Klei Aê Diê Blŭ: Y-Yakơ 5:19-20
Êlan kliăng: “…brei ñu thâo hlei pô atăt mnuih soh wĭt mơ̆ng êlan gơ̆ klah đuĕ leh, ñu srăng bi mtlaih mngăt gơ̆ mơ̆ng klei djiê, leh anăn srăng guôm lu klei soh gơ̆” (Y-Yakơ 5:20)
Klei êmuh ksiêm mĭn: Mnuih “klah đuĕ” jing si mnuih? Ya drei srăng ngă tơdah thâo kơ sa čô mnuih dôk klah đuĕ? Si srăng ngă čiăng atăt mnuih klah đuĕ lŏ wĭt?
Y-Yakơ bi ruĕ hră ñu čih amâo djŏ hŏng klei kkuh čhưn, klei wah lač amâodah hŏng klei hơêč hmưi ôh. Hrô kơ klei anăn, ñu mâo sa klei mtă, sa bruă yuôm brei phung đăo ngă, anăn jing atăt phung klah đuĕ lŏ wĭt. Mnuih klah đuĕ Y-Yakơ lač anăn jing “sa čô hlăm phung diih” ƀiădah “klah đuĕ mơ̆ng klei sĭt nik”, leh anăn jing phung “mnuih soh”. Digơ̆ jing phung tuôm dôk leh hlăm Phung Sang Aê Diê ară anei kbiă đuĕ mơ̆ng phung đăo leh anăn lui wir klei đăo. Digơ̆ hdĭp hlăm klei soh leh anăn klah đuĕ ti krah phung amâo mâo đăo ôh, hdĭp amâo mâo klei kñăm čiăng, klei soh kpuh mđung digơ̆. Tơdah amâo mâo pô bi mtlaih ôh, mngăt digơ̆ srăng nao truh kơ klei djiê (êlan 20). Tơdah ƀuh mâo mnuih klah đuĕ msĕ snăn, mâo klei mtă kơ drei brei atăt pô anăn lŏ wĭt mơ̆ng êlan gơ̆ klah đuĕ leh.
Klei atăt sa čô mnuih klah đuĕ lŏ wĭt jing sa klei yuôm bhăn snăk. Tal sa, “bi mtlaih mngăt gơ̆ mơ̆ng klei djiê.” Tal dua, “guôm lu klei soh gơ̆,” čiăng lač Aê Diê amâo lŏ bi kmhal ôh klei soh digơ̆ ngă leh. Digơ̆ tlaih mơ̆ng klei bi kmhal leh anăn mngăt digơ̆ mâo klei bi mtlaih tơdah lŏ wĭt kơ Khua Yang.
Jing phung đăo, Aê Diê dưm drei hlăm Phung Sang Aê Diê, amâo djŏ knŏng hjăn drei pô ôh hdĭp hŏng Klei Aê Diê Blŭ hŏng jih ai tiê, ƀiădah drei srăng bi răng kriê mơh hdơ̆ng drei, bi đru hdơ̆ng drei hdĭp hŏng klei đăo ti krah phung amâo đăo ôh. Dlăng kơ klei jing Phung Sang Aê Diê hruê anei, drei ƀuh amâo ƀiă ôh mnuih klah đuĕ mơ̆ng klei sĭt nik. Wăt mâo lu mnuih êlâo adih tuôm mă bruă leh kơ Khua Yang hŏng klei hur har snăk, djă bruă yuôm hlăm Sang Aê Diê msĕ si ngă khua sang yang, khua kơ êpul, ară anei ăt dôk klah đuĕ mơh. Klei Aê Diê Blŭ mtă kơ drei brei drei atăt digơ̆ lŏ wĭt.
Si srăng ngă čiăng atăt phung klah đuĕ lŏ wĭt? Năng ai mâo mơh đa đa mnuih leh găn klei truh kơ klei hdĭp ñu, ñu thâo kral klei ñu jing leh anăn lŏ wĭt mă ñu pô. Ƀiădah păt čiăng jih jang phung klah đuĕ čiăng snăk mâo pô khăp brei, đru hŏng klei gĭr, amâo mâo kdŭn ôh. Brei Phung Sang Aê Diê leh anăn jih jang phung đăo wah lač brei kơ phung klah đuĕ hŏng jih ai tiê, pioh mmông nao čuă čhưn, răng kriê, djă pioh klei bi mguôp, duah mmông găl čiăng bi mđĭ ai…jing êlan đru phung klah đuĕ lŏ wĭt. Năng ai drei ƀuh bruă atăt phung klah đuĕ lŏ wĭt jing bruă dleh snăk, ƀiădah đăm êdu ai ôh, kyuadah Aê Diê mâo klei myang mă hĕ ai tiê khăng leh anăn brei ai tiê êdu êun (Y-Êskiêl 36:26).
Hruê anei, kơ hlei pô Khua Yang bi hdơr brei drei đru wah lač leh anăn atăt digơ̆ wĭt kơ Ñu?
Wah lač: Ơ Khua Yang, kâo bi mni kơ Ih kyuadah Ih amâo čiăng ôh sa čô srăng djiê hlăm war pui hlŏng lar. Kâo wah lač kơ jih jang phung klah đuĕ kbưi leh mơ̆ng Ih, hngah kơ klei đăo diñu tuôm hmư̆ leh. Akâo Khua Yang yua kâo tui si êlan Ih čiăng, čiăng kơ kâo dưi đru hlăm bruă atăt phung klah đuĕ leh lŏ wĭt. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
