Blŭng a 1:2-5
2 Teh ưh kơ đei hơbŏ păng ưh kơ đei kiơ lăm noh, tơ jơ̆p-jang oei măng mu ngăl, Yang Bơhngol ‘Lơ̆ng Kră Yang ‘Bok Kei-Dei asơ̆ng kơpal đak. 3 Kră Yang ‘Bok Kei-Dei khan thoi âu: “Athei đei hơdah,” na đei hloi hơdah;a4 Kră Yang ‘Bok Kei-Dei ‘bôh tơdrong hơdah noh ‘lơ̆ng, na klah asong hơdah hăm măng mu. 5 Kră Yang ‘Bok Kei-Dei anăn hơdah noh “Kơ’năr”; măng mu noh “Kơmăng”. Thoi noh đei kơsơ̆ păng pơgê; noh jơ̆ năr mă mônh.
Trong tơm ‘bai pơhrăm ‘nâu:
“Kră Yang ‘Bok Kei-Dei anăn hơdah noh Kơ’năr; măng mu noh Kơmăng. Thoi noh đei kơsơ̆ păng pơgê; noh jơ̆ năr mă mônh.” (Blŭng a 1:5)
Nơ̆r jet tơchĕng pơwao:
– Adrol kơ đei hơdah, plĕnh teh jơ noh sơ̆ thoi yơ?
– Kră Yang ‘Bok Kei-Dei đei pơjing măng mu păng hơdah noh sơ̆ liơ?
– Tơdrong pơjing kơ’năr păng kơmăng đei gĭt kiơ hăm bơ̆n?
Kơkuh kơ đĭ đăng,
Sơ̆p Hla bơar ‘Bok Kei-Dei đei tơbăt Kră Yang ‘Bok Kei-Dei pơjing plĕnh teh mălei lu bơ̆n ưh kơ băt hơđăl tơdrong pơjing ‘nâu thoi yơ. Mă khan lei Sơ̆p Hla bơar ‘Bok Kei-Dei đei chih roi lê̆ blŭng a teh ưh kơ đei hơbŏ păng ưh kơ đei kiơ lăm noh, tơ jơ̆p jang oei măng mu ngăl (trong 2). Noh bơih thoi lĕ rup pơma kơ plĕnh teh rŭng răng, teh jang sa hrĕng kro pă wơ̆ jing păng ưh kơ đei arih. Lăm jơ ‘noh lei na “Yang ‘Bok Kei-Dei bơ̆jang” păng tuch luch lu bơ̆n đei minh pôm kơtuăl teh ‘lơ̆ng thoi âu, tih să dah bơ̆n đei ‘măn jơ lăng tơmang ‘bôh anih ‘lơ̆ng rŏ ‘Bok Kei-Dei pơjing, lơ bơngai lăng hlĭch tơdrong noh.
Năr blŭng a tơdrong pơjing hơmet plĕnh teh, Kră Yang ‘Bok Kei-Dei pơjing hơdah hăm nơ̆r Sư sơkat đĕch. Sư khan asong hơdah hăm măng mu, na anăn hơdah noh “kơ’năr” păng măng mu noh “kơmăng”. Đei bơngai mơ’nah khan tơdrong hơdah đei đơ̆ng yơ kơplah truh năr mă pêng Kră Yang ‘Bok Kei-Dei ‘nao pơjing lu măt ‘năr măt khei păng lu sơnglŏng. Bơ̆n athei kăl kơ băt Kră Yang ‘Bok Kei-Dei bơih hơdah ling lang, păng lăm Dêh char Sư ling lang. Lu bơ̆n ưh pă kăl tơdrong hơdah nai dơ̆ng. “Pơlei noh ưh kơ kăl kơ măt ‘năr dah khei pơchrang hơdah ăn ôh, yua kơ tơdrong mơsêh ‘Bok Kei-Dei hăm Kon Triu pơchrang ăn hơdah boih.” (Tơdrong Tơ’bôh 21:23; 22:5). Kơplah măng mu gom lê̆ đĭ, Yang ‘Bok Kei-Dei noh bơih Yang Yang Bơhngol ‘Lơ̆ng bơ̆jang, păng nơ̆r Sư đei khan Pêng Anăn Yang đei pơjing hơdah. Pêng Anăn Yang ‘Bok Kei-Dei bơ̆jang hơdai wă pơjing hơdah păng măng mu, wă pơjing đơ̆ng teh ưh kơ đei hơbŏ păng ưh kơ đei kiơ lăm noh na jing ‘lơ̆ng rŏ, tih să.
Đei minh tơdrong ‘lơ̆ng dêh ưh kơ sĭ ‘Bok Kei-Dei dan anăn hơdah đĕch ôh. Mălei Sư kư̆m krao anăn măng mu mơ̆n. Mă khan pơma gah bơhngol, hơdah hăm Yang kơnê̆ păng jang tơdrong kơnê̆. Mălei lăm tơdrong Kră Yang pơjing, mă tơdrong hơdah păng măng mu: “Kơ’năr krao pơtơm bơ̆n bơ̆jang păng sơng iŏk tơdrong arih, kơmăng tơ’blŏk kơ bơ̆n hơmet lê̆ hnam tuch luch lu bơ̆n. Kơ’năr krao pơtơm lu bơ̆n pơdơh lăm Kră Yang, kơmăng khă lu bơ̆n athei weh đơ̆ng măng mu ling lang”.
Lu bơ̆n pôm đon lăm tơdrong krao khan,
Kơkuh kơ Ih Kră Yang, Ih bơih tơdrong hơdah ling lang, jơ̆ Tơ’ngla pơjing ‘lơ̆ng rŏ, apinh Ih tơgŭm inh băt yua jơ năr rim năr lăm chăl arih đei yua kơ Kră Yang. Păng kơplah kơmăng, apinh Ih tơgŭm inh băt lăng lăng wă kơ huay kơ hiơt bơnê kơ Kră Yang yua kơ đĭ đăng tơdrong pŭn hiôk mă Kră Yang đei ăn kơ chăl arih inh. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Lu bơ̆n hăm đei tơdrong ‘lơ̆ng Kră Yang rim năr, rim kơmăng Kră Yang ăn kơ bơ̆n thoi yơ?
Kơ’năr bơ̆jang pơnam
Kơmăng pơdơh gleh glăn gô hlôi tĕnh
Kră Yang ăn hơdah ‘lơ̆ng rŏ
Ăn pŭn hiôk tih ‘bĕnh blai
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 17
Kênh Youtube BHKTHN:
