I Petus 1:22-25
Nqe cim:
“Qhov uas nej mloog qhov tseeb ua rau nej muaj lub siab dawbhuv, thiab nej thiaj hlub txhua tus uas ntseeg Vajtswv. Yog li ntawd, nej ib tug yuav tsum hlub ib tug tiag tiag.” (I Petus 1:22)
Lus nug rau sawvdaws xav:
– Qhov vimchiv twg ua rau cov ntseeg Yexus hlub tsis tau lwm tus?
– Timthawj Petus hais txog ob yam kev hlub twg?
– Yam dabtsi txhawb tau cov ntseeg Yexus ua neej raws qhov tseeb?
– Peb ua dabtsi kom qhia tau lub neej ua raws qhov tseeb?
Tswv Yexus yeem tuag saum tus ntoo khaublig hloov neeg ntiajteb tej kev txhaum, tus uas los ntseeg tus Tswv kuj yuav tsum tuag lub neej qub nrog Nws. Tus Tswv twb sawv hauv qhov tuag rov qab los kom pub tau tus uas ntseeg Nws muaj lub neej tshiab. Tiamsis tseem muaj tej qhov kev mob siab, yog ntau tus ntseeg tseem cia lub neej qub kav, yog li tsis koom siab, tsis hlub lwm tus ib yam li Vajtswv Txojlus qhia. Qhov vimchiv yog vim peb tsis ua raws li qhov tseeb uas yog Vajtswv Txojlus, tsis vamkhom Vaj Ntsujplig lub hwjchim ntxuav kom huv lub siab qia dub, chim, tsis cia tus Tswv tswj kav lub siab, yog li peb thiaj hlub tsis tau lwm tus.
Timthawj Petus qhia, thaum “…nej mloog qhov tseeb ua rau nej muaj lub siab dawbhuv, thiab nej thiaj hlub txhua tus uas ntseeg Vajtswv. Yog li ntawd, nej ib tug yuav tsum hlub ib tug tiag tiag.” (nqe 22). Raws li hauvpaus lus, nqe no muaj ob lo lus hais txog kev hlub: “hlub txhua tus uas ntseeg Vajtswv” yog “philia”, thiab “nej ib tug yuav tsum hlub ib tug tiag tiag.” yog “agape”. Nov yog kev hlub fij taus tus kheej zoo li tus Tswv. Timthawj Petus ntuas cov ntseeg yuav tsum “mloog qhov tseeb ua rau nej muaj lub siab dawbhuv”, txhais tau tias yuav tsum ntseeg tus Tswv, ua raws li qhov tseeb kom txojkev hlub cov ntseeg tseeb loj hlob thiab ib leeg txawj hlub ib leeg zoo ib yam li tus Tswv twb hlub peb.
Qee zaus cov ntseeg tsis nco qab, “Rau qhov nej twb yug dua tshiab lawm, qhov uas nej tau yug dua tshiab ntawd twb yog vim nej ntseeg Vajtswv txojlus uas muaj txojsia nyob mus ibtxhis. Tus uas yug nej ntawd nws tsis txawj tuag nws muaj txojsia nyob mus ibtxhis.” (nqe 23). Yog li Timthawj Petus txhawb zog, ntuas txhua tus ntseeg Yexus yuav tsum nco ntsoov yus twb yug dua tshiab los ntawm Vaj Ntsujplig lub hwjchim, hloov tshiab zuj zus ntawm Vajtswv Txojlus uas yog Txojlus ciaj sia kom peb yim hnub yim ua tau lub neej zoo li tus Tswv lub. Dua li ntawd, cov ntseeg Yexus cheemtsum paub tagnrho txhua yam nyob hauv ntiajteb no yog ib vuag dua xwb yuav dhau mus, “Tej neeg txhua tus puavleej zoo ib yam li tej nroj tsuag, thiab lawv lub hwjchim zoo ib yam li tej paj nroj xwb. Thaum tej nroj tsuag tuag tej paj nroj yuav zeeg tas” (nqe 24). Tsuas yog Vajtswv Txojlus thiaj nyob mus ibtxhis, Nws yog Txojlus ciaj sia uas peb twb txais yuav lawm. Yog li ntawd, ua raws li qhov tseeb kom peb “ib leeg hlub ib leeg tiag tiag”. Nov yog timkhawv qhia tias peb twb yug dua tshiab lawm. Feem kawg ntawm nqe 25 qhia rau peb tias cov neeg uas twb txais yuav Tswv Yexus los ntawm Txojmoo Zoo qhia ces peb yuav tsum hlub cov neeg uas tsis tau paub txog tus Tswv thiab rau siab ntso coj Txojmoo Zoo mus qhia rau lawv.
Thov Vajtswv,
Tus Tswv, ua tsaug muaj Tswv Yexus los yug hauv ntiajteb no, txaus siab mloog Leej Txiv lus mus txog thaum tuag, kom pub tau txojsia ntev ibtxhis. Thov Vajtswv ntxiv zog tshiab, kev rau siab kom nyuam yaus xyaum ua tau lub neej tshiab, mloog tus Tswv lus, hlub cov ntseeg ib yam li tus Tswv qhia. Nyuam yaus tuav Tswv Yexus lub npe thov. Amees.
Peb qhia tshwm lub neej ua raws li qhov tseeb qhia zoo li cas?
Nyeem Vajluskub hauv peb lub xyoo: Yelemis 4
Kênh Youtube BHKTHN:
