1 Xamuyees 8:19-22
Nqe cim:
“Nej ib leeg yuav tsum niaj hnub pab ib leeg thaum peb tseem hu tau hais tias, “Hnub No”; yog nej ua li ntawd, kev txhaum yuav ntxias tsis tau nej ib tug twg ua neeg tawv ncauj”(Henplais 3:13)
Lus nug rau sawvdaws xav:
– Vim li cas cov Yixalayees tseem tawv ncauj tabmeeg ntawm Vajtswv tej lus ceeb toom?
– Vajtswv tau ua dabtsi rau cov Yixalayees txoj kev tawv ncauj?
– Zaj kawm no ntuas peb yam dabtsi?
Cov Yixalayees tsis quav ntsej tus Tswv tej lus ceebtoom, lawv txiav txim siab tawv qhawv tsa ib tug vajntxwv rau lawv. Peb pom tej keebtiv uas coj cov Yixalayees mus rau txojkev tawv ncauj no. Tim ib, lawv “tsis mloog Xamuyees hais” (nqe 19), tseeb tiag mas yog lawv tsis mloog Vajtswv lus (nqe 7-8). Tus cwjpwm uas tawmtsam Vajtswv Txojlus yog qhov uas pib ua rau lawv sab ntsujplig puastsuaj zuj zus. Lub hlwb khavtheeb thiab ntxeev siab xav hais tias yus ibtxwm yog, tsis mloog raws li Vaj Ntsujplig qhia thiab cov uas hwm Vajtswv tej lus qhia. Tim ob, lawv xav tau ib tug vajntxwv “zoo ib yam li lwm haivneeg” (nqe 20). Thaum cov Yixalayees tsis mloog Vajtswv lus paub tseeb hais tias tej kev phem hauv lub ntiajteb no yuav cuamtshuam lawv. Tim peb, cov Yixalayees xav cim civ ua tus uas txiav txim siab rau yus lub neej tsis xav cia rau Vajtswv, lawv xav tshuaj xyuas thiab tswj tas txhua yam, leej tus vajntxwv uas lawv tsa los thiab (nqe 20)! Tawv ncauj yog ib ncua kev mus ua ntu zus pib ntawm kev tawmtsam Vajtswv Txojlus, tig mus rau lub ntiajteb, thiab thaum kawg saib yus tseemceeb, yus yog yus tus vajtswv! Yog li ntawd, yuav tsum ceev faj ua tib zoo tu thiab txhim kho yus lub neej los ntawm Vajtswv Txojlus thiab siv Vajtswv Txojlus los txhawb yus cov kwvtij txhua tus (Henplais 3:13).
Teb raws li cov Yixalayees txoj kev tawv ncauj, tus Tswv hais rau Xamuyees: “Koj cia li ua raws li lawv thov thiab tsa ib tug vajntxwv rau lawv” (nqe 22). Nov tsis yog tus Tswv dej siab (nqe 7-9), tiamsis tsuas yog ib qhov kev tso cai ntawm Nws xwb. Tus Tswv yeej tsis ua raws li nws haivneeg txoj kev ntshaw uas yuam kev, tiamsis qee zaus Nws cia lawv ua neej nrog rau tej nujnqis uas lawv twb tau txiav txim siab ua lawm.
Muaj ib zaj kawm uas peb cheem tsum zeem paub, ntawd yog qhov nqi zog uas tsis txiav txim siab xam txog ua ntej saib yog lossis txhaum hauv tes haujlwm ntawd. Qhov uas cov Yixalayees txiav txim siab tawv qhawv taij ib tug vajntxwv thiab tom qab ntawd tau raws li lawv taij, tsis tau txhais hais tias qhov kev taij no yog. Qhov uas Vajtswv cawm Anplahas thaum uas nws hais lus dag txog Xalas (Chivkeeb 12:10-13) tsis tau txhais hais tias qhov uas tso Kana-as tseg khiav mus rau Iziv thiab nws tej lus dag ces yog. Yuav tsum ceev faj, tsis txhob muab qhov kev xaus zoo ntawm tes haujlwm ua txhaum Vajtswv Txojlus los hais tias qhov kev txiav txim siab ua ntej ntawd ces yog!
Nqe 21 qhia pom Xamuyees tus qauv, nws ibtxwm mus cuag Vajtswv nrhiav Vajtswv kev coj ua ntej uas yuav ua ib yam dabtsi. Nws yog tus neeg ua ncaj ncees rau Vajtswv tej lus samhwm , txaus siab txais yuav li Vajtswv txoj kev txawm yuav mob siab los xij (nqe 22), yuav li cov Yixalayees taij kom muaj ib tug vajntxwv, ntawd txhais hais tias nws thiab nws ob tug tub tsis ua haujlwm ntxiv lawm. Xamuyees saib Vajtswv tus dej siab loj dua txoj kev hlub hauv tsev neeg thiab yus tus kheej.
Thov Vajtswv,
Vajtswv, thov pab nyuam yaus paub kawm Xamuyees tus qauv txog kev txiav txim siab rau nyuam yaus lub neej, thiab pab nyuam yaus tsis taug txoj qub kev tawv ncauj uas cov Yixalayees taug. Nyuam yaus tuav Tswv Yexus Khetos lub npe thov, Amees.
Peb pheej nyiam mloog leejtwg kom muaj txoj kev txiav txim siab rau tej teebmeem ntawm yus lub neej?
Nyeem Vajluskub hauv peb lub xyoos: 2 Xwmtxheej Vajntxwv 13
Kênh Youtube BHKTHN:
