Pajlug 25:4-5; Kalatias 5:19-25
Nqe cim:
“Cov uas ntseeg Yexus Khetos, lawv twb muab tej kev phem uas lawv lub siab nyiam ua huv tibsi los ntsia rau saum tus ntoo khaublig lawm. Vaj Ntsujplig twb pub txojsia rau peb lawm; peb yuav tsum cia nws kav tagnrho peb lub neej.” (Kalatias 5:24-25)
Lus nug rau sawvdaws xav:
– Nqi zog ntawm kev lim tawm yog dabtsi?
– Vim li cas yuav tsum tshem tawm tus neeg phem ntawm vajntxwv mus?
– Lub sijhawm raug lim, tus ntseeg Yexus yuav tsum tso tej yam twg?
Tom qab uas hais txog vajntxwv lub tshwjchim thiab lub hwjchim (Pajlug 25:1-3), Vajntxwv Xalumoos hais txog kev sim thaum vajntxwv siv hwjchim los kav lub tebchaws. Ob nqe Pajlug no sau hais txog qhov kev lim tawm nyiaj thiab lim tawm tebchaws.
Lim tawm yog ib ntu sijhawm tshawb xyuas, muab tej tsis tseem tshwj tawm kom tau cov tseem. Vajntxwv Xalumoos siv tus duab tus kws lim tawm nyiaj, rho tawm tej tsis tseem nyiaj mus kom tau cov tseem nyiaj, tsim tawm ua tej khoom zoo muaj nqis. Qhov uas tseem nyiaj dhau mus ua cov khoom zoo, muaj nqis li cas, ces txojkev dawbhuv ntawm ib lub tebchaws kuj ua rau lub tebchaws ruaj li ntawd. Hais rau seem tswj teb kav chaw, qhov kev lim tawm qhia tshwm los ntawm qhov uas rho tawm cov nomtswv phem kom lub tebchaws vammeej, kev tswjhwm ruaj khov. “Tsis txhob pub cov tuavxam siab phem nyob ze vajntxwv.” (nqe 5) vim lawv yog cov tub ua haujlwm, cov nomtswv, cov pab tswvyim rau vajntxwv, yog li lawv paub txhua yam kev txiav txim siab thiab npaj tseg ntawm vajtxwv. Yog tias lawv yog neeg dawbhuv, ncaj ncees thiab muaj tswvyim, vajntxwv yuav kav tau zoo heev, ua rau lub tebchaws muaj zog. Tiamsis yog cov neeg nyob ze vajntxwv ua phem, yuav coj vajntxwv mus rau txojkev txhaum thiab lub tebchaws puastsuaj.
Txawm yog paub lub sijhawm lim tawm zoo, los yeej yuav raug them tus nqi. Txojkev lim tawm yuav tsum mus dhau qhov uas hlawv kom yaj, tej tsis tseem rho tawm mus, tus neeg uas raug lim tawm kuj yuav tsum kam tso tseg, poob, fij taus tus kheej thiaj ua tau tseem, zoo txaus. Hais rau seem kev ntseeg, tus ntseeg Yexus lub neej kuj yuav tsum tau lim tawm kom dawbhuv, ua tau zoo, tus Tswv siv tau. Lub sijhawm lim tawm tus Tswv haivneeg yuav tsum tso tseg tej haujlwm uas sab nqaij tawv ua xws li: “Kev ua nkauj ua nraug, kev phem kev qias thiab ua dog ua dig, pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg, ntshaw luag ntug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no.” (Kalatias 5:19-21). Rau qhov yog peb tsis raug lim tawm, tsis kam “muab tej kev phem uas lawv lub siab nyiam ua huv tibsi los ntsia rau saum tus ntoo khaublig” (Kalatias 5:24), ces peb yuav ua tsis tau neeg dawbhuv rau Vajtswv lub Tebchaws, thiab kuj ua tsis tau kom cov ntseeg muaj zog, ua rau Vajtswv tau ntsejmuag. Thov Vajtswv pab kom peb tas siab vamkhom Vaj Ntsujplig ua neej, thiab coglus nrog Vaj Ntsujplig, lim tawm lub neej txhua hnub kom ua tau ib yam cuabyeej siv tau, zoo pub rau tus Tswv.
Thov Vajtswv,
Vajtswv, nyuam yaus ua Koj tsaug qhov uas Koj los ris nyuam yaus lub txim. Thov Koj pab kom nyuam yaus lees yuav Koj qhov kev lim tawm, muab tej kev txhaum tso tseg kom ua tau neeg dawbhuv txhua hnub. Nyuam yaus yuav nrog Vaj Ntsujplig mus, ua rau tus Tswv tau koob npe. Nyuam yaus tuav Tswv Yexus lub npe thov. Amees.
Peb thov Vajtswv pab kom yus tso tseg tau yam kev tsis zoo twg hnub no?
Nyeem Vajluskub hauv peb lub xyoo: Yelemis 7
Kênh Youtube BHKTHN:
