Klei Aê Diê Blŭ: Klei Mphŭn Dơ̆ng 1:6-8
Êlan kliăng: “Phung adiê yăl dliê klei guh kơang Aê Diê; leh anăn êngĭt hưn bruă kngan Ñu.” (Klei Mmuñ Hđăp 19:1)
Klei êmuh ksiêm mĭn: Hlăm hruê tal dua, ya dŏ Aê Diê hrih mjing? Klei hrih mjing anăn hưn ya klei kơ Aê Diê leh anăn kơ hdră Ñu? Ya klei hriăm drei mă kơ drei pô?
Hlăm hruê tal dua, Aê Diê mjing sa “anôk êhŏng”, pia jing “adiê”. Aê Diê mjing anôk êhŏng anăn hŏng klei bi kah êa ti gŭ mơ̆ng êa ti dlông anôk êhŏng. Tơdah mâo leh adiê, lăn ala mâo klei bi lŭk lăk leh anăn guôm hŏng êa (êlan 2). Hŏng klei bi kah anei lăn adiê jing jăk leh anăn mâo anôk pioh rông klei hdĭp. Leh anăn lŏ sa blư̆ msĕ si drei ƀuh leh hlăm klei hrih mjing, Aê Diê ngă klei yuôm bhăn anei knŏng hŏng klei Ñu blŭ. Klei blŭ Aê Diê bi leh hdră leh anăn klei Ñu kñăm čiăng.
Êa ti gŭ adiê čiăng lač kơ êa ksĭ, êa krông, êa ênao. Êa hlăm adiê čiăng lač kơ êa hlăm knam, êwa êa hŭl. Êa ti dlông leh anăn êa ti gŭ mjing hnoh êa đoh nanao amâo mâo mdei čiăng rông leh anăn djă pioh klei hdĭp ti lăn ala. Hlăm anăn adiê brei angĭn bi êwa, brei adiê bi mlih nanao tui si yan. Jih jang klei anei bi êdah hdră thâo mĭn leh anăn jăk Pô Hrih Mjing. Tơdah dlăng amâodah blŭ djŏ kơ adiê, drei dưi lač mđrăm mbĭt hŏng Mtao Đawit snei: “Phung adiê yăl dliê klei guh kơang Aê Diê; leh anăn êngĭt hưn bruă kngan Ñu” (Klei Mmuñ Hđăp 19:1).
Ksiêm mĭn kơ klei Aê Diê hrih mjing adiê, amâo djŏ drei knŏng brei klei guh kơang kơ Aê Diê kyua bruă myang Ñu ngă leh ôh, ƀiădah wăt ƀuh Aê Diê jing Aê Diê kơ klei djŏ pruê̆ mơh. Amâo djŏ Ñu knŏng mjing mơ̆ng mnơ̆ng amâo mâo jing mâo ôh, ƀiădah wăt ñu bi kah čiăng mjing klei bi lŭk lăk jing bi kdrăng, djŏ pruê̆, mâo klei tŭ, leh anăn mâo klei kñăm čiăng mơh. Aê Diê bi kah êa mơ̆ng êa čiăng mjing adiê, anôk yăl dliê klei guh kơang Ñu. Tui si klei mblang hlăm klei hdĭp myang, drei jing dŏ Aê Diê, Aê Diê bi kah drei msĕ mơh mơ̆ng klei soh jhat lăn ala msĕ si Klei Aê Diê Blŭ lač leh snei: “Ơ phung kâo khăp ơi, kyuadah drei mâo klei ƀuăn anăn, brei drei bi doh hĕ drei pô mơ̆ng jih klei čhŏ mrŏ hlăm kđeh leh anăn mngăt, leh anăn bi klă klei doh jăk drei hlăm klei huĭ mpŭ kơ Aê Diê” (II Kôrantô 7:1). Msĕ si adiê hưn bruă kngan Aê Diê, phung ƀuôn sang Aê Diê hdĭp ti lăn ala ƀiădah bi kah leh mơ̆ng klei soh lăn ala čiăng hưn klei jăk Aê Diê kơ jih jang mnuih.
Ya mnơ̆ng hlăm klei hdĭp drei brei drei bi kah hĕ čiăng bi êdah klei guh kơang Aê Diê?
Wah lač: Ơ Khua Yang, kâo bi mni kơ Ih kyuadah Ih bi kah leh êa ti dlông leh anăn êa ti gŭ čiăng mjing sa boh lăn jăk leh anăn siam pioh kơ kâo hdĭp hŏng klei hơ̆k mơak hruê anei. Lač jăk kơ Ih kyuadah Ih brei mâo djăp mta mnơ̆ng ti gŭ adiê. Brei klei hdĭp kâo bi kah hĕ mơ̆ng jih jang klei soh jhat lăn ala čiăng bi êdah klei Ih hrih mjing jăk siam leh anăn djŏ pruê̆. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
