Klei Aê Diê Blŭ: I Y-Pêtrôs 1:22-25
Êlan kliăng: “Diih bi doh leh mngăt diih hŏng klei gưt asăp kơ klei sĭt nik, čiăng mâo klei khăp sĭt suôr kơ phung ayŏng amai adei. Snăn brei diih bi khăp hdơ̆ng diih hŏng jih ai tiê” (I Y-Pêtrôs 1:22)
Klei êmuh ksiêm mĭn: Ya mnơ̆ng ngă kơ phung đăo amâo dưi khăp kơ pô mkăn ôh? Ti dua mta klei khăp Khua ƀĭng kna Y-Pêtrôs bi êdah? Ya mnơ̆ng mtrŭt phung đăo gưt asăp kơ klei sĭt nik? Ya drei ngă čiăng bi êdah klei hdĭp gưt asăp kơ klei sĭt nik?
Khua Yang Yêsu tŭ klei djiê leh ti kyâo bi kal hrô brei klei soh lăn ala, phung đăo ăt srăng djiê kơ klei hdĭp hđăp mbĭt hŏng Ñu mơh. Ñu kbiă lŏ hdĭp leh čiăng brei phung đăo kơ Ñu kbiă lŏ hdĭp mbĭt hŏng Ñu hlăm klei hdĭp mrâo. Ƀiădah ăt adôk mơh sa klei dleh dlan prŏng ênguôt êdimima, anăn jing, mâo lu phung đăo ăt brei klei hdĭp hđăp kiă kriê kyuanăn amâo mâo klei sa ai leh anăn ka mâo klei bi khăp msĕ si klei Khua Yang mtă leh ôh. Phŭn kơ klei anăn jing kyuadah drei amâo gưt asăp kơ klei sĭt nik Aê Diê ôh, amâo jêñ ôh knang kơ Yang Mngăt Jăk bi doh hĕ ai tiê pô mơ̆ng klei čuôt klih, mơ̆ng klei phĭ, amâo brei Khua Yang mŭt dôk hlăm ai tiê ôh, kyuanăn drei amâo dưi khăp sĭt ôh kơ pô mkăn.
Khua ƀĭng kna Y-Pêtrôs mtă, “Diih bi doh leh mngăt diih hŏng klei gưt asăp kơ klei sĭt nik, čiăng mâo klei khăp sĭt suôr kơ phung ayŏng amai adei. Snăn brei diih bi khăp hdơ̆ng diih hŏng jih ai tiê” (êlan 22). Hlăm klei blŭ phŭn, pruê̆ anei mâo dua boh blŭ lač kơ klei khăp: “klei khăp kơ phung ayŏng amai adei” jing “philia”, leh anăn “bi khăp hdơ̆ng diih hŏng jih ai tiê” jing “agap”. Anei jing klei khăp săn asei mlei msĕ si Khua Yang. Khua ƀĭng kna Y-Pêtrôs mtă kơ phung ayŏng adei “bi doh mngăt hŏng klei gưt asăp kơ klei sĭt nik”, čiăng lač brei ayŏng adei đăo sĭt kơ Khua Yang, gưt asăp kơ klei sĭt nik čiăng kơ klei khăp phung ayŏng amai adei đĭ hriê kơ prŏng sĭt jing klei khăp sĭt suôr, hŏng jih ai tiê msĕ si Khua Yang khăp leh kơ phung ayŏng amai adei.
Mâo lu blư̆ phung đăo wơr bĭt hĕ kơ diñu pô “mâo leh klei lŏ bi kkiêng mrâo, amâo djŏ hŏng mjeh thâo rai tuč ôh, ƀiădah hŏng mjeh amâo thâo rai tuč, hŏng klei Aê Diê blŭ hdĭp leh anăn ăt dôk nanao” (êlan 23). Kyuanăn Khua ƀĭng kna Y-Pêtrôs mtrŭt, lŏ mñă brei grăp čô phung đăo hdơr kơ diñu pô mâo leh klei lŏ bi kkiêng mrâo hŏng klei myang Yang Mngăt Jăk, mâo klei bi mlih jing mrâo grăp hruê hŏng Klei Aê Diê Blŭ, jing Klei Blŭ Hdĭp čiăng kơ drei ƀrư̆ jing msĕ si Khua Yang hĭn. Êgao hĭn kơnăn, brei phung đăo thâo jih jang mnơ̆ng ti lăn ala anei dôk knŏng bhiâo, êgao djăl “Kyuadah “Jih jang kđeh jing msĕ si rơ̆k, leh anăn jih klei guh kơang ñu msĕ si mnga rơ̆k. Rơ̆k krô, leh anăn mnga ñu luh” (êlan 24). Knŏng hjăn Klei Aê Diê Blŭ yơh dôk nanao hlŏng lar, anăn jing Klei Blŭ kơ Klei Hdĭp drei mă tŭ leh. Snăn gưt asăp bĕ kơ klei sĭt nik čiăng kơ drei “bi khăp hdơ̆ng drei hŏng jih ai tiê”. Anăn jing mnơ̆ng hưn bi sĭt brei ƀuh drei mâo leh klei lŏ bi kkiêng mrâo. Pruê̆ knhal tuč êlan 25 lŏ bi hdơr kơ drei jing phung đăo leh kơ Yêsu Krist mơ̆ng Klei Mrâo Mrang Jăk arăng hưn leh, snăn brei drei khăp mơh kơ phung ka thâo kral Khua Yang ôh čiăng kơ drei nao hưn Klei Mrâo Mrang Jăk kơ digơ̆ hŏng jih ai tiê.
Si drei bi êdah klei hdĭp gưt asăp kơ klei sĭt nik?
Wah lač: Ơ Khua Yang, lač jăk kơ Khua Yang Yêsu hriê leh ti lăn ala, gưt asăp kơ Aê Diê Ama tơl djiê, čiăng brei kơ kâo klei hdĭp hlŏng lar. Akâo Khua Yang bi ktang kâo, brei kơ kâo mâo klei mĭn mrâo čiăng kơ kâo hriăm hdĭp klei hdĭp mrâo, gưt asăp kơ Khua Yang, bi khăp hdơ̆ng ayŏng adei hŏng jih ai tiê msĕ si klei Khua Yang mtă leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
