I Timôthê 2:2-4
“Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu sư thoi đêl”(II Hơ’mon 7:14).
Nơ̆r jet tơchĕng pơwao:
– ‘Bok Pôl bơtho ‘bok Timôthê athei krao khan tang ăn kơ lu đe bu?
– Yua kơ kiơ athei krao khan ăn kơ lu sư?
– Lu bơ̆n krao khan tang ăn kơ lu bơngai pơgơ̆r teh đak thoi yơ?
‘Bok Pôl đei tơ’bôh ‘bar tơdrong kăl athei Khul Bơngai lui krao khan, ‘noh jơ̆ “lu pơtao, păng lu bơngai pơgơ̆r” (tr.2). Bơ̆n kăl kơ krao khan kơ lu bơngai pơgơ̆r teh đak yua kơ dôm tơdrong lu sư gơh pơm noh đơ̆ng Kră Yang ăn (Rôm 13:1). Lu bơ̆n athei pŭ iŏk tơdrong jang ‘bơ̆t anăp Kră Yang wă kơ krao khan kơ lu pơtao păng đĭ-đăng lu bơngai pơgơ̆r gơh băt kơ Kră Yang păng gơh klaih. Kơplah lu sư băt kơ Kră Yang, lui kơ Sư na lu sư pơgơ̆r teh đak lăm tơdrong sĭt tơpăt. Păng thoi noh lu bơ̆n gô “oei hiôk-hian păng đei đon tơpăt kiơ̆ tơdrong ‘Bok Kei-Dei” (tr.2 BTTHĐ).
Minh tơdrong dơ̆ng ‘Bok Pôl bơtho ‘Bok bơthoTimôthê păng đĭ-đăng Khul Bơngai Lui kơ Kră Yang ‘măn tơdrong hơdrol hloh lăm tơdrong krao khan kơ lu bơngai pơgơ̆r teh đak yua kơ “ noh ‘lơ̆ng tơpă păng Kră Yang ‘Bok Kei-Dei lăp đon” (tr.3 BTTHĐ). Lơ bơngai tam băt kơ Kră Yang kơplah pơjah pơjăng păng pŭ trăp tơdrong yoch, tơglơ̆m hăm kon pơlei, păng chơchă tơdrong trŏ lăm tơdrong arih kơplah tôch đon. Yua thoi noh, ‘lơ̆ng dêh tơpă kơplah kon pơlei Kră Yang arih jơ̆ minh tơdrong arih wă pơư pơang Anăn Kră Yang ‘bơ̆t anăp đĭ-đăng bơngai, păng đĭ jơhngơ̆m krao khan kơ lu bơngai pơgơ̆r teh đak .
‘Nguaih kơ noh, ‘Bok Pêtrôs tơbăt ăn Kră Yang wă kơ đĭ-đăng bơngai hlôh băt tơdrong trŏ, tơbral păng sơng iŏk tơdrong dŏng pơklaih “ Sư ưh kơ wă pơđunh ôh kơ tơdrong Sư pơkă khan wă Yêsu Krist jur, thoi lu bơngai che bơle noh khan Sư oei mơnat ră kơ kon bơngai bơ̆n , Sư ưh kơ wă minh ‘nu bơngai hiong lăm tơdrong Sư phak ră. Thoi noh na oei gô wăk kơ đĭ-đăng bơngai tơbral kơdih tơdrong yoch (II Pêtrôs 3:9). Thoi noh lu bơ̆n kăl kơ krao khan tang ăn kơ lu bơngai tam băt kơ Kră Yang păng lu bơngai pơgơ̆r wă kơ lu sư rơih iŏk trong tơdrong arih thoi nơ̆r Kră Yang Yêsu đei,bơtho: “ Iĕm athei adrin mơ̆t trong ‘măng iĕ mă năm tơ anih arih ling-lang. Trong ‘măng tih mơ̆t ‘bônh ră, mă lei năm tơ dơnâu ŭnh ‘Bok Kei-Dei phak, kư̆m lơ bơngai năm trong noh. Trong ‘măng mơ̆t tơ anih arih ling-lang iĕ păng anat kơ yak tơpă, na hui bơngai ‘bôh ‘măng iĕ noh” (Mathiơ 7:13-14).
Teh đak oei kăl kơ lu bơ̆n ‘mêm mơnat păng “krao khan đĭ jơhngơ̆m, krao apinh, krao ôr, bơnê” ăn kơ lu bơngai pơgơ̆r. ‘Noh jơ̆ tơdrong jang đĭ-đăng Khul Bơngai Lui. Nơ̆r Kră Yang khan kơ Pơtao Salômôn sơ̆, kư̆m tơ’blŏk kơ lu bơ̆n dang ei: “Tơdah kon pơlei pơla Inh, đe krao lu sư kon Inh, drap bon kơkuh, krao khan, chơchă Inh păng tơbral achăng lê̆ trong kơnê̆ lei Inh oei kơpal plĕnh ti gô mơ̆ng, mơnat ăn huay pă jô̆ yoch lu sư păng ăn teh lu su thoi đêl” (II Hơ’mon 7:14). Rim ‘nu lu bơ̆n athei iŏk đon ala, đĭ jơhngơ̆m krao khan păng krao apinh tơdrong mơnat đơ̆ng Kră Yang wă kơ teh đak lu bơ̆n đei lơ bơngai gơh klaih.
Ơ Kră Yang, apinh mơnat kơ inh tam mă krao khan đĭ jơhngơ̆m kơ đĭ-đăng bơngai păng ăn kơ lu bơngai pơgơ̆r. Apinh tơ’blŏk kơ inh ling-lang ‘blŏk kơ lu bơngai pơgơ̆r teh đak păng pơdrŭt jơhngơ̆m krao khan ăn kơ lu sư. Apinh Ih mơnat ăn kơ teh đak inh. Yua anăn Kră Yang Yêsu Krist, Amen.
Lu bơ̆n tam đĭ jơhngơ̆m krao apinh Kră Yang mơnat ăn kơ lu bơngai pơgơ̆r teh đak bơ̆n ưh?
Đŏk Sơ̆p Hla ar ‘Bok Kei-Dei lăm pêng sơnăm: Hơriso 64-65
Kênh Youtube BHKTHN:
