II Timôthê 4:1-5
“Athei bơtho tơdrong Sư ling lang; mă đe mơ̆ng mă đe ưh, ih kư̆ bơtho đĕch.” (II Timôthê 4:2a)
Nơ̆r jet tơchĕng pơwao:
– Yua kơ kiơ ‘bok Pôl bơtho pơlung Timôthê bơtho tơdrong lui lăm rim tơdrong mă hiôk ‘lơ̆ng dah ưh?
– Bơ̆n pơhrăm iŏk tơdrong kiơ đơ̆ng nơ̆r bơtho pơlung ‘nâu?
‘Bok Pôl tơlĕch nơ̆r athei lăm trong 1 lăm tơdrong ‘Bok Kei-Dei pơgơ̆r păng Kră Yang Yêsu Krist gô jur tơ ala teh wă pơgơ̆r păng sek tơlang đĭ đăng bơngai mă bơngai lôch mă bơngai arih. ‘Bok Timôthê athei pơm kiơ̆ tơdrong kăl noh “bơtho tơdrong lui” wă khan bơtho nơ̆r Kră Yang, roi tơbăt tơdrong Kră Yang, đei Kră Yang bơtho tơ’bôh. Bơtho nơ̆r Kră Yang ‘noh minh tơdrong hiơ̆k pŭ iŏk gĭt kăl, gleh anat kơlih kơ thoi noh sư athei ling lang krao khan chă tơdrong bơtho tơ’bôh, tơdrong mơnat đơ̆ng Kră Yang.
‘Bok Pôl pơchŭt ‘bok Timôthê “athei bơtho tơdrong Sư ling lang mă đe mơ̆ng mă đe ưh” hăm đĭ jơhngơ̆m kĕ chơ̆n păng kơchăng pơ’lơ̆ng (trong 2). Athei yua iŏk nơ̆r Kră Yang wă “khă đe”, tơbăt tơdrong glăi, tơdrong ưh kơ ‘lơ̆ng păng tơdrong yoch, “hơmet” đơ̆ng tơdrong pơma khă pran; păng “pơlung” wă ba ăn tơdrong hiôk ‘lơ̆ng gah tơdrong ‘mêm, tơdrong mơnat. Jơhngơ̆m băt mơnat, păng tơmam ăn đĕch tơdrong dŏng pơklaih ling lang đơ̆ng lui kơ Kră Yang Yêsu chu lôch wă dŏng pơklaih. ‘Bok Timôthê athei pơm tôm tơdrong ‘nâu hăm jơhngơ̆m kĕ chơ̆n păng đei jơhngơ̆m pran bơtho. Yua kơ tơdrong gĭt kăl lăm Tơdrong ‘nao ‘lơ̆ng noh ba ăn tơdrong mơnat ăn, tơdrong arih, tơdrong hơmĕng, tơdrong pơlung, hơđơ̆ng păng chơt hiôk đơ̆ng Kră Yang Yêsu Krist.
Tơdrong tơchĕng ’bôh păng wă pơm đơ̆ng bơngai bơtho Tơdrong ‘Nao ‘Lơ̆ng noh athei tơnăp bơtho tơdrong lui mă đei tơdrong hiôk ‘lơ̆ng dah ưh. Bơngai bơtho đơ̆ng chăl ‘bok Pôl sơ̆ đei mơn tơ’bơ̆p tơdrong gleh lơ hloh kơ tơdrong hiôk ‘lơ̆ng, mălei lu sư oei adrin truh kơ tuch luch, yua kơ băt hơđăl lu sư oei jang tơdrong jang dŏng pơklaih kon bơngai klaih đơ̆ng tơdrong Kră Yang sek tơlang. Đĭ đăng lu bơngai bơtho tơdrong lui tă kơ tơ’bơ̆p tơdrong pơgăn yua kơ kon bơngai lăm teh đak chăl sơ̆ kư̆m thoi dang ei mơ̆n. “Lu sư ưh pă năm mơ̆ng tơdrong ‘Bok Kei-Dei boih, lu sư wă mơ̆ng tơdrong đe roi hơ’mon kư̆ kă, ‘noh sư năm kuăng.” (trong 4).
Tuch luch, ‘bok Pôl tơ’blŏk kơ Timôthê thoi âu: Mă khan đei lơ bơngai pơgăn “Mă-lei ih athei đei jơhngơ̆m chơ̆n lăm tôm tơdrong. Mă pơmat ih kư̆ adrin ‘nĕ hŭt tơdrong pơm đon ‘lơ̆ng tơpăt, bơtho tơdrong ‘nao ‘lơ̆ng Kră Yang Yêsu Krist ling lang, adrin jang tôm tơdrong ‘Bok Kei-Dei.” (trong 5). Tơdrong jang bơtho nơ̆r Kră Yang gô đei tơdrong gleh pơmat tơpă. Kơlih kơ thoi noh, sư kăl kơ hơmet jơhngơ̆m đon wă bơ̆jang păng keh dôm tơdrong kiơ ‘Bok Kei-Dei athei pơm. ‘Bok Timôthê athei adrin păng tơnăp lăm tơdrong jang sư.
Tơdrong jang bơtho nơ̆r Kră Yang, ră roi Tơdrong ‘Nao ‘Lơ̆ng ưh kơ sĭ ‘măn kơ ‘bok Timôthê sơ̆ đĕch ôh, na kư̆m ‘măn đĭ đăng kơ bơ̆n dang ei hai mơ̆n. Rim năr bơ̆n ‘bôh jum dăr kơ bơ̆n đei lơ bơngai “ưh pă năm mơ̆ng tơdrong ‘Bok Kei-Dei bơih” na mơ̆ng tơdrong đe roi kư̆ kă, tơdrong chơt hiôk lăm teh đak. Apinh Kră Yang ăn kơ bơ̆n huay kơ bơ̆l hăl na rai adrin bơtho Tơdrong ‘Nao ‘Lơ̆ng. Athei đĭ jơhngơ̆m apinh Yang Bơhngol ‘Lơ̆ng bơtho tơ’bôh, ăn tơdrong mơnat păng thim jơhngơ̆m pran wă tơgŭm kơ bơ̆n pơm keh tơdrong Kră Yang Yêsu.
Ơ Kră Yang, apinh Ih tơgŭm ăn kơ inh tơnăp păng adrin ră roi Tơdrong ‘Nao ‘Lơ̆ng Ih ling lang mă đe mơ̆ng mă đe ưh. Apinh Ih ăn kơ inh đei jơhngơ̆m pơ̆n nuih păng đei jơhngơ̆m chu iŏk tơdrong pơmat yua kơ tơdrong ‘Nao ‘Lơ̆ng wă ba tơdrong dŏng pơklaih kơ lơ bơngai. Krao khan yua anăn Kră Yang Yêsu Krist, Amen.
Bơ̆n hăm đĭ jơhngơ̆m krao khan, ră roi Tơdrong ‘Nao ‘Lơ̆ng lăm rim tơ’bơ̆p tơdrong hiôk ‘lơ̆ng dah ưh kơ hiôk ‘lơ̆ng?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 52
Kênh Youtube BHKTHN:
