lăm tơdrong jang Ih. Apinh Ih tơgŭm inh băt bơnê kơ Ih păng iŏk đon ala bơ̆jang kơ Ih kiơ̆ thoi Ih đei dan. Krao khan yua anăn Kră Yang Yêsu Krist, Amen.
Lu bơ̆n hăm iŏk đon ala chu kiơ̆ Kră Yang kơplah Sư krao păng wơh bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 9
Kênh Youtube BHKTHN:
