Nehemis 1:1-11
Nqe cim:
“Tus TSWV, thov koj tsa qhovmuag saib kuv thiab tig pobntseg mloog kuv tej lus uas kuv niaj hnub niaj hmo thov koj pab cov tubtxib uas yog haivneeg Yixalayees. Kuv thov lees tej kev txhaum uas peb cov neeg Yixalayees tau ua rau koj lawm. Kuv cov yawgkoob thiab kuv los tau ua txhaum rau koj lawm thiab” (Nehemis 1:6)
Lus nug rau sawvdaws xav:
– Nehemis tau ua dabtsi thaum uas hnov xov ntawm Hananis tuaj?
– Nehemis tau thov Vajtswv li cas rau yus haivneeg?
– Peb cheem tsum ua dabtsi kom yus haivneeg muaj coob tus tau cawmdim?
Tom qab uas cov Yixalayees ua cev qhev rov qab los, Nehemis yeej tseem nyob hauv vajntxwv lub loog, ua tus ce cawv rau vajntxwv Pawxias. Txawm yog tau vajntxwv ntseeg siab thiab hlub kawg nkaus, tiamsis Nemhemis lub siab niaj hnub niaj hmo tig los rau nws haivneeg thiab lub nroog Yeluxalees. Vim li ntawd, nws thiaj cim civ nug xov thaum muaj neeg tuaj tim qub tebchaws tuaj rau hauv lub nroog Pawsxias, thiab paub txog yus haivneeg lub tsamthawj tabtom “raug kev txom nyem thiab txaj muag kawg…” (nqe 3 HMOWSV). Tej lus uas lawv piav ntawd tau ua rau Nehemis nyuaj siab kawg txog qib uas “zaum quaj thiab quaj nyuaj siab ntau hnub thiab … yoo mov thiab thov Vajtswv Ntuj tsis tu li (nqe 4 HMOWSV).
Txawm yog nyob qhov chaw uas npluanuj tiamsis Nehemis tsis hnov qab nws lub hauvpaus, nws tseem nco ntsoov nws yog neeg Yixalayees, uas yog Vajtswv haivneeg. Nws qhib thawj thov Vajtswv los ntawm tej lus txhawb nqa “Koj yog tus uas muaj hwjchim loj thiab peb sawvdaws hwm koj nkaus xwb. Koj yog tus uas ncaj ncees thiab ua raws li koj tej lus cog tseg rau cov neeg uas muab siab npuab koj, hlub koj thiab ua raws li koj tej lus samhwm” (nqe 5). Tom qab ntawd nws txo hwjchim, zeem paub nws haivneeg thiab nws kev txhaum thov Vajtswv zam txim dhau los ntawm tej lus lees kev txhaum ntawm nws tus kheej, tsev neeg thiab nws haivneeg (nqe 6). Hauv tej lus thov Vajtswv, Nehemis lees paub nws thiab nws haivneeg hais tias “Peb tau ua txhaum rau koj loj kawg nkaus thiab tsis tau ua raws li koj tej lus samhwm ib nyuag qhov li. Peb tsis coj raws li koj tej kevcai uas koj muab cob rau peb los ntawm koj tus tubtxib Mauxes hlo li” (nqe 7) thiaj poob ua cev qhev, tshuav cov tseem seem nyob raug tsim txom thiab raug luag hem vim tsis tau muaj tus ntsa yeej tiv thaiv. Nehemis thov Vajtswv nco txog Nws tej uas tau hais rau Mauxes: “Tiamsis yog hais tias nej tig rov los cuag kuv thiab ua raws li tej lus uas kuv samhwm rau nej lawm, ces txawm yog nej mus nyob rau qab ntuj kawg lawm los kuv yuav coj nej rov los nyob qhov chaw uas kuv twb xaiv tseg cia rau nej tau pehawm kuv lawm” (nqe 9). Vajtswv kev coglus tseg pab rau Nehemis muaj zog kho taij thov Vajtswv foom koob hmoov rau nws kev npaj tseg yuav rov qab los pab txhim kho tus ntsia yeej Yeluxalees.
Ib tus ntseeg niaj hnub nim no tsis yog tsuas thov Vajtswv thiab taij thov rau yus xwb tiamsis kuj yuav tsum nco thov Vajtswv rau lub tebchaws thiab yus haivneeg. Peb thov Vajtswv zam txim thiab tshoov peb lub siab kom kub siab lug qhia txoj Moo Zoo thiab thov Vajtswv pub kom muaj coob tus tau kev cawmdim dhau los ntawm peb kev thov Vajtswv thiab ua tim khawv.
Thov Vajtswv,
Vajtswv thov zam txim rau nyuam yaus, vim tsis tau siv zog taij thov Vajtswv thiab ua tim khawv rau nyuam yaus haivneeg. Thov tshoov nyuam yaus lub siab kom kub siab lug qhia txoj Zoo Zoo thiab ua tim khawv rau nyuam yaus haivneeg kom muaj coob tus tau kev cawmdim. Nyuam yaus tuav Tswv Yexus Khetos lub npe thov, Amees.
Peb tabtom thov Vajtswv li cas rau yus haivneeg?
Nyeem Vajluskub hauv peb lub xyoos: Pajlug 28
Kênh Youtube BHKTHN:
