Klei Aê Diê Blŭ: I Y-Samuel 8:19-22
Êlan kliăng: “Ƀiădah mtrŭt hdơ̆ng diih grăp hruê êjai arăng pia “Hruê anei”, amâo čiăng kơ sa čô hlăm phung diih mâo ai tiê khăng kyua klei soh mplư.” (Hêbrơ 3:13)
Klei êmuh ksiêm mĭn: Ya ngă phung ƀuôn sang Israel ăt khăng ai tiê mơh hŏng klei Khua Yang hưn êlâo brei răng? Ya klei Khua Yang ngă leh hŏng klei phung ƀuôn sang Israel khăng ai tiê? Ya mta klei mñă kơ drei mơ̆ng klei hriăm anei?
Măng ai kơ ya klei Khua Yang hưn êlâo brei răng, phung ƀuôn sang Israel ăt khut khat akâo čiăng mjing sa čô mtao kiă kriê diñu. Drei ƀuh leh phŭn knhal atăt phung ƀuôn sang Israel truh kơ klei khăng ai tiê anei. Tal sa, diñu “hngah dôk hmư̆ asăp Y-Samuel” (êlan 19), boh sĭt gơ̆ diñu hngah amâo čiăng hmư̆ klei Khua Yang mtă ôh (êlan 7-8). Kčưm dơ̆ng kơ klei hroh trŭn klei hdĭp myang jing knuih bi kdơ̆ng hŏng Klei Aê Diê Blŭ nanao yơh. Sa klei mĭn mgao leh anăn bi kdơ̆ng, yap ñu pô yơh jing djŏ hĭn nanao, amâo gưt hlue ôh klei mtô mơ̆ng Yang Mngăt Jăk leh anăn mơ̆ng phung huĭ mpŭ kơ Aê Diê. Tal dua, diñu “čiăng kơ hmei msĕ mơh dưi jing msĕ si jih jang găp djuê mkăn” (êlan 20). Êjai phung ƀuôn sang Israel amâo čiăng mđing hmư̆ ôh Klei Aê Diê Blŭ, sĭt nik lăn ala srăng bi hmăi kơ diñu yơh. Tal tlâo, phung ƀuôn sang Israel čiăng diñu pô yơh čuăn ruah klei jing kơ klei hdĭp diñu pô, amâo čiăng kơ Khua Yang ôh, diñu čiăng ksiêm dlăng leh anăn gĭt gai jih jang bruă tui si diñu pô, wăt kơ mtao diñu čiăng mdơ̆ng (êlan 20)! Ai tiê khăng jing sa knhuang kčưm mơ̆ng klei bi kdơ̆ng hŏng Klei Aê Diê Blŭ, truh kơ klei wir anăp phă lăn ala, leh anăn knhal tuč dlăng kơ ñu pô yơh jing phŭn, jing khua yang kơ ñu pô! Kăp răng bĕ, brei čiêm rông leh anăn mkŏ mdơ̆ng klei hdĭp drei pô hŏng Klei Aê Diê Blŭ nanao, leh anăn yua Klei Aê Diê Blŭ kăp bi đru rŭ phung ayŏng amai adei (Hêbrơ 3:13).
Lŏ wĭt lač hŏng klei phung buôn sang Israel khăng ai tiê, Khua Yang lač kơ Y-Samuel: “Dôk hmư̆ bĕ asăp diñu, leh anăn mjing kơ diñu sa čô mtao” (êlan 22). Klei anei amâo djŏ jing klei Khua Yang čiăng ôh (êlan 7-9), ƀiădah knŏng Khua Yang brei klei dưi. Khua Yang amâo hlue klei čiăng soh čhuai phung ƀuôn sang ôh, ƀiădah tăp năng Khua Yang lui anak mnuih hdĭp hŏng boh jhat mơ̆ng klei diñu čuăn ruah.
Mâo sa klei hriăm brei drei thâo săng bi klă msĕ snei, boh tŭ mơ̆ng sa mta bruă amâo čuăn ôh bruă ngă anăn jing djŏ amâodah soh. Bruă phung ƀuôn sang Israel khut khat čiăng mâo sa čô mtao leh anăn êdei kơnăn mâo klei tŭ jing, amâo djŏ ôh mblang kyua klei diñu akâo jing djŏ. Bruă Aê Diê bi mtlaih Y-Abraham hlăk ñu blŭ luar kơ H’Sara (Klei Mphŭn Dơ̆ng 12:10-13) amâo djŏ ôh mblang bruă ñu kbiă đuĕ mơ̆ng čar Kanaan nao kơ čar Êjip leh anăn klei ñu blŭ luar jing djŏ. Kăp răng bĕ, đăm yap ôh boh tŭ dlăng msĕ si jăk siam mơ̆ng sa mta bruă ngă soh hŏng Klei Aê Diê Blŭ leh anăn mĭndah klei čuăn ngă êlâo kơnăn jing djŏ!
Êlan 21 brei ƀuh rup bi hmô mơ̆ng Y-Samuel, ñu tui duah klei atăt gai mơ̆ng Khua Yang nanao êlâo kơ lŏ wĭt lač hŏng phung ƀuôn sang. Ñu jing sa čô mnuih sĭt suôr hŏng klei Khua Yang mtă, tŭ ư jih hdră mgaih mkra mơ̆ng Khua Yang wăt tơdah ñu pô ruă ai tiê dưn mơh (êlan 22), kyua tŭ ư kơ Israel mâo sa čô mtao, ăt mblang jing bruă jao kơ ñu leh anăn kơ dua čô anak ñu mjưh ruê̆ mơh. Y-Samuel yap klei Aê Diê čiăng jing yuôm hĭn kơ klei khăp hlăm gŏ sang pô leh anăn wăt klei khăp kơ pô.
Kơ hlei pô drei kăp mđing hmư̆ čiăng čuăn ngă hŏng klei dleh dlan hlăm klei hdĭp?
Wah lač: Ơ Khua Yang, brei kâo hriăm mơ̆ng klei bi hmô Y-Samuel kơ jih jang klei čuăn ngă hlăm klei hdĭp kâo, akâo Khua Yang brei kâo thâo răng, huĭdah kâo lŏ êbat tui ai tiê khăng msĕ si phung ƀuôn sang Israel mphŭn dô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
