Klei Aê Diê Blŭ: I Y-Timôthê 1:3-7
Êlan kliăng: “Klei hmei čiăng mơ̆ng klei hmei mtă jing klei khăp kbiă mơ̆ng ai tiê êngeh, mơ̆ng ai tiê kpă jăk, leh anăn mơ̆ng klei đăo sĭt suôr. Đa đa mnuih klah đuĕ leh mơ̆ng klei anăn leh anăn mtô klei hơăi mang” (I Y-Timôthê 1:5-6)
Klei êmuh ksiêm mĭn: Ya ngă klei “mnuih klah đuĕ” lač anăn jing “klei hơăi mang”? Si ngă čiăng thâo kơ klei êmuh, bi trông hdơ̆ng pô jing tŭ dưn amâodah hơăi mang? Ya klei brei drei ngă čiăng ñĕ kơ klei bi tăng hơăi mang?
Mta phŭn mtrŭt Khua ƀĭng kna Y-Pôl mtô kơ anak hlăm klei đăo pô jing Khua Pô Mtô Y-Timôthê brei lŏ dôk ti Êphêsô jing čiăng yua klei mtô djŏ mtă mtăn kơ “mnuih klah đuĕ” (êlan 3) jing phung ksiêm hriăm mgưt dôk mtô sa klei đăo mdê. Hlăm êlan 3 leh anăn 4, Khua ƀĭng kna Y-Pôl brei drei thâo Khua Pô Mtô Y-Timôthê brei “mtă kơ đa đa mnuih” “đăm mtô mta klei đăo mdê”, “đăm mĭn ôh kơ klei yăl dliê đưm amâo sĭt leh anăn kơ klei răk anăn aê aduôn amâo thâo tuč”. Boh blŭ “klei yăl dliê đưm amâo sĭt” jing “klei amâo mâo sĭt”, “klei hơăi mang”, jing klei đăo, klei yăl dliê bi mĭn kơ phung yang phung đưm khăp snăk. Hlăm boh klei anăn, klei đăo leh anăn klei yăl dliê đưm amâo sĭt anăn khăng yua mgang kơ klei ngă amâo mâo klei đăo. “Klei răk anăn aê aduôn amâo thâo tuč” lač kơ dŭm pŏk hră čih anăn aduôn aê dlông amâo thâo tuč ôh. Anei khăng jing ya Klei Aê Diê Blŭ amâo lač ôh amâodah knŏng bâo mă đuč, kyua anăn arăng khăng bi tăng mgăl hŏng klei hơăi mang.
Mơ̆ng asăp mtrŭn Khua ƀĭng kna Y-Pôl kơ Y-Timôthê, drei hriăm kơ klei thâo kral klei bi trông čhai, bi tăng čiăng êdi mơ̆ng klei đăo, amâodah klei kƀah thâo săng djŏ klă, hŏng klei bi tăng ñu lač jing “hơăi mang”. Tal sa, dŭm klei bi tăng mgăl hơăi mang knŏng “bi truh klei bi tăng, Diñu amâo ngă ôh hdră Aê Diê, hdră anăn dưi thâo săng hŏng klei đăo” (êlan 4). Anei jing klei bi tăng kơ dŭm bruă Klei Aê Diê Blŭ amâo lač ôh, boh jhat jing ngă kơ phung bi tăng srăng lĕ hlăm klei bi tăng amâo thâo ruĕ kyua amâo mâo klei wĭt lač djŏ ôh, knhal tuč srăng ba klei bi kah mbha kyua amâo sa klei mĭn. Bi klei mtô djŏ ba “klei khăp kbiă mơ̆ng ai tiê êngeh, mơ̆ng ai tiê kpă jăk, leh anăn mơ̆ng klei đăo sĭt suôr” (êlan 5). Jing klei bi trông kơ Klei Aê Diê Blŭ čiăng thâo săng kơ klei đăo djŏ klă mphŭn mơ̆ng klei mĭn doh jăk, ai tiê kpă ênô leh anăn atăt kơ klei khăp. Klei bi tăng čiăng êdi jing bi tăng đru mguôp hlăm klei pŏk phai bruă Aê Diê leh anăn bi mđĭ klei đăo hdơ̆ng pô.
Hruê anei lu mnuih ăt ênưih lĕ hlăm klei bi tăng mgăl kơ ya Klei Aê Diê Blŭ amâo lač klă, ya klei amâo djŏ tuôm kơ klei bi mtlaih. Čiăng ñĕ kơ klei soh anăn, brei drei hriăm Klei Aê Diê Blŭ hŏng klei kpă ênô grăp hruê, akâo kơ Yang Mngăt Jăk mtrang mngač leh anăn mtô čiăng drei amâo lĕ hlăm klei bi tăng mgăl hơăi mang.
Drei kriăng hriăm Klei Aê Diê Blŭ hŏng klei klă sĭt hlăm grăp hruê mơ̆?
Wah lač: Ơ Aê Diê, akâo kơ Ih đru kâo thâo răng čiăng đăm lĕ ôh hlăm klei bi tăng hơăi mang, amâo djŏ knŏng amâo ba klei klei mđĭ klei đăo kâo ôh ƀiădah lŏ hmăi jhat kơ lu mnuih mkăn. Akâo kơ Ih đru kâo sĭt suôr hriăm Klei Aê Diê Blŭ leh anăn bi đru hdơ̆ng pô hriăm Klei Aê Diê Blŭ čiăng amâo kma êlam ôh hlăm klei bi tăng mgăl hơăi mang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
