Lukas 2:25-32
Nqe cim:
“…tus neeg ncaj ncees thov Vajtswv, tej lus ntawd muaj hwjchim heev.” (Yakaunpaus 5:16)
Lus nug rau sawvdaws xav:
– Vajluskub qhia txog Xime-oos yog tus neeg zoo li cas?
– Xime-oos txojkev xav nws tau txais li cas?
– Yuav ua li cas kom peb ua taus siab ntev thov Vajtswv thiab nyob tos?
Vajluskub qhia hais tias Xime-oos nyob hauv lub nroog Yeluxalees, nws yog “ib tug neeg ncaj ncees”, niaj hnub “tos lub sijhawm uas Vajtswv los cawm cov neeg Yixalayees” thiab muaj “Vaj Ntsujplig tus dawbhuv nrog nraim” (nqe 25). Qhov uas Xime-oos ntshaw yog tau pom tus Cawmseej uas los cawm cov neeg Yixalayees. Thiab Vaj Ntsujplig qhia rau Xime-oos paub hais tias nws yuav pom tus Cawmseej ua ntej uas nws tuag. Thaum Yauxej thiab Malis coj Tswv Yexus mus fij rau Vajtswv hauv lub Tuamtsev ces Xime-oos kuj tau Vaj Ntsujplig qhia, yog li Xime-oos kuj mus rau hauv lub Tuamtsev thiab. Xime-oos txhais tes tau puag kiag tus metub Yexus thiab qhuas Vajtswv. Zaj nkauj uas Xime-oos hu yog ib cov lus ua timkhawv tsimnyog ntseeg ntawm tus neeg ncaj ncees thiab muaj Vaj Ntsujplig nrog nraim.
Xime-oos tau thov Vajtswv ntau xyoo thiab nyob tos kom tau pom tus Mexiyas uas los cawm cov neeg Yixalayees. Lub npe “Xime-oos” txhais hais tias “Vajtswv twb hnov”. Vajtswv hnov Xime-oos tej lus thov thiab teb tej lus ntawd los ntawm qhov uas tso tus Cawmseej los cawm Nws haivneeg. Qhov uas ua siab ntev nyob tos thiab ntseeg ruaj tej lus uas Vajtswv hais tau txais nqi zog. Xime-oos txaus siab rau qhov uas tau pom thiab puag kiag tus metub Yexus. Nimno, Xime-oos zoo siab tuag “kaj siab lug” vim twb “pom txojkev cawm dim” pub rau Nws haivneeg (nqe 29-30). Xime-oos zeem paub tes haujlwm uas tus Mexiyas los hauv ntiajteb no, tiamsis feem coob cov neeg Yixalayees tsis paub li ntawd. Xime-oos paub hais tias Tswv Yexus los “ua qhovkaj rau txhua haivneeg”, coj txojkev cawm dim los pub rau Nws haivneeg, thiab “ua rau cov neeg Yixalayees tau ntsejmuag” (nqe 31-32; Tes Haujlwm 26:22-23).
Thov Vajtswv thiab nyob tos yog lub siab cheemtsum muaj ntawm ib tug neeg uas cia siab ntsoov thiab tos rawv tus Tswv tej lus hais. Xime-oos tau tus Tswv qhia ua ntej hais tias nws yuav pom tus Cawmseej tas nws mam tuag. Nov yog ib lo lus cog tseg pub rau Xime-oos. Peb tsis paub tias Xime-oos muaj pestsawg xyoo, tiamsis nqe 26 thiab 29 qhia paub Xime-oos laus heev lawm. Xime-oos siv nws lub neej feem ntau nyob tos Vajtswv lo lus cog tseg, thiab nws ntseeg hais tias nws yeej yuav pom tus Cawmseej ua ntej nws tuag. Tseeb yog li ntawd, thaum kawg Xime-oos txojkev ntseeg ua rau nws pom.
Feem ntau peb pom tias nyuaj thaum nyob tos Vajtswv tej lus cog tseg. Ntau zaus peb thov Vajtswv daws peb tej teebmeem hauv lub neej, peb ua tsis taus siab ntev nyob tos, peb cia li qaug zog thiab tso tseg. Peb txhua tus yuav tau tuav rawv Vajtswv tej lus hais hauv Yakaunpaus 5:16: “…tus neeg ncaj ncees thov Vajtswv, tej lus ntawd muaj hwjchim heev.” kom peb ua taus siab ntev thov Vajtswv thiab nyob tos tus Tswv teb, txawm yog tos lub sijhawm ntev loo.
Thov Vajtswv,
Vajtswv, thov Koj zam txim vim nyuam yaus pheej ua tsis taus siab ntev nyob tos thaum thov Vajtswv. Thov Koj pab kom nyuam yaus muaj lub siab ntev thov Vajtswv, nyob tos Koj tej lus teb. Nyuam yaus tuav Tswv Yexus lub npe thov, Amees.
Peb puas pheej tso tseg thaum thov Vajtswv ntev loo tsis pom Vajtswv teb?
Nyeem Vajluskub hauv peb lub xyoo: Yaxayas 41
Kênh Youtube BHKTHN:
