Chivkeeb 1:2-5
Nqe cim:
“Vajtswv tis npe rau qhov pom kev hu ua “Nruab hnub” thiab qhov tsaus ntuj hu ua “Hmo ntuj.” Muaj caij tsaus ntuj thiab muaj caij kaj ntug, yog hnub ib.” (Chivkeeb 1:5)
Lus nug rau sawvdaws xav:
– Ua ntej muaj qhov kaj, lub ntiajteb nyob zoo li cas?
– Vajtswv tau tsim qhov tsaus thiab qhov kaj li cas?
– Kev tsim nruab hnub thiab hmo ntuj muaj qabhau li cas rau peb?
Vajluskub qhia paub hais tias Vajtswv yog tus uas tsim lub ntuj lub teb, tiamsis peb tsis paub meej hais tias txojkev tsim ntawd tshwmsim zoo li cas. Txawm li ntawd los, Vajluskub kuj piav qhia tias lub ntiajteb thaum chiv thawj “tsis tau muaj dabtsi thiab nyob do dus, tsaus ntuj nti thoob plaws saum nplaim dej hiavtxwv” (nqe 2). Ntawd yog ib daim duab qhia txog kev ntxhov quav niab, nyob do dus, thiab tsis muaj qhov ciaj sia. Thaum ntawd, “Vajtswv tus ntsujplig yuj mus yuj los” thiab thaum kawg, peb thiaj muaj lub ntiajteb zoo nkauj, loj siab uas txhua zaus peb tau pom tej toj roob hauv pes ua rau peb xav tsis thoob tias ua cas yuav zoo nkauj npaum ntawd.
Thawj hnub uas tsim lub ntuj lub teb, Vajtswv tau tsim qhov kaj los ntawm Nws Txojlus. Nws faib qhov kaj tawm ntawm qhov tsaus, thiab muab qhov kaj hu ua “nruab hnub”, qhov tsaus hu ua “hmo ntuj”. Muaj qee leej nug hais tias: Qhov kaj ntawd tshwm qhov twg los, vim txog hnub tim plaub Vajtswv thiaj tsim tej hnub, hli thiab hnub qub? Peb yuav tsum nco ntsoov hais tias Vajtswv tus kheej yog qhov kaj mus ib txhis, thiab nyob hauv Nws lub Tebchaws, peb tsis cheemtsum lwm qhov kaj rau qhov “Vajtswv lub tshwjchim yeej ci ntsa iab tuaj rau hauv, thiab tus menyuam Yaj yog lub teeb uas ci rau sawvdaws pom kev” (Tshwmsim 21:23; 22:5). Thaum qhov tsaus tseem laum txhua qhov, Vajtswv tus ntsujplig uas yog Vaj Ntsuj Plig yuj mus yuj los, thiab Vajtswv lo lus hais uas yog Txojlus tsim muaj qhov kaj. Vajtswv Vaj Peb Leeg koom tes tsim muaj qhov kaj thiab qhov tsaus, kom hloov tau lub ntiajteb uas tsis muaj dabtsi, ntxhov quav niab los ua lub ntiajteb uas zoo nkauj xav tsis thoob.
Muaj ib qho lomzem heev uas yog Vajtswv tsis yog tsuas tis npe rau qhov kaj xwb, tiamsis Nws tseem tis npe rau qhov tsaus thiab. Nyob rau hauv sab ntsujplig, qhov kaj feem ntau sawv cev rau tej yam zoo, thiab qhov tsaus sawv cev rau dab, kev phem thiab kev txhaum. Tiamsis nyob rau hauv Vajtswv kev tsim, tagnrho qhov kaj thiab qhov tsaus, nruab hnub thiab hmo ntuj puav leej zoo thiab muaj qabhau huv tibsi. Kws xibhwb Charles Spurgeon tau sau zog txog qhov no li no: “Nruab hnub nqua hu peb ua haujlwm thiab ua neej txaus siab; hmo ntuj qhia peb npaj rau lub tsev kawg ntawm tus kheej. Nruab hnub nqua hu peb ua haujlwm rau tus Tswv, hmo ntuj nqua hu peb los so hauv Nws. Nruab hnub nqua hu peb tig nrhiav hnub nyob ntev mus ibtxhis, hmo ntuj ceebtoom peb tawm hauv qhov tsaus ntuj uas tsis kawg los.”
Thov Vajtswv,
Vajtswv uas yog qhov kaj mus ib txhis, yog Tus Tsim txhua yam uas zoo, thov pab nyuam yaus paub siv txhua hnub hauv lub neej los ua haujlwm tawg paj txi txiv rau Koj. Thiab thaum tsaus ntuj los txog, thov pab nyuam yaus nco ntsoov tig rov ntsia kom paub ua Koj tsaug rau txhua yam koob hmoov uas Koj tau pub rau nyuam yaus lubneej. Nyuam yaus tuav Yexus Khetos lub npe thov, Amees.
Peb tabtom txais yuav tej yam zoo ntawm Vajtswv txhua hnub, txhua hmo licas?
Nyeem Vajluskub hauv peb lub xyoos: I Xwmtxheej Vajntxwv 17
Kênh Youtube BHKTHN:
