Pơjah Kơnhăm Yua Kơ Tơdrong Kiơ? – 24/10/2025

I Timôthê 1:3-7 

“Inh athei ih khă lu sư thoi noh wă kơ lu sư đei đon ‘lơ̆ng tơpăt, hăm lui mă trŏ, thoi noh na sư gơh ‘mêm kơ ‘Bok Kei-Dei hăm bôl buăl tơ ala teh âu mơ̆n. Đei bơngai mơ’nah hŭt lê̆ tơdrong lui sư na jing pă đei đon ‘lơ̆ng tơpăt dơ̆ng, na jing hơwơ̆l kơ tơdrong ‘Bok Kei-Dei. Lu sư bơtho kư̆ kă đĕch ‘noh.” (I Timôthê 1:5-6)

Nơ̆r jet tơchĕng pơwao:

–               Yua kơ kiơ tơdrong “lu bơngai ‘noh” pơma jơ̆ lăng thoi “dôm nơ̆r pơma ưh kơ yua”?

–              Pơm thoi yơ gơh kơnăl tơdrong mơ̆ng dih băl, pơma dơnuh dih băl jơ̆ đei yua dah mă ưh kơ yua?

–               Bơ̆n kăl kơ pơm kiơ wă kơ gơh weh đơ̆ng dôm tơdrong pơjah mă ưh kơ yua?

Tơdrong mă pơtrŭt ‘bok Pôl bơtho khan kơ Timôthê dang con lăm đon lui. Athei sư oei tơ pơlei Êphêso, wă kơ sư khă lu bơngai tơ noh bơtho tơdrong ưh kơ trŏ tơdrong ‘Bok Kei-Dei tơpă (trong 3) ‘noh jơ̆ lu bơngai bơtho hơlĕnh oei bơtho tơdrong chroih tơ nai. Lăm trong 3 păng 4, ‘bok Pôl đei tơbăt ăn kơ bơ̆n băt tơdrong Timôthê kăl kơ athei “khă lu bơngai noh” jơ̆ “’nĕ  pă bơtho tơdrong ưh kơ trŏ tơdrong ‘Bok Kei-Dei” ‘Nĕ kơ mơ̆ng tơdrong roi kư̆ kă gah adrĕch adrung yă ‘bok so sơ̆. Nơ̆r “Tơdrong kư̆ kă” wă khan “Tơdrong ưh kơ tơpă” “chă hơ’mon ngôi đĕch”. Noh jơ̆ tơdrong lui, dôm tơdrong hơ’mon chă tơchĕng gah lu yang mă chăl adrol sơ̆, ‘maih mơ̆ng dêh. Lăm kơplah chăl noh, dôm tơdrong lui păng tơdrong hơ’mon noh juăt kơ yua wă pơma dŏng dôm tơdrong pơm ưh kơ trŏ, ưh kơ ‘lơ̆ng.  “Adrĕch adrung yă ‘bok so sơ̆” pơma kơ adrĕch adrung chă tơchĕng đĕch ioi ưh kơ tôch. ‘Nâu jơ̆ dôm tơdrong mă hla bơar ‘Bok Kei-Dei ưh kơ đei pơma ‘bơm dah mă chih roi tơsĕt đĕch. Thoi noh, kon bơngai bơ̆n nŏng kơ pơjah băl ưh kơ tôch tơdrong kơ đei ưh kơ yua.

Đơ̆ng tơdrong ‘bok Pôl bơtho ăn kơ Timôthê, bơ̆n pơhrăm băt kơnăl dôm tơdrong pơma, pơjah ayơ kăl tơpă lăm đon lui, dah tơdrong hlôh băt tơdrong ‘Bok Kei-Dei trŏ tơpă, hăm dôm tơdrong pơjah mă sư khan “ưh kơ yua”. Mă mônh dôm tơdrong pơjah ưh kơ yua noh “na lu sư pơjah ling lang. Lu tơdrong ‘noh ưh kơ yua wă tơgŭm bơ̆n ôh” (trong 4). ‘Nâu jơ̆ dôm tơdrong pơjah gah dôm tơdrong hla bơar ‘Bok Kei-Dei ưh kơ đei pơma ‘bơm ôh, tuch luch jơ̆ pơm kơ lu bơngai pơjah noh rai hlom lăm tơdrong pơjah ưh kơ tôch yua kơ ưh kơ đei nơ̆r tơl trŏ lăp, đơ̆ng noh jing tơklah dih băl yua kơ tơdrong pơma phara băl. Mălei, trŏ tơdrong ‘Bok Kei-Dei  topă ba truh “Tơdrong ‘mêm mơnat, yua kơ đei đon ‘lơ̆ng tơpăt, hăm đon lui trŏ” (trong 5). Dah wă khan, pơma dơnuh dih băl lăm nơ̆r ‘Bok Kei-Dei wă kơ hlôh băt dôm tơdrong lui trŏ lĕch đơ̆ng jơhngơ̆m ‘lơ̆ng rơgoh, đon ‘lơ̆ng tơpăt păng ba truh tơdrong ‘mêm mơnat, dôm tơdrong pơjah kăl tơpă jơ̆ dôm tơdrong pơjah tơgŭm lăm tơdrong pơih tơdrong jang Kră Yang păng pơdơ̆ng tơiung đon lui dih băl.

Dang ei lơ bơngai kư̆m ‘bônh kơ huŏng lăm tơdrong pơjah gah dôm tơdrong hla bơar ‘Bok Kei-Dei ưh kơ đei pơma hơđăl. Dôm tơdrong ưh kơ ‘bơm tơdrong dŏng pơklaih. Wă kơ weh đơ̆ng tơdrong glăi noh. Bơ̆n kăl kơ pơhrăm nơ̆r Kră Yang mă tơpă lăm rim năr, apinh Yang Bơhngol ‘Lơ̆ng pơchrang ăn păng bơtho tơ’bôh wă kơ bơ̆n huay kơ puh lăm dôm tơdrong pơjah mă ưh kơ yua.

Ơ Kră Yang, apinh Ih tơgŭm inh pơ’lơ̆ng wă kơ huay kơ huŏng lăm dôm tơdrong pơjah ưh kơ yua, ưh kơ sĭ ưh kơ tơgŭm đon lui inh đĕch ôh mă kư̆m pơm ưh kơ ‘lơ̆ng kơ lơ bơngai nai hai mơ̆n. Apinh Ih tơgŭm inh oei adrin pơhrăm nơ̆r Kră Yang păng tơgŭm băl pơhrăm hơdai Nơ̆r Kră Yang wă kơ huay kơ môch hlom lăm dôm tơdrong pơjah mă ưh kơ yua. Krao khan yua anăn Kră Yang Yêsu Krist, Amen.

Bơ̆n hăm pơnam pơhrăm Nơ̆r Kră Yang tơpă lăm rim năr ưh?

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 12

Kênh Youtube BHKTHN:

https://www.youtube.com/c/bhkthn