Klei Aê Diê Blŭ: Klei Mphŭn Dơ̆ng 2:4-17
Êlan kliăng: “Khua Yang Aê Diê mmuôn sa čô êkei hŏng ƀruih lăn; Ñu ƀhur êwa klei hdĭp hlăm ƀăng adŭng gơ̆, leh anăn mnuih jing mngăt hdĭp” (Klei Mphŭn Dơ̆ng 2:7)
Klei êmuh ksiêm mĭn: Si Aê Diê hrih mjing mnuih? Ti anôk Aê Diê dưm mnuih Ñu hrih leh, leh anăn ya bruă Ñu brei gơ̆ ngă? Bruă anei bi êdah ya klei kơ hdră Aê Diê mkra leh kơ mnuih?
Klei Aê Diê hrih mjing lăn adiê leh anăn jih jang mnơ̆ng čih yăl dliê klah čŭn leh hlăm Klei Mphŭn Dơ̆ng 1:1-2:4. Čiăng kơ jih jang phung dlăng hră thâo “klei mphŭn mâo kơ klei hrih adiê leh anăn lăn ala” (êlan 4). Êdei tinăn, Y-Môis mjưh leh anăn nao êlam kơ mta yuôm hlăm bruă hrih mjing, anăn jing klei Aê Diê hrih mjing mnuih. Tơdah adiê, lăn ala leh anăn jih jang mnơ̆ng hdĭp Aê Diê hrih leh knŏng hŏng klei Ñu blŭ, snăn Ñu hrih mnuih hŏng klei “mmuôn hŏng ƀruih lăn”. Klei anăn bi êdah klei thâo răng, klei tliêr, klei thâo mĭn, klei mbruă, leh anăn wăt klei Aê Diê yap yuôm hĭn hlăm klei hrih mjing mnuih. Amâo djŏ knŏng dŭm anăn ôh, wăt Ñu ƀhur êwa klei hdĭp Ñu pô hlăm ƀăng adŭng gơ̆ čiăng kơ mnuih jing mngăt hdĭp (êlan 7). Snăn yơh, dưi lač mnuih jing dŏ kdlưn hĭn hlăm jih jang mnơ̆ng Aê Diê hrih mjing, Aê Diê hrih mnuih hŏng klei yuôm bhăn snăk čiăng dưi bi mguôp hŏng Ñu. Msĕ si pô čih Klei Mmuñ Hđăp lač leh snei: “Kâo bi mni kơ Ih kyua Ih hrih mjing kâo hŏng klei yuôm bhăn leh anăn klei bi kngăr. Bruă Ih jing yuôm bhăn, kâo thâo klei anăn sĭt nik” (Klei Mmuñ Hđăp 139:14).
Aê Diê dưm mnuih Ñu hrih leh hlăm war djam Êđen, anôk mâo djăp mta ana kyâo siam dlăng leh anăn êđăp ênang, mâo boh ƀơ̆ng jăk, djăp mta mnơ̆ng siam leh anăn yuôm. Tinăn, mnuih Aê Diê pô čiêm rông, mâo Aê Diê pô dôk mbĭt leh anăn dưi blŭ hrăm tlă anăp hŏng Aê Diê. Hlăm war djam Êđen anăn, Khua Yang Aê Diê jao kơ mnuih bruă “mkra leh anăn kiă kriê” war djam (êlan 15), wăt hŏng klei mtă dưi ƀơ̆ng hŏng klei êngiê boh jih jang ana kyâo hlăm war djam, wăt boh ana kyâo klei hdĭp, knŏng boh ana kyâo thâo kral klei jăk leh anăn klei jhat amâo dưi ƀơ̆ng ôh. Aê Diê ăt hưn êlâo mơh kơ boh jhat tơdah amâo gưt asăp ôh, “kyuadah hruê ih ƀơ̆ng boh anăn ih srăng djiê sĭt nik” (êlan 17). Aê Diê čiăng kơ mnuih hŏng klei čŏng čiăng gưt asăp kơ klei Ñu atăt gai čiăng dưi mă tŭ klei hdĭp jăk mơak leh anăn êbeh dlai Ñu mprăp leh pioh brei kơ mnuih.
Mơ̆ng klei Aê Diê mmuôn mnuih leh anăn dưm gơ̆ hlăm war djam Êđen, drei ƀuh mnuih jing yuôm bhăn snăk hlăm hdră Aê Diê hrih mjing, Aê Diê hrih mjing mnuih mâo ênoh yuôm, mâo klei kñăm čiăng leh anăn yuôm bhăn. Aê Diê čiăng mnuih kiă kriê leh anăn bi lar jih jang mnơ̆ng Ñu hrih leh. Msĕ mơh, Aê Diê mâo klei bi hriăm klă kơ mnuih leh anăn Ñu čiăng mnuih ruah klei gưt asăp kơ Ñu. Knŏng hlăk anăn yơh, drei dưi bi knal hdră Aê Diê pioh leh kơ drei jing hdră jăk mơak leh anăn klă ênŭm.
Drei dôk hdĭp djŏ hŏng hdră jăk Aê Diê pioh kơ drei mơ̆?
Wah lač: Ơ Khua Yang, kâo bi mni kơ Ih kyuadah Ih mjing leh kâo hŏng klei yuôm bhăn. Lač jăk kơ Ih brei leh kơ kâo jih jang mnơ̆ng čiăng hĭn pioh kơ kâo hdĭp leh anăn đĭ hriê kơ prŏng. Đru kâo dôk kjăp sĭt suôr hŏng Ih, leh anăn gưt asăp čiăng bi leh jih bruă Ih jao leh kơ kâo, čiăng bi lar leh anăn bi mđĭ kyar bruă Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
