Mathiơ 22:15-22
“Jên âu rup Sêsar tơpă na bơ̆n athei thuê̆ kơ sư yua kơ sư pơgơ̆r. Tơmam ‘Bok Kei-Dei bơ̆n athei pơyơ̆r kơ ‘Bok Kei-Dei yua kơ Sư tơgŭm ăn kơ bơ̆n.” (Mathiơ 22:21b)
Nơ̆r jet tơchĕng pơwao:
– Lu bơngai Pharisi păng khul pơtao Hêrôt năm jet Kră Yang Yêsu tơdrong kiơ? Yua kơ kiơ?
– Kră Yang tơl tơwih lu sư thoi yơ?
– Lu bơ̆n oei pơm kiơ̆ tơdrong juăt hăm Kră Yang, hăm kon pơlei thoi yơ?
Đơ̆ng rŏng kơ Kră Yang Yêsu roi hơ’mon pêng tơdrong pơtih gia pơma kơ tơdrong ‘Bok Kei-Dei sek tơlang ‘măn kơ bơngai Juđê mă ưh kơ lui, arăng kơ̆l, na lu bơngai Pharisi păng khul pơtao Hêrôt lu sư chă đon wă kêng Yêsu gah pơma ưh kơ trŏ. Mă khan ‘bar khul ‘nâu tơchĕng phara mălei lu sư lăng Kră Yang Yêsu âu bơngai wă pơrăm pơgăn tơdrong jang lu sư thoi noh na lu sư pôm đon wă kêng pơrăm Kră Yang. Lu sư pơma pơư kơ Kră Yang khan bơngai tơpăt păng lu sư ngeh kơ Kră Yang gô pơma kiơ̆ thoi lu sư. Na lu sư jet Yêsu “Na nhôn wă jet Ih, Ih tơchĕng thoi yơ kiơ̆ kơ tơdrong juăt bơngai Juđê bơ̆n? Bơ̆n hăm gơh ăn jên thuê̆ kơ Sêsar pơtao đe Rôm mă pơgơ̆r bơ̆n dah ưh?” (trong 17). Kơplah lu bơngai Rôm pơgơ̆r kon pơlei Juđê, lu sư đei iŏk jên thuê̆ lơ dêh, thuê̆ đơ̆ng teh jang sa, păng pơm kơ kon pơlei Juđê gleh lap tơpă, kơlih kơ thoi noh na lu sư ayăt kơ bơngai Rôm. Nơ̆r lu bơngai âu đei jet noh wă pơlong păng pơrăm Kră Yang Yêsu. Dah Kră Yang khan athei ăn thuê̆ dah ưh kơ tơl tơwih, lei lu bơngai Juđê gô ưh pă mơ̆ng kiơ̆ Kră Yang bơih, mălei dah Kră Yang khan ưh kơ ăn thuê̆, lei bơngai Rôm gô rôp kêng Kră Yang yua kơ ưh kơ chu kiơ̆ tơdrong juăt lu sư.
Kră Yang ‘bôh đĭ lăm jơhngơ̆m lu sư thoi noh na Sư băt tơpă tơdrong tơchĕng kơnê̆ lu bơngai mă năm jet Sư, Kră Yang khan lu sư noh “’Bơ̆r đak klak ŭnh” wă khan pơma chă pơpơm gah ‘nguaih đĕch, lu sư truh wă chă đon kêng Kră Yang đĕch (trong 18). Iĕm ăn kơ Inh lăng jên iĕm wă ăn thuê̆ noh, na lu sư ăn kơ Yêsu lăng minh hlak jên kiơ̆ kơ jên teh đak Rôm. Na Kră Yang khan kơ lu sư: “Rup bu âu, anăn bu âu?” lu sư khan noh rup Sêsar. Kră Yang Yêsu tơl nơ̆r lu sư jet pơlong, păng Kră Yang kư̆m tơbăt tơdrong juăt wă tơl pơkeh trŏ tơdrong ‘nâu: “Lu sư khan: “’Noh rup Sêsar păng anăn Sêsar mơ̆n.” Thoi noh na Yêsu khan: “Jên âu rup Sêsar tơpă na bơ̆n athei thuê̆ kơ sư yua kơ sư pơgơ̆r. Tơmam ‘Bok Kei-Dei bơ̆n athei pơyơ̆r kơ ‘Bok Kei-Dei yua kơ Sư tơgŭm ăn kơ bơ̆n.” (trong 21). Pơma gah sĕch akar lu sư oei lăm tơpang ti bơngai Rôm pơgơ̆r. Thoi noh na lu sư athei pơm kiơ̆ kơ tơdrong juăt Sêsar; pơma gah bơhngol lu sư oei kơkuh kơ ‘Bok Kei-Dei thoi noh na lu sư kư̆m dai chu kiơ̆ tơdrong juăt Kră Yang. Lu sư kơtơ̆ng chrêu kơ đon na weh hloi tơ nai.
Khul bơngai lui bơ̆n dang ei ‘nâu kon pơlei lăm minh teh đak kơlih kơ thoi noh na lu bơ̆n athei kiơ̆ tơdrong juăt kơ minh ‘nu bơngai arih lăm kon pơlei. Mă khan lei ră, lu bơ̆n âu kư̆m dai kon pơlei pơla Kră Yang, kơlih kơ thoi noh na lu bơ̆n athei pơm keh tơdrong juăt Kră Yang păng pơm keh tơdrong juăt Khul Bơngai Lui. Ưh kơ đei bu gơh achăng tŭk tơdrong noh păng ưh kơ gơh pơdê. Mălei phŏ lăp bơ̆n, chơchă wă kơ lăp đon lu bơngai ala teh âu đĕch, na ưh kơ bơngơ̆t kơ tơdrong jang pơm kơ Tơ’ngla Pơtao lăp đon. ‘Nĕ kơ hiơt pơkeh tôm tơdrong trŏ kơ pŭ iŏk hăm tơdrong kơkuh kơ Kră Yang, tơdrong pơyơ̆r, tơdrong bơ̆jang kơ Kră Yang hăm tơdrong arih ưang anăn Kră Yang.
Ơ Kră Yang, apinh Ih tơgŭm inh pơkeh tôm tơdrong trŏ kơ pŭ iŏk hăm kon pơlei pơla, păng wă kơ Ih lăp đon đơ̆ng chăl arih inh. Krao khan yua anăn Kră Yang Yêsu Krsit, Amen.
Lu bơ̆n hăm pơm pơkeh kiơ̆ thoi Kră Yang hăm bơngai pơgơ̆r teh đak ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 3
Kênh Youtube BHKTHN:
