Pajlug 24:15-16
Nqe cim:
“Tus neeg ncaj ncees ntog pestsawg zaus los nws yeej sawv taus, tiamsis kev puastsuaj rhuav tshem cov neeg ua phem” (Pajlug 24:16)
Lus nug rau sawvdaws xav:
– Vajntxwv Xalumoos qhia nws tus tub tsis txhob ua dabtsi rau cov neeg ncaj ncees?
– Qhov kawg ntawm tus neeg ncaj ncees thaum raug kev txomnyem yog dabtsi?
– Peb yuav tsum muaj tus cwjpwm li cas thaum ntsib kev txomnyem?
Tibneeg yeej ibtxwm yog neeg txhaum yog li ntawd txawm yog neeg phem thiab neeg ncaj ncees los yeej yuav ntsib kev sim siab txomnyem tib yam; tiamsis thaum kawg, tus neeg ncaj ncees yuav tau rov zoo dua, hos tus neeg phem yuav raug kev puastsuaj uas tsis muaj chaw khiav dim. Cov lus qhia ntawm no yog Vajntxwv Xalumoos tej lus ceebtoom rau nws tus tub kom tsis txhob koom nrog cov neeg phem uas mus nyiag thiab ua teebmeem rau cov neeg ncaj ncees los ntawm kev dag ntxias thiab kev ua phem (nqe 15). Lo lus ceebtoom no yog saib los ntawm qhov uas tus neeg ncaj ncees ntseeg khov kho hais tias Vajtswv yeej yog tus ncaj ncees thiab yuav tuaj tus neeg ncaj ncees tog. Nqe lus “nrhiav tswvyim mus nyiag” txhais hais tias ua ncha taw mus nyas kom nrhiav tau sijhawm mus ua phem lossis nyiag luag cuabtam. Tus neeg phem yuav raug foom phem thiab yuav raug txim rau nws tej kev phem.
Tsis zoo li tej lus ceebtoom rau cov neeg phem, muaj lus txhawb zog rau cov neeg ncaj ncees. Txawm yog tus neeg ncaj ncees yuav raug ntog ntau zaus, los nws yuav rov sawv thiab thaum kawg yuav kovyeej. Lo lus “ntog” txhais tau tias “dawm ntog” xwb, tsis yog ntog pw nthi zoo li hais hauv Ntawv Nkauj 37:24 hais tias: “Txawm yog lawv ntog los lawv yeej tsis pw twjywm, rau qhov tus TSWV yuav tsa lawv sawv.” Nqe lus “ntog pestsawg zaus” lwm phau txhais hais tias “ntog xya zaus”, xav hais txog tej kev sim siab sib txuas zus, ua rau ntsib kev puastsuaj loj. Lub neej ntawm tus neeg ncaj ncees yeej muaj kev txomnyem thiab kev nyuaj siab, tiamsis thaum kawg lawv yuav tau tsa sawv, hla dhau kev tuag thiab yuav tsis raug kev puastsuaj ib zaug li; hos tus neeg phem yuav poob mus rau hauv kev puas tsuaj uas tsis muaj kev cawm dim.
Cov ntseeg Yexus lubneej tej zaum yuav ntsib ntau yam kev sim siab dua tej neeg ntiajteb thiab tseem raug tsim txom vim tus Tswv lub npe. Timthawj Petus tau txhawb cov ntseeg hais tias: “Yog nej ua nej lub neej zoo lawm, txawm yog muaj neeg tsimtxom nej los nej yeej yuav muaj kev kaj siab; nej tsis txhob ntshai lawv thiab tsis txhob txhawj” (I Petus 3:14). Yexus Khetos tus kheej kuj tau raug kev txomnyem kom pub tau txojsia ib txhis rau peb. Tej koob hmoov uas Vajtswv cov menyuam tau txais tsis yog tej cuabtam lossis koobmeej hauv ntiajteb, tiamsis qhov tseemceeb, muaj nqis tshajplaws yog tau ua Vajtswv cov menyuam thiab tau txojsia ib txhis nyob hauv lub tebchaws uas tsis kawg. Peb txhua tus yuav tsum sib txhawb zog thiab sib pab vim nyob hauv tej kev sim siab, Vajtswv yuav qhib kev rau peb hla dhau raws li Timthawj Paulus tau qhia hais tias: “Tej kev sim siab uas nej raug yeej yog tej kev sim siab uas sawvdaws raug. Vajtswv yog tus ncaj ncees, nws yeej tsis cia nej raug kev sim siab dhau qhov uas nej yuav nyiaj tsis taus, tiamsis thaum nej raug kev sim siab Vajtswv yuav pab kom nej ua taus lub siab ntev” (I Kauleethaus 10:13). Vajtswv yuav pub peb kovyeej kob rog kawg nrog kev txhaum ib yam li Tswv Yexus twb kovyeej lawm.
Thov Vajtswv,
Tus Tswv, nyuam yaus ua Koj tsaug rau qhov Koj nrog nraim, pub koob hmoov, pub dag zog rau nyuam yaus kovyeej kev sim siab txomnyem. Thov Koj pub rau nyuam yaus muaj txojkev ntseeg, lub siab tawv qhawv, thiab kev kaj siab thaum ntsib tej kev sim siab txomnyem. Thov Koj pab kom nyuam yaus paub hlub thiab pab cov neeg uas raug kev txomnyem. Nyuam yaus tuav Yexus Khetos lub npe thov, Amees.
Peb puas txaus siab tiv kev sim siab txomnyem vim tus Tswv lub npe?
Nyeem Vajluskub hauv peb lub xyoos: I Xwmtxheej Vajntxwv 7-8
Kênh Youtube BHKTHN:
