Mathiơ 21:23-27
“Đe mơ̆ng chrêu kơ đon, yua kơ dôm nơ̆r Sư bơtho gơh hơgei tơpă, ưh kơ thoi lu thây bơtho tơdrong juăt lu đe Juđê chă bơtho đe.” (Markôs 1:22)
Nơ̆r jet tơchĕng pơwao:
– Yua kơ liơ lu ‘bok soi tơm păng lu kră sek tơlang jet Kră Yang Yêsu gah tơdrong bu ăn gơh pơm?
– Kră Yang tơl lu sư thoi yơ?
– Bơ̆n yua iŏk ‘bai pơhrăm ‘nâu thoi yơ lăm tơdrong pơm kơdranh tơdrong lui?
Kơplah Kră Yang Yêsu mơ̆t tơ hnam akŭm păng bơtho đe, lu ‘bok soi tơm păng lu kră sek tơlang năm jet Yêsu: “Yêsu năm dơ̆ng tơ hnam akŭm ‘Bok Kei-Dei tơm wă bơtho đe tơ noh. Kơplah Sư oei bơtho đei lu ‘bok soi tih păng lu đe kră sek tơlang năm jet Yêsu thoi âu: Bu ăn kơ Ih pơpuh đe mơdro đơ̆ng hnam akŭm âu păng chă bơtho đe lăm hnam akŭm âu mơ̆n?” (trong 23 BTTHĐ). Lăm chăl Kră Yang Yêsu sơ̆, minh ‘nu bơngai gơh pơm tơdrong kiơ kiơ noh bơngai jang lăm kon pơlei đei hŏk jrŭ hlôh lơ păng adrĕch adrung dai đei bơ̆jang ‘mơ̆i. Hloh kơ noh dơ̆ng, wă kơ gơh jing bơngai chă bơtho bơngai ‘noh đei hŏk pơhrăm pơtơ̆p pơjuăt, gơh jô̆ păng đei bơngai nai wơh wă năm bơtho. Đe ưh kơ jô̆ Kră Yang Yêsu yua kơ đơ̆ng tơdrong tơproh tơdrong lui bơngai Juđê, kơlih kơ thoi noh lu sư jet Kră Yang gah tơdrong bu ăn kơ Ih gơh chă bơtho đe păng pơm tơdrong mơsêh hlĭch.
Adrol kơ Sư tơl nơ̆r lu ‘bok soi tơm păng lu kră sek tơlang, Kră Yang jet lu sư “Bĭ tơdrong Yôhan pơm kơ đe ‘Batem noh sơ̆ đơ̆ng bu ăn, đơ̆ng ‘Bok Kei-Dei dah đơ̆ng kon bơngai” (trong 25). Kư̆m thoi Kră Yang Yêsu, lu thây bơtho tơdrong juăt đe Juđê păng bơngai Pharisi ưh kơ jô̆ ôh, mălei kon pơlei lăp đon kơ Sư yua kơ lơ bơngai tơ Jêrusalem năm tơ sư athei sư pơm ‘Batem (Markôs 1:5). Lu ‘bok soi tơm păng lu đe kră sek tơlang lu sư kư̆m ưh kơ jô̆ kơ Yôhan ‘Batem mălei lu sư hli kơ kon pơlei thoi noh ưh kơ pơ̆n roi tơdrong ‘nâu ‘bơ̆p anăp kon pơlei “yua kơ đĭ đăng jơ̆p jang kơ lu kon pơlei pơla lu sư khan băt kơ Yôhan bơngai pơtruh nơ̆r ‘Bok Kei-Dei” (trong 26). Păng dah lu sư tơl khan “dah bơ̆n khan đơ̆ng ‘Bok Kei-Dei” lei na yua kơ kiơ lu sư ưh kơ lui đơ̆ng Yôhan bơtho gah kon triu ‘Bok Kei-Dei. Tuch luch lu sư rơih iŏk nơ̆r tơl wă kơ rơngei noh lu su khan lu sư ưh kơ băt. Lu sư jet ưh kơ sĭ wă băt gah Kră Yang mălei wă pơlong lăng Kră Yang thoi noh Sư kư̆m ưh kơ tơl ăn kơ lu sư băt đơ̆ng bu ăn gơh pơm tơdrong ‘nâu.
Lăm tơdrong jang ră roi kơdranh tơdrong lui, bơ̆n kư̆m ngăl tơ’bơ̆p hăm lu nơ̆r jet gah “tơdrong bu ăn gơh pơm”. Lu bơngai mă đĭ jơhngơ̆m chă wă kơ hlôh gô jet gah tơdrong tơpă ‘Bok Kei-Dei gah tơdrong đei dŏng pơklaih tơpă lăm anăn Kră Yang Yêsu. Gah pơlei ‘lơ̆ng, chăl arih ning mônh.v.v… mălei kư̆m ưh kơ đei tŏ sĕt bơngai pơgăn ngăl kơ apinh pơm anat dah tơhil, pơm kơ bơ̆n. Rok kơmĭl Kră Yang Yêsu, bơ̆n ‘nĕ kơ pơjah wă kơ jei hăm lu sư yua kơ lu sư ưh kơ wă kơ hlôh tơdrong tơpăt. Mălei hăm lu bơngai mă apinh jet wă kơ băt tơpă yua kơ lu sư ưh kơ hơđơ̆ng, dah mă oei đei tơ’bơ̆p tơdrong anat lăm tơdrong arih, bơ̆n kăl kơ tơgŭm lu sư hlôh gah tơdrong tơpăt wă lui sơng iŏk Kră Yang Yêsu pơm Kră Yang dŏng pơklaih chăl arih sư. Bơ̆n đei nơ̆r ‘Bok Kei-Dei tơbăt ăn kơ bơ̆n pơm păng Yang Bơhngol ‘Lơ̆ng bơih tơdrong pran. Thoi noh athei pơ̆n nuih, pran ră roi Anăn Kră Yang hăm tơdrong Kră Yang ăn kơ bơ̆n.
Ơ Kră Yang, apinh Ih ăn kơ inh ling lang băt kơ tơdrong kiơ Ih ăn gơh pơm gah bơhngol wă tơ’bôh lăm tơdrong arih inh rim năr hăm lu bơngai jum dăr, păng băt tơ’bôh ăn tơdrong dŏng pơklaih ăn kơ lu bơngai tam mă băt kơ Ih. Yua anăn Kră Yang Yêsu Krist, Amen.
Bơ̆n hăm đei jơhngơ̆m pran adrin ră roi tơdrong Kră Yang ăn kơ bơ̆n gơh pơm gah bơhngol ưh?
Tơgŭm lu bơngai arih ưh kơ hơđơ̆ng
Băt mơ̆ng Kră Yang mơnat ăn kơ bơ̆n
Tơdrong mơsêh Kră Yang dŏng pơklaih gah bơhngol
Hor ba đơ̆ng tơdrong hiong răm ding năm kiơ̆ hăm tơdrong ‘mêm ‘Bă
Đŏk Sơ̆p Hla bơar ‘Bok Kei-Dei lăm pêng sơnăm: II Pêtrôs 2
Kênh Youtube BHKTHN:
