Klei Aê Diê Blŭ: Klei Bi Hriêng 24:15-16
Êlan kliăng: “Kyuadah wăt tơdah sa čô mnuih kpă lĕ buh kjuh blư̆, ñu ăt lŏ kgŭ mơh, ƀiădah klei knap mñai srăng bi rai phung ƀai” (Klei Bi Hriêng 24:16)
Klei êmuh ksiêm mĭn: Mtao Salômôn bi hriăm anak ñu ya klei gơ̆ amâo dưi ngă kơ mnuih kpă? Ya jing boh tŭ dưn knhal tuč kơ mnuih kpă tơdah tuôm hŏng klei knap mñai? Si knuih drei tơdah bi tlă anăp hŏng klei knap mñai?
Jih jang mnuih jing mnuih soh sơăi, kyuanăn wăt tơdah jing mnuih ƀai amâodah mnuih kpă ăt srăng tuôm sơăi hŏng klei knap mñai, ƀiădah ti knhal tuč mnuih kpă srăng lŏ kgŭ, bi mnuih ƀai srăng tŭ klei rai tuč amâo mâo êlan dưi tlaih ôh. Klei Mtao Sôlômôn bi hriăm ti dlông anăn jing klei ñu mtă brei anak răng đăm bi mguôp hŏng phung ƀai čiăng tlĕ dŏ dô, leh anăn ngă jhat kơ mnuih kpă hŏng klei luar leh anăn klei ƀai ôh (êlan 15). Klei mtă anei kna ti klei đăo sa čô mnuih kpă đăo sĭt kơ Aê Diê jing Pô kpă ênô leh anăn mgang nanao mnuih kpă. Pruê̆ blŭ “dôk kăp ngă kơ sang” lŏ mblang jing dôk kăp mmông găl čiăng ngă klei jhat amâodah tlĕ dŏ ngăn. Phung ƀai srăng tŭ klei tăm pah leh anăn srăng tŭ klei bi kmhal tơdah ngă klei ƀai.
Mdê hŏng klei mtă brei phung ƀai răng jing klei bi mđĭ ai kơ mnuih kpă. Wăt tơdah mnuih kpă lĕ buh lu blư̆ dưn, ăt digơ̆ srăng lŏ gŭ leh anăn ti knhal tuč digơ̆ srăng mâo klei dưi. Boh blŭ “lĕ buh” lŏ mblang jing “êbuh” amâo djŏ lĕ buh mkŭp ti lăn ôh. Msĕ si Klei Mmuñ Hđăp 37:24 lač snei: “Wăt tơdah digơ̆ êbuh, digơ̆ amâo srăng rai ôh, kyuadah Yêhôwa krơ̆ng digơ̆ hŏng kngan ñu.” Pruê̆ blŭ “lĕ buh kjuh blư̆” čiăng lač kơ klei lông dlăng truh amâo mâo mdei ôh, klei bi rai ktang snăk. Klei hdĭp mnuih kpă amâo kƀah ôh klei knap mñai, ƀiădah ti knhal tuč Aê Diê srăng lŏ bi kơrŭ digơ̆, găn troh êyui klei djiê; bi klei tuč ruê̆ kơ phung ƀai jing diñu srăng tŭ klei bi rai, amâo lŏ dưi bi mtlaih ôh.
Klei hdĭp phung đăo kơ Krist tăp năng mâo klei lông dlăng lu hĭn kơ phung amâo mâo đăo kyuadah digơ̆ srăng tŭ wăt klei arăng ngă jhat kyua Anăn Khua Yang msĕ mơh. Khua ƀĭng kna Y‑Pêtrôs bi mđĭ ai snei: “Ƀiădah wăt tơdah diih tŭ klei knap mñai kyua klei kpă, diih srăng mâo klei jăk jĭn. Đăm huĭ kơ klei diñu huĭ ôh, kăn rŭng răng rei” (I Y‑Pêtrôs 3:14). Khua Yang Yêsu ăt tŭ leh mơh klei knap mñai čiăng brei kơ drei klei hdĭp hlŏng lar. Klei jăk jĭn kơ phung đăo amâo mjưh mă tăp dŏ ngăn, klei arăng mpŭ ti lăn ala ôh, ƀiădah klei yuôm hĭn jing dưi jing anak Khua Yang leh anăn hdĭp hlŏng lar hlăm ƀuôn ala mtao Ñu. Brei grăp čô drei bi juh leh anăn bi mđĭ ai hdơ̆ng drei kyuadah hlăm klei lông dlăng, Aê Diê srăng mkra mơh êlan čiăng kơ drei dưi tlaih msĕ si klei Khua bĭng kna Y‑Pôl lač, “Aê Diê jing sĭt suôr, leh anăn Ñu amâo brei ôh klei mplư truh kơ diih êgao hĭn kơ ai ktang diih, ƀiădah mbĭt hŏng klei mplư anăn Ñu srăng mkra mơh êlan diih dưi tlaih, čiăng kơ diih dưi gĭr tŭ klei anăn” (I Kôrantô 10:13). Khua Yang srăng brei drei dưi hlăm klei bi blah knhal tuč hŏng klei soh msĕ si Ñu dưi leh.
Si ngă drei jhŏng tŭ klei knap mñai kyua Anăn Khua Yang mơ̆?
Wah lač: Ơ Khua Yang, lač jăk kơ Ih dôk mbĭt leh hŏng kâo, brei klei pap, leh anăn bi ktang kâo brei kâo dưi găn jih klei knap mñai. Akâo Ama brei kơ kâo klei đăo, klei jhŏng, dôk kjăp leh anăn dôk êđăp ênang hlăm klei lông dlăng, klei knap mñai. Đru kâo msĕ mơh thâo khăp leh anăn đru phung tuôm hŏng klei knap mñai. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 7-8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
