Klei Aê Diê Blŭ: I Y-Samuel 8:1-6
Êlan kliăng: “Jao bĕ kơ Ñu jih jang klei uêñ hnĭng diih, kyuadah Ñu răng kriê kơ diih.” (I Y-Pêtrôs 5:7)
Klei êmuh ksiêm mĭn: Si klei bi hmăi kơ Y-Samuel êjai ñu tlă anăp hŏng klei ênguôt hlăm gŏ sang ñu pô leh anăn hlăm phung ƀuôn sang? Si klei ñu lŏ wĭt ngă? Ya klei hriăm kơ drei mơ̆ng klei Y-Samuel lŏ wĭt ngă?
Hdruôm hră I Y-Samuel kdrêč 7 mjưh ruê̆ hŏng klei klah čŭn bruă bŏ hŏng klei pap leh anăn boh tŭ dưn mơ̆ng Y-Samuel. Ƀiădah kdrêč 8 kčưm dơ̆ng hŏng klei yăl dliê ênguôt hlăm gŏ sang ñu leh anăn bruă jao kơ ñu. Jih klei truh anei amâo knŏng mjưh ruê̆ bruă Y-Samuel jing khua phat kđi ƀiădah wăt hlŏng mjưh ruê̆ ênuk phung khua phat kđi sui truh kơ hlăm brô 500 thŭn.
Klei ênguôt tal êlâo kbiă hriê mơ̆ng klei dua čô anak êkei Y-Samuel jing Y-Yôel leh anăn Y-Abija amâo hdĭp huĭ mpŭ kơ Aê Diê hlue si klei hdĭp ama diñu bi hmô ôh (êlan 1-3). Hĭn kơ jih jang pô mkăn, Y-Samuel ƀuh klă klei ruă ênguôt anei hlăm gŏ sang khua ngă yang prŏng Y-Hêli hlăk ñu dôk hđeh điêt. Sĭt nik ñu amâo čiăng ƀuh ôh klei jhat ƀai dua čô anak ñu pô tơdah ƀuh leh klei Aê Diê ƀuah mkra gŏ sang khua ngă yang Y-Hêli. Kyua klei anăn yơh ñu dôk hdĭp kpă ênô leh anăn huĭ mpŭ kơ Aê Diê kluôm jih klei hdĭp ñu leh anăn kluôm jih bruă jao ñu (I Y-Samuel 12:1-5). Ƀiădah lĕ, klei ñu amâo čiăng hĭn anăn yơh truh hĕ kơ ñu, bi ruă êka ai tiê ñu kjham snăk.
Klei ênguôt tal dua, msĕ hŏng jih jang mnuih mkăn, Y-Samuel ăt čang hmăng mơh čiăng mâo klei thâo săng brei leh anăn klei đru bi mđĭ ai mơ̆ng phung ƀuôn sang, êjai dôk găn klei ruă ênguôt hlăm gŏ sang. Ƀiădah klei ñu mă tŭ mơ̆ng phung mnuih ñu pioh leh kluôm jih klei hdĭp ñu khăp hơiêng, mă bruă atăt gai leh anăn săn asei, phung anăn yơh lŏ mbliư̆, bi kdơ̆ng hŏng klei ñu leh anăn phung anak ñu kiă kriê (êlan 5). Phung ƀuôn sang mâo phŭn knhal tơdah bi kdơ̆ng hŏng klei kiă kriê mơ̆ng dua čô anak Y-Samuel, kyua klei hdĭp diñu jhat ƀai, ƀiădah diñu čiăng hlŏng lui wăt Y-Samuel pô mơh, lačdah gơ̆ mduôn khua leh, amâo lŏ mâo ai ktang leh anăn klei thâo mĭn dưi kiă kriê diñu ôh. Hĭn kơnăn mơh, klei phung ƀuôn sang Israel akâo čiăng mâo sa čô mtao kơ diñu, brei ƀuh klei hdĭp myang diñu hroh trŭn leh, tơdah diñu bi kdơ̆ng hŏng klei Aê Diê kiă kriê hŏng phung khua phat kđi, kyuadah diñu čiăng tui hlue msĕ si jar khua kiă kriê phung ƀuôn sang tue (êlan 5, 7).
Dôk ti anăp klei ruă êka ai tiê mơ̆ng phung hlăm sang pô leh anăn mơ̆ng phung ƀuôn sang, Y-Samuel amâo kdŭn tluôn dôk hjăn păn kăp dôk mĭn kơ klei ruă ênguôt pô msĕ si khua ngă yang Y-Hêli ngă leh ôh, ñu ăt kăn nao ti anăp phung ƀuôn sang čiăng dŏng mgang kơ ñu pô rei. Ƀiădah ñu nao kơ Aê Diê čiăng kwưh akâo hŏng Ñu (êlan 6). Drei khăng mâo klei wĭt ngă amâo mơak ôh leh anăn čhuai tơdah tlă anăp hŏng klei ruă êka ai tiê kbiă hriê mơ̆ng phung drei khăp hơiêng ngă kơ drei, msĕ si mơ̆ng ung mô̆, anak aneh, găp djuê, leh anăn mơ̆ng ayŏng amai adei hlăm Phung Sang Aê Diê. Kyuanăn, nao mtam kơ Khua Yang êjai mmông msĕ snei, jing sa klei čuăn ngă thâo mĭn, čiăng đăm brei ôh ai tiê ênguôt hnĭng ngă bi hmăi truh kơ klei drei čuăn ngă, mbĭt hŏng klei anăn tui duah klei ktrâo atăt mơ̆ng Aê Diê.
Si drei khăng wĭt ngă tơdah tlă anăp hŏng klei ruă êka ai tiê hlăm gŏ sang leh anăn hlăm Phung Sang Aê Diê?
Wah lač: Ơ Khua Yang, bi mni kơ Khua Yang kyuadah êjai mmông mmăt tĭt hĭn hlăm klei hdĭp, hlăk jih jang mnuih klah đuĕ leh anăn lui kâo dôk hjăn, kâo ăt mâo leh Khua Yang jing Pô khăp kơ kâo, thâo săng kâo leh anăn kăp mđing hmư̆ klei kâo akâo nanao. Brei kâo nao mtam kơ Khua Yang kwưh akâo klei atăt gai mơ̆ng Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
