Klei Aê Diê Blŭ: Y-Mathiơ 22:15-22
Êlan kliăng: “Snăn bi wĭt bĕ kơ Sêsar dŏ Sêsar, leh anăn bi wĭt bĕ kơ Aê Diê dŏ Aê Diê” (Y-Mathiơ 22:21b)
Klei êmuh ksiêm mĭn Ya klei phung Pharisi leh anăn phung Hêrôt hriê êmuh Khua Yang Yêsu? Ya ngă? Si ngă Khua Yang lŏ wĭt lač kơ diñu? Si drei dôk ngă bi ênŭm bruă klam hŏng Khua Yang, hŏng yang ƀuôn?
Leh Khua Yang Yêsu yăl dliê tlâo klei bi hriêng čiăng lač kơ klei Aê Diê phat kđi pioh kơ phung Yuđa amâo mâo đăo leh anăn khăng ai tiê, snăn phung Pharisi leh anăn phung Hêrôt bi mguôp čiăng duah klei dưi kčŭt kơ Khua Yang hlăm klei Gơ̆ blŭ. Wăt tơdah dua phung anei ăt mâo klei amâo thâo bi djŏ ôh ƀiădah kyuadah diñu yap Khua Yang Yêsu jing klei bi huĭ kơ jih dua phung diñu kyuanăn diñu srăng ngă klei bi mguôp čiăng bi lĕ Khua Yang. Diñu kma blŭ hŏng klei bi mni kơ Khua Yang jing sa čô pô sĭt klă leh anăn diñu đăo Khua Yang ăt srăng blŭ klei sĭt nik mơh. Leh anăn diñu êmuh Khua Yang Yêsu: “Bhiăn mơ̆ tuh jia kơ Sêsar amâodah hơăi?” (êlan 17). Ênuk phung Rôm kiă kriê phung Yuđa, diñu rĭng lu mta jia msĕ si jia lăn, jia prăk digơ̆ mâo leh anăn jia asei mlei, ngă kơ phung Yuđa bŏ hŏng klei hriă hriêt, kyuanăn digơ̆ bi êmut snăk kơ phung Rôm. Klei phung anei êmuh jing klei bi dleh leh anăn hyưt snăk kơ Khua Yang Yêsu. Tơdah Khua Yang lač bhiăn tuh jia amâodah amâo lŏ wĭt lač ôh, phung Yuđa srăng hngah leh anăn amâo lŏ hmư̆ ôh klei Ñu mtô, ƀiădah tơdah Ñu lač amâo bhiăn tuh jia ôh, snăn knŭk kna Rôm srăng mă Ñu kyua klei soh bi kdơ̆ng.
Khua Yang Yêsu ƀuh jih anôk hgăm hlăm ai tiê phung hriê êmuh Ñu, kyuanăn Khua Yang thâo klei mĭn jhat diñu, Khua Yang pia kơ diñu jing “phung ai ngăm”, čiăng lač jing phung duah mgưt mă, diñu hriê knŏng čiăng lông dlăng Khua Yang đuč (êlan 18). Khua Yang lač kơ diñu brei Khua Yang dlăng prăk tuh jia anăn, diñu brei sa asăr đơniê, jing prăk phung Rôm. Khua Yang êmuh diñu hlei rup leh anăn hră čih anei? Diñu lač dŏ Sêsar. Khua Yang Yêsu lŏ wĭt lač kơ klei diñu êmuh lông dlăng leh anăn brei kơ diñu sa hdră êlan mgaih mkra hĕ klei dleh dlan anăn snei: “Snăn bi wĭt bĕ kơ Sêsar dŏ Sêsar, leh anăn bi wĭt bĕ kơ Aê Diê dŏ Aê Diê” (êlan 21). Tĭng kơ kđeh, diñu dôk ti gŭ klei kiă kriê phung Rôm, kyuanăn brei diñu ngă bi leh ênŭm bruă klam hŏng Sêsar. Tĭng kơ klei hdĭp myang, diñu dôk kkuh mpŭ kơ Aê Diê, kyuanăn ăt brei diñu ngă bi ênŭm mơh bruă klam hŏng Aê Diê. Diñu bi kngăr tơdah hmư̆ klei lŏ wĭt lač anăn, snăn diñu đuĕ nao.
Phung đăo kơ Krist hruê anei jing phung ƀuôn sang kơ sa boh čar, kyuanăn brei drei bi leh ênŭm bruă klam kơ sa čô mnuih ƀuôn sang. Ƀiădah drei ăt jing phung ƀuôn sang Ƀuôn Ala Mtao Adiê mơh, kyuanăn brei bi leh ênŭm msĕ mơh bruă klam hŏng Khua Yang leh anăn hŏng Phung Sang Aê Diê Ñu. Amâo mâo pô dưi lui hĕ sa nah amâodah bi êmut kơ sa nah ôh. Ƀiădah lĕ, mâo lu blư̆ drei knŏng dôk ngă êlâo hĭn bruă ngă čiăng bi mơak kơ phung khua mtao lăn ala anei, ƀiădah amâo mđing ôh leh anăn dlăng hơăi mang kơ bruă ngă bi mơak kơ Mtao Adiê. Đăm wơr bĭt ôh ngă bi leh ênŭm bruă klam kơ sa čô mnuih ƀuôn sang Ƀuôn Ala Mtao Adiê hŏng klei kkuh mpŭ, klei myơr, hŏng jih ai tiê mă bruă kơ Khua Yang leh anăn hŏng klei hdĭp bi guh kơang kơ Anăn Ñu.
Drei dôk bi leh ênŭm bruă klam hŏng Aê Diê leh anăn hŏng yang ƀuôn mơ̆?
Wah lač: Ơ Khua Yang, đru kâo thâo kral bruă klam hŏng Ih, hŏng yang ƀuôn čiăng kơ kâo bi leh ênŭm jih jang bruă klam leh anăn bi mơak kơ Ih hŏng klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
