Klei Aê Diê Blŭ: Galati 5:19-21
Êlan kliăng: “Bruă mơ̆ng kđeh bi êdah klă leh: klei knhông, klei čhŏ mrŏ, klei knhŭk knhul” (Galati 5:19)
Klei êmuh ksiêm mĭn: Ya bruă ngă mơ̆ng kđeh Khua ƀĭng kna Y‑Pôl čih leh? Ya ngă ñu lač kơ bruă anăn bi êdah klă leh? Ya klei brei drei ngă čiăng amâo lĕ ôh hlăm bruă ngă mơ̆ng hđeh?
Leh bi trông kơ hdră arăng dưi yua klei êngiê pô mâo leh, Khua ƀĭng kna Y‑Pôl čih dŭm bruă bi êdah klă mơ̆ng kđeh. Êpul tal êlâo, hdĭp hlue si kđeh jing hlue ngă ya klei kđeh knhông čiăng: tlĕ piu, čhŏ mrŏ, knhŭk knhul. Amâo msĕ si ala ƀuôn ênuk đưm phưi tha kơ klei ngă knhông, Khua ƀĭng kna Y‑Pôl mtô klei amâo doh jăk hlăm klei bi dôk êkei mniê jing klei soh kjham snăk, hlăk êjai hdĭp doh jăk jing bruă ngă kkuh mpŭ bi mơak kơ Khua Yang (Rôm 12:1).
Êpul bruă ngă mơ̆ng kđeh tal dua djŏ tuôm kơ klei kkuh mpŭ: klei kkuh rup yang, klei jing mjâo. Kkuh kơ rup yang lač kơ klei kkuh kơ mnơ̆ng dhơ̆ng hrô kơ kkuh kơ Aê Diê. Klei amâo djŏ jing nô năng brei kkuh mpŭ kơ Aê Diê leh anăn dlăng mnơ̆ng dhơ̆ng jing kdrăp mnơ̆ng yua, snăn lu mnuih lŏ kkuh kơ mnơ̆ng dhơ̆ng hrô kơ kkuh mpŭ kơ Aê Diê.
Êpul bruă ngă mơ̆ng kđeh tal tlâo jing djŏ tuôm kơ knuih hdĭp hŏng pô mkăn: klei bi roh, klei bi msao, klei nač, klei čôñ ăl, klei čuôt klih, klei bi tăng, klei mĭn bi kah phung. Anei jing dŭm bruă ngă klei bhiăn amâo kăm ôh, kyua anăn drei ênưih snăk dlăng hơăi mang. Boh jhat jing drei brei klei bi kah phung, klei bi roh mâo hlăm klei bi mguôp gŏ sang leh anăn Phung Sang Aê Diê. Khua ƀĭng kna Y‑Pôl dưm diñu hlăm bruă ngă mơ̆ng kđeh êdei kơ klei kkuh kơ rup yang.
Êpul bruă ngă mơ̆ng kđeh tal pă djŏ tuôm kơ klei djŏ hnơ̆ng: klei tluh, klei kpiê ruă, klei ră huă mnăm. Klei kpiê ruă jing nanao klei hlăm Klei Aê Diê Blŭ hưn brei răng (Klei Bi Hriêng 20:1; 23:29-35; Y‑Êsai 28:7; Y‑Ôsê 4:11). Khua ƀĭng kna Y‑Pôl mtô: “Đăm kpiê ruă ôh, kyuadah klei anăn bi mbŭk diih…” (Y‑Êphêsô 5:18). Mnơ̆ng ƀơ̆ng huă čiăng kơ klei hdĭp, leh anăn jing mnơ̆ng Aê Diê brei kơ drei mơak yua (Khua Pô Mtô 5:18). Khădah snăn, huă mnăm êgao hnơ̆ng jing bruă ngă mơ̆ng kđeh. Tơdah êgao hnơ̆ng, ya klei amâo kăm dưn mơh ăt jing klei soh mơh.
Khua ƀĭng kna Y‑Pôl lač “bruă mơ̆ng kđeh bi êdah klă leh” kyua anăn ñu knŏng bi hmô dŭm mta bruă ngă mơ̆ng knuih klei soh ngă, leh anăn lač thiăm, “leh anăn jih jang klei msĕ snăn” (êlan 21). Tơdah sa čô mnuih êbat hlue si Yang Mngăt Jăk leh anăn mđing kơ klei Yang Mngăt Jăk khăp snăn pô anăn srăng pral thâo hŏng bruă Yang Mngăt Jăk amâo khăp. Klei bi mguôp hŏng Khua Yang jing mta phŭn čiăng kơ drei amâo hlue ngă ôh bruă ngă mơ̆ng kđeh.
Knhal jih êlan 21, Khua ƀĭng kna Y‑Pôl lač hlei pô ngă bruă soh msĕ snăn amâo dưi dưn Ƀuôn Ala Mtao Aê Diê ôh. Boh blŭ “ngă soh” hlăm boh blŭ phŭn lač kơ sa bruă ngă hlue si klei mưng. Kyua anăn, tinei ñu amâo lač kơ sa dua blư̆ ngă soh bruă anei ôh, ƀiădah lač kơ klei mưng ngă bruă tui si kđeh čiăng jing bruă ngă mơ̆ng mnuih hđăp, ka dưi lŏ bi mrâo leh anăn amâo kmhal ôh klei soh. Akâo kơ Khua Yang bi mlih klei hdĭp grăp čô drei čiăng amâo lĕ ôh hlăm klei soh mơ̆ng kđeh.
Drei čiăng mâo Yang Mngăt Jăk đru lui ya bruă ngă mơ̆ng kđeh?
Wah lač: Ơ Yang Mngăt Jăk, kâo thâo kâo êdu awăt, amâo kluôm dhuôm. Akâo kơ Ih đru kâo êbat tui hlue Ih grăp hruê čiăng mâo klei dưi lăm lui ya bruă ngă mơ̆ng kđeh, hdĭp bi mơak kơ Ih nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
