Klei Aê Diê Blŭ: Klei Bi Hriêng 25:4-5; Galati 5:19-25
Êlan kliăng: “Hlei pô jing dŏ Krist Yêsu pơ̆ng leh kđeh mbĭt hŏng klei ñu tluh leh anăn klei ñu čiăng ti kyâo bi kal. Tơdah drei dôk hdĭp kyua Yang Mngăt Jăk, brei drei dôk dơ̆ng ƀơ̆ng huă tui si Yang Mngăt Jăk mơh” (Galati 5:24-25)
Klei êmuh ksiêm mĭn: Ya jing boh tŭ kơ klei bi doh? Ya ngă brei mă hĕ phung ƀai ti anăp mtao? Hlăm klei bi doh, ya klei brei phung đăo kơ Krist mă lui hĕ?
Leh blŭ kơ klei guh kơang leh anăn klei dưi mtao (Klei Bi Hriêng 25:1-3), Mtao Salômôn blŭ djŏ kơ klei lông dlăng tơdah mtao yua klei dưi ñu hlăm bruă gĭt gai ala čar. Dua êlan klei bi hriêng anei čih tui si klei bi msĕ klei bi doh prăk hŏng klei bi doh ala čar.
Bi doh jing klei ruah bi nik, mă hĕ jih jang mnơ̆ng bi lŭk čiăng mjing prăk doh. Mtao Salômôn yua rup sa čô tia prăk, mă hĕ eh prăk čiăng mâo prăk jăk, mjing mnơ̆ng yua mâo ênoh yuôm. Msĕ si prăk dưi mjing mnơ̆ng yua jăk leh anăn yuôm snăn mơh klei doh jăk sa boh ala čar ba hriê klei kjăp kơ ala čar anăn. Tĭng kơ bruă kđi čar, klei bi doh bi êdah hlăm klei mă hĕ phung khua jhat ƀai čiăng kơ ƀuôn ala mtao mâo klei ktang, jhưng mtao dưi dôk kjăp. “Mă hĕ phung ƀai mơ̆ng anăp mtao” (êlan 5) kyuadah diñu jing phung dĭng buăl dôk giăm mtao, phung mă bruă, phung kčĕ kơ mtao, kyuanăn ƀiă lu ăt mâo klei bi hmăi mơh kơ hdră leh anăn klei mtao čuăn ngă. Tơdah diñu jing mnuih jăk, kpă ênô leh anăn thâo mĭn, klei mtao kiă kriê srăng jing, lăn čar srăng jing ktang leh anăn mdrŏng sah. Ƀiădah, tơdah phung dôk ti djiêô mtao jing phung ƀai, diñu srăng atăt mtao kơ êlan soh leh anăn ala čar ñu srăng rai.
Wăt tơdah thâo kơ klei bi doh jing jăk, ƀiădah ăt srăng tla hŏng sa ênoh mơh. Klei bi doh srăng găn klei bi lik hŏng pui, mă hĕ mnơ̆ng čhŏ, pô tŭ klei bi doh ăt srăng tŭ arăng hngah, klei luč liê, klei săn asei mơh čiăng jing sa čô doh jăk. Tĭng kơ klei hdĭp myang, klei hdĭp phung đăo kơ Krist ăt srăng tŭ klei bi doh mơh čiăng jing doh, jăk, leh anăn siam, mâo klei tŭ kơ Khua Yang. Êjai ngă klei bi doh brei jih jang phung đăo lui hĕ jih jang bruă mơ̆ng kđeh msĕ si: “klei knhông, klei čhŏ mrŏ, klei knhŭk knhul, klei kkuh rup yang, klei jing mjâo, klei bi roh, klei bi msao, klei nač, klei čôñ ăl, klei čuôt klih, klei bi tăng, klei mĭn bi kah phung, klei tluh, klei kpiê ruă, klei ră huă mnăm, leh anăn jih jang klei msĕ snăn” (Galati 5:19-21). Tơdah drei amâo mâo bi doh ôh, amâo tŭ ôh kơ klei “pơ̆ng leh kđeh mbĭt hŏng klei ñu tluh leh anăn klei ñu čiăng ti kyâo bi kal” (Galati 5:24), snăn drei amâo srăng jing doh leh anăn amâo dưi dưn ƀuôn ala mtao Aê Diê ôh, leh anăn kăn mâo sa êpul phung đăo kơ Krist ktang kjăp leh anăn bi guh kơang kơ Anăn Khua Yang rei. Akâo Khua Yang đru drei hdĭp hŏng klei knang kơ Yang Mngăt Jăk hŏng jih ai tiê, leh anăn ƀuăn hdĭp tui si Yang Mngăt Jăk, bi doh klei hdĭp grăp hruê čiăng jing sa mta mnơ̆ng yua mâo klei tŭ dưn leh anăn jăk siam kơ Khua Yang.
Ya klei soh drei akâo kơ Khua Yang đru drei lui hĕ mtam hruê anei?
Wah lač: Ơ Khua Yang, kâo lač jăk kơ Ih tŭ leh klei djiê tla brei nư klei soh kâo. Đru kâo tŭ klei Ih bi doh, lui hĕ klei soh čiăng jing doh jăk grăp hruê. Brei kâo ƀuăn dôk dơ̆ng ƀơ̆ng huă tui si Yang Mngăt Jăk, bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
