Klei Aê Diê Blŭ: Y-Luk 2:25-32
Êlan kliăng: “Klei sa čô mnuih kpă wah lač mâo klei myang leh anăn klei dưi” (Y-Yakơ 5:16b)
Klei êmuh ksiêm mĭn: Klei Aê Diê Blŭ čih bi êdah si mnuih Y-Simêôn jing? Si klei ñu čang guôn truh sĭt leh? Si drei ngă čiăng drei gĭr wah lač leh anăn čang guôn klei Aê Diê čiăng?
Klei Aê Diê Blŭ brei thâo Y-Simêôn dôk ti ƀuôn Yêrusalem, ñu jing mnuih “kpă ênô leh anăn doh jăk”, “dôk čang hmăng klei bi juh kơ phung Israel”, leh anăn mâo “Yang Mngăt Jăk dôk ti ñu” (êlan 25). Klei ñu čang hmăng jing dưi ƀuh klei Aê Diê bi mtlaih phung Israel. Leh anăn Yang Mngăt Jăk hưn leh kơ ñu thâo ñu amâo srăng djiê ôh tơl leh ñu ƀuh Pô Bi Mtlaih. Tơdah amĭ ama ba anak điêt digơ̆ Yêsu kơ Sang Kkuh Mpŭ čiăng myơr kơ Aê Diê, snăn Yang Mngăt Jăk ăt hưn êlâo leh mơh kơ Y-Simêôn brei gơ̆ nao kơ Sang Kkuh Mpŭ. Y-Simêôn pŭ Hđeh Điêt Yêsu leh anăn bi mni kơ Aê Diê. Klei mmuñ Y-Simêôn jing sa klei hưn bi sĭt mơ̆ng sa čô mnuih kpă ênô, doh jăk leh anăn mâo Yang Mngăt Jăk dôk mbĭt.
Sui thŭn leh Y-Simêôn wah lač leh anăn dôk čang hmăng kơ Yang Mêsi hriê bi mtlaih phung Israel. Anăn Simêôn lŏ mblang jing “Aê Diê hmư̆ leh.” Aê Diê hmư̆ leh klei Y-Simêôn wah lač nanao amâo mdei leh anăn lŏ wĭt lač hŏng klei tiŏ hriê Yang Mêsi hriê bi mtlaih phung ƀuôn sang Ñu. Klei gĭr dôk guôn leh anăn hŏng jih ai tiê đăo kơ klei Aê Diê ƀuăn mâo leh boh tŭ dưn. Y-Simêôn mơak snăk tơdah ală ñu ƀuh leh anăn kngan ñu pŭ leh Yang Krist. Ară anei, ñu dưi “đuĕ nao hŏng klei êđăp ênang” kyuadah ală ñu ƀuh leh klei Aê Diê bi mtlaih mkra leh kơ phung Israel (êlan 29-30). Ñu thâo klei kñăm čiăng kơ klei Yang Mêsi hriê ti lăn ala, bi phung Israel ênuk anăn amâo thâo ôh. Ñu thâo Yang Yêsu hriê jing “klei mngač ti anăp jih jang găp djuê mnuih”, ba klei bi mtlaih kơ phung ƀuôn sang Ñu; leh anăn “jing klei guh kơang kơ phung ƀuôn sang Israel” (êlan 31-32; Bruă Phung Khua Ƀĭng Kna 26:22-23).
Wah lač leh anăn dôk čang guôn jing sa knuih čiăng mâo snăk kơ sa čô djă păn kjăp klei Aê Diê ƀuăn leh anăn đăo kơ Ñu hŏng jih ai tiê. Aê Diê hưn leh kơ Y-Simêôn gơ̆ amâo srăng djiê ôh tơl gơ̆ ƀuh leh Yang Krist. Sĭt nik anei jing klei ƀuăn leh kơ gơ̆. Drei amâo thâo klă ôh dŭm thŭn leh Y-Simêôn, ƀiădah hlăm êlan 26 leh anăn 29 brei thâo ñu mduôn leh. Ñu dôk guôn klei Aê Diê ƀuăn leh jih klei hdĭp ñu, leh anăn ñu đăo sĭt nik ñu srăng ƀuh Khua Yang êlâo ñu djiê. Snăn yơh, ti knhal tuč klei ñu dôk čang guôn hŏng klei đăo truh sĭt nik.
Păt čiăng jih jang phung drei ƀuh dleh snăk dôk guôn klei Aê Diê ƀuăn. Mâo lu blư̆ drei wah lač akâo Khua Yang mgaih mkra hĕ sa mta klei hlăm klei hdĭp drei, leh anăn drei guôn hŏng klei ruăt, êlưih snăk drei srăng êdu ai leh anăn kdŭn. Brei grăp čô drei djă păn kjăp klei Aê Diê ƀuăn leh hlăm hră Y-Yakơ 5:16 snei: “Klei sa čô mnuih kpă wah lač mâo klei myang leh anăn klei dưi” čiăng drei dưi gĭr wah lač leh anăn dôk čang guôn klei Aê Diê lŏ wĭt lač, wăt tơdah klei dôk guôn anăn srăng sui dưn mơh.
Drei khăng mdei wah lač mơ̆ tơdah drei wah lač sui leh ƀiădah ka ƀuh klei Aê Diê lŏ wĭt lač ôh?
Wah lač: Ơ Khua Yang, pap brei kơ kâo đa kyuadah mâo lu blư̆ kâo amâo dưi dôk guôn ôh si klei Ih čiăng. Đru kâo thâo gĭr wah lač leh anăn dôk guôn klei Ih lŏ wĭt lač. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
