Chivkeeb 1:6-8
Nqe cim:
“Saum nruab ntug twb ua rau peb pom Vajtswv lub hwjchim tseeb, thiab qhia tes haujlwm uas nws ua tiav lawm rau peb paub” (Ntawv Nkauj 19:1)
Lus nug rau sawvdaws xav:
– Hnub tim ob, Vajtswv tau tsim yam dabtsi?
– Kev tsim txhua yam li ntawd qhia tshwm dabtsi txog Vajtswv thiab Nws lub homphiaj?
– Peb kawm tau yam dab tsi hauv zaj no?
Hauv hnub tim ob, Vajtswv tsim muaj “lub ntuj”. Lub ntuj ntawd tau tsim los ntawm qhov uas cais dej nyob sab saud nruab ntug thiab dej nyob sab hauv. Ua ntej muaj lub ntuj, lub ntiajteb tsis tau muaj dabtsi thiab nyob do dus, tsaus ntuj nti thoob plaws saum nplaim dej (nqe 2). Los ntawm qhov kev sib cais no, lub ntiajteb dhau los nyob muaj quas thiab yog qhov chaw uas yug txhua yam muaj sia. Peb yeej pom hauv Vajtswv kev tsim txhua yam, Vajtswv tsim tau tej ntawd los ntawm Nws lo lus hais xwb. Vajtswv lo lus hais ua tiav Nws kev npaj tseg thiab muaj raws li Nws lub homphiaj.
Dej nyob hauv qab ntuj yog hais txog hiavtxwv, dej ntws thiab tej pasdej tauv. Dej nyob saum lub ntuj yog hais txog cov dej uas nyob saum fuab cua, saum tej tauv fuab saum ib nta ntuj uas ua nag los rau ntiajteb. Dej nyob saud thiab dej hauv qab ntuj tau ncig kiv mus los tsis tseg, kom yug tau txhua yam muaj sia hauv lub ntiajteb no. Saum lub ntuj pub muaj pa cua, ua rau tej fuab cua hloov mus raws caij nyoog. Tagnrho txhua yam no qhia tshwm lub homphiaj txawj ntse thiab zoo kawg nkaus ntawm tus Tswv uas tsim ib puas tsav yam. Thaum saib lossis hais txog lub ntuj, peb yuav ua twjywm tsis tau li, peb yeej yuav tib txhij koom nrog Daviv tawm suab hais tias: “Saum nruab ntug twb ua rau peb pom Vajtswv lub hwjchim tseeb, thiab qhia tes haujlwm uas Nws ua tiav lawm rau peb paub” (Ntawv Nkauj 19:1).
Xav txog Vajtswv tes haujlwm tsim lub ntuj, tsis yog qhuas Vajtswv txog Nws lub hwjchim tsim txhua yam xwb, tiamsis peb tseem pom Vajtswv yog tus Tswv ntawm kev tswj kav txhua yam nyob muaj quas. Vajtswv tsis yog tsim yam tsis muaj dhau los ua yam uas muaj xwb, tiamsis Nws tseem cais txhua yam nyob muaj quas, muaj qab hau thiab homphiaj. Vajtswv cais dej thiab dej kom tsim muaj lub ntuj, tej ntawd niaj hnub qhia tshwm Vajtswv lub koob meej. Hauv lub ntsiab sab ntsujplig, Vajtswv kuj muab peb cov uas yog Nws menyuam cais tawm ntawm tibneeg ntiajteb uas muaj kev txhaum los qhia tshwm txog Vajtswv Txojlus rau tibneeg ntiajteb: Yog li ntawd, cov ntseeg Yexus yuav tau ua li Vajtswv Txojlus qhia hais tias; “Cov kwvtij uas kuv hlub, Vajtswv twb coglus li no rau peb lawm. Yog li ntawd, peb yuav tsum ua neeg zoo kawg nkaus thiab paub ntshai Vajtswv. Peb yuav tsum tso plhuav tej kev txhaum uas peb ua thiab peb xav huv tibsi tseg” (2 Kauleethaus 7:1). Vajtswv cov me nyuam nyob hauv lub ntiajteb tiamsis tau cais tawm ntawm kev txhaum uas tibneeg ntiajteb pheej ua, kom qhia pom txog Vajtswv lub hwjchim rau tibneeg txhua tus.
Thov Vajtswv,
Vajtswv, nyuam yaus ua Koj tsaug, vim Koj tau cais dej saum nruab ntug thiab hauv hiav txwv, kom lub ntiajteb nyob muaj quas thiab txhua yam nyob muaj sia. Ua Vajtswv tsaug uas Koj pub muaj txhua yam hauv lub qab ntuj no. Thov cia nyuam yaus lub neej cais tawm ntawm tej yam phem uas neeg ntiateb pheej ua, kom qhia tshwm yam zoo ntawm Koj rau tibneeg ntiajteb. Nyuam yaus tuav Tswv Yexus Khetos lub npe thov, Amees.
Peb cov ntseeg yuav cais tawm yam dab tsi kom qhia tshwm Vajtswv lub hwjchim?
Nyeem Vajluskub hauv peb lub xyoos: Pajlug 27
Kênh Youtube BHKTHN:
