Klei Aê Diê Blŭ: Klei Mphŭn Dơ̆ng 1:2-5
Êlan kliăng: “Aê Diê pia klei mngač “hruê”, leh anăn ñu pia klei mmăt “mlam”. Mâo tlam leh anăn mâo aguah, jing hruê tal sa.” (Klei Mphŭn Dơ̆ng 1:5)
Klei êmuh ksiêm mĭn: Êlâo kơ mâo klei mngač, si boh klei lăn ala jing? Si Aê Diê hrih mjing leh klei mmăt leh anăn klei mngač? Si klei yuôm bhăn hŏng drei kơ klei Aê Diê hrih mjing hruê leh anăn mlam?
Klei Aê Diê Blŭ brei thâo Aê Diê hrih mjing lăn ala, êngĭt adiê ƀiădah drei amâo thâo klă ôh kơ jih klei anăn. Wăt tơdah snăn dưn, Klei Aê Diê Blŭ ăt lač kơ boh klei dlông rŏng lăn ênuk mphŭn dơ̆ng jing “Lăn ala mâo klei lŭk lăk leh anăn êhŏng, klei mmăt guôm ti dlông ƀăng êlam” (êlan 2). Anăn jing rup mơ̆ng klei lŭk lăk, êhŏng leh anăn amâo mâo klei hdĭp ôh. Ti krah klei anăn snăn mâo “Mngăt Myang Aê Diê krăm ti dlông êlah êa”, leh anăn knhal tuč drei mâo sa boh lăn jăk siam, prŏng snăk tơdah grăp čô drei dlăng kơ čư̆ čhiăng, dliê kmrơ̆ng mnơ̆ng dhơ̆ng, grăp čô ƀuh bi kngăr snăk kơ klei jăk siam.
Hruê tal êlâo mơ̆ng bruă hrih mjing jing mkra rup lăn ala leh anăn êngĭt adiê, Aê Diê hrih mjing leh klei mngač hŏng asăp Ñu blŭ. Ñu bi kah klei mngač mơ̆ng klei mmăt, bi anăn kơ klei mngač jing “hruê” leh anăn klei mmăt jing “mlam”. Đa đa mnuih lač, mơ̆ng klei mngač kbiă hriê hlăk êjai truh hruê tal pă kơh Aê Diê hrih mjing yang hruê, mlan leh anăn phung mtŭ. Brei drei thâo Aê Diê jing klei mngač hlŏng lar, leh anăn hlăm Lăn Adiê hlŏng lar Ñu, drei amâo lŏ čiăng kơ klei mngač mkăn ôh “kyuadah klei guh kơang Aê Diê bi mngač ƀuôn anăn, leh anăn Êđai Biăp jing pui kđen kơ ñu” (dlăng Klei Bi Êdah 21:23; 22:5). Hlăk êjai klei mmăt guôm, Mngăt Myang Aê Diê jing Yang Mngăt Jăk krăm ti dlông êlah êa leh anăn Klei Ñu blŭ jing Klei Blŭ hrih mjing klei mngač. Aê Diê Tlâo Čô Yang hrăm mbĭt mă bruă čiăng hrih mjing klei mngač leh anăn klei mmăt, čiăng bi mlih sa boh lăn lŭk lăk êhŏng jing jăk siam, prŏng prĭn.
Mâo sa klei yuôm bhăn jing Aê Diê amâo djŏ knŏng bi anăn kơ klei mngač ôh ƀiădah Ñu lŏ bi anăn kơ klei mmăt. Wăt tơdah hlăm klei mblang klei hdĭp mngăt, klei mngač khăng mâo klei mblang jăk, mdê hŏng klei mmăt khăng djŏ tuôm kơ yang jhat leh anăn bruă ngă klei soh. Ƀiădah hlăm klei Aê Diê hrih mjing, wăt klei mngač leh anăn klei mmăt, jih hruê leh anăn mlam jăk siam sơăi, yuôm bhăn sơăi. Khua pô mtô
Charles Spurgeon klah čŭn klei anei snei: “Yang hruê brei drei mă bruă leh anăn mơak hlăm klei hdĭp, mlam mñă kơ drei mprăp kơ boh sang knhal tuč kơ pô. Yang hruê brei drei mă bruă kơ Khua Yang, mlam brei drei đih mdei hlăm Ñu. Yang hruê brei drei tui duah hruê dôk nanao hlŏng lar, mlam hưn brei drei răng tlaih kơ mlam mmăt hlŏng lar”.
Si drei dôk hdĭp hŏng klei jăk Aê Diê hlăm grăp hruê, grăp mlam Aê Diê brei kơ pô?
Wah lač: Ơ Aê Diê jing klei mngač hlŏng lar, jing Pô Hrih Mjing jăk snăk, akâo kơ Ih đru kâo thâo yua grăp hruê hlăm klei hdĭp čiăng mâo boh tŭ dưn kơ Ih. Leh anăn grăp mlam truh, akâo kơ Ih đru kâo lŏ dlăng wĭt čiăng amâo wơr bi mni kơ Ih kyua jih jang klei jăk mơak Ih brei kơ klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
