Chivkeeb 2:4-17
Nqe cim:
“Tus Tswv uas yog Vajtswv muab av los puab tau ib tug txivneej, thiab tshuab siav tshuab pa rau tus txivneej ntawd lub qhovntswg, ces tus txivneej ntawd txawm ciaj sia.”(Chivkeeb 2:7)
Lus nug rau sawvdaws xav:
– Vajtswv tsim tibneeg zoo li cas?
– Vajtswv cia tibneeg ua neej nyob rau qhov chaw twg thiab ua dabtsi?
– Qhov no qhia tshwm yam dabtsi ntsig txog Vajtswv txojkev npaj rau tibneeg?
Zaj xwm uas Vajtswv tsim lub ntuj lub ntiajteb thiab txhua yam tau muab sau zog hais nyob hauv phau ntawv Chivkeeb 1:1 – 2:4. Lub homphiaj yog cia kom cov nyeem paub txog “Vajtswv tsim lub ntuj thiab lub ntiajteb” (nqe 4). Tom qab ntawd, Mauxes tsis sau ntxiv, nws sau txog qhov uas Vajtswv tsim tibneeg. Lub ntuj, lub ntiajteb thiab txhua yam Vajtswv tsim los ntawm Nws lo lus hais, tiamsis tus Tswv tsim tibneeg los ntawm qhov uas Nws “muab av los puab ua neeg”. Qhov no qhia paub Vajtswv ua tib zoo tsim, puab, saib qhov tsim neeg tseemceeb heev. Tsis yog li ntawd xwb, Vajtswv tseem tshuab siav tshuab pa rau tibneeg kom tibneeg muaj txojsia (nqe 7). Yog li, peb hais tau tias tibneeg yog qhov loj tshaj ntawm txhua yam uas Vajtswv tsim, tau Vajtswv tsim tshwjxeeb kom muaj txojkev sib txuas nrog Nws. Zoo ib yam li tus uas sau Phau Ntawv Nkauj qhia paub, “Kuv qhuas koj rau qhov koj thiaj yog tus uas tsimnyog sawvdaws hwm, tej uas koj ua mas kuv xav tsis thoob thiab tsis txawj piav tiamsis kuv paub hais tias tej ntawd yeej yog koj ua.” (Phau Ntawv Nkauj 139:14).
Vajtswv cia tibneeg nyob hauv lub vaj Edees, qhov chaw uas zoo kawg nkaus thiab kaj siab lug, muaj txhua yam txiv ntoo noj, txhua yam zoo nkauj heev thiab muaj nqis kawg. Nyob qhov chaw ntawd, tibneeg tau txais siv tej uas tus Tswv pub, ua neej nyob hauv tus Tswv thiab nrog tus tswv txuas lus ua ke. Nyob hauv lub vaj Edees no, Vajtswv muab lub luag haujlwm rau tibneeg ua yog “zov thiab tu lub vaj” (nqe 15), nrog rau lo lus samhwm tau noj txhua yam txiv ntoo hauv lub vaj, tshwj tsob txiv ntoo paub qhov phem thiab qhov zoo xwb. Vajtswv kuj ceebtoom ua ntej tias yog tsis mloog lus mus noj ces “noj hnub twg, koj yuav tuag hnub ntawd” (nqe 17). Vajtswv xav kom tibneeg txiav txim siab xaiv mloog lus ua li Nws qhia kom tau txais txojsia thiab txoj koob hmoov uas Vajtswv pub.
Dhau los ntawm qhov uas Vajtswv tsim tibneeg thiab cia tibneeg nyob hauv lub vaj Edees, peb pom tias tibneeg tshwjxeeb rau tus Tswv qhov kev tsim puab. Tibneeg tau Vajtswv tsim muaj nqis, muaj homphiaj. Vajtswv xav kom tibneeg saib thiab ua kom tej uas Nws tsim tsam ntxiv. Vajtswv kuj muaj kev taw qhia rau tibneeg thiab xav kom peb xaiv mloog Nws lus. Yog ua li ntawd peb thiaj yuav tau saj qhov kev zoo uas tus Tswv npaj rau peb lawm txaus nkaus.
Thov Vajtswv,
Vajtswv, ua Koj tsaug vim nyuam yaus xav tsis thoob txog Koj tsim nyuam yaus. Ua tsaug tus Tswv Koj pub txhua yam cheemtsum rau nyuam yaus ua neej thiaj loj hlob. Thov Koj cia nyuam yaus niaj hnub nyob hauv Koj, mloog Koj lus thiab ua tiav lub luag haujlwm Koj txib ua. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas tabtom ua neej raws li Vajtswv txojkev npaj rau peb lawm tau?
Nyeem Vajluskub hauv peb xyoo: Yelemis 31
Kênh Youtube BHKTHN:
