Pajlug 23:4-5
Nqe cim:
“Rau qhov tib ntsais muag xwb, koj tej nyiaj txiag yuav ploj tas ib yam li tus dav uas muaj tis ya” (Pajlug 23:5)
Lus nug rau sawvdaws xav:
– Vim li cas tus Tswv cov menyuam tsis tsimnyog khwv dhau kom npluanuj?
– Kev muaj nqis ntawm tej khoom ntiajteb tsuas nyob ib vuag thiab yuav dua mus li cas?
– Peb xav li cas txog nyiaj txiag thiab siv zoo li cas kom haum tus Tswv siab?
Vajntxwv Xalaumoos qhia menyuam tias nyiaj txiag tsuas yog ib yam cuabyeej, tsis yog homphiaj rau koj lub neej. Thaum koj “khwv dhau” lossis “rau siab mus khwv”, tas dag zog, siv tas tswvyim rau kev mus nrhiav nyiaj, ces thaum koj npluanuj, koj yuav saib nyiaj txiag yog yam uas tseemceeb tshaj, saib koj tej cuabtam yog koj lub homphiaj ua neej, koj twb nkag mus rau txojkev uas tsis yog txoj tseeb lawm los koj twb tsis paub. Tus Tswv qhia Nws cov menyuam yuav tsum nquag: “Kev tubnkeeg yuav ua rau koj pluag, tiamsis kev nquag yuav ua rau koj npluanuj.” (Pajlug 10:4). Txawm yog li ntawd los, thaum tibneeg xav tias yus muaj nyiaj txiag ntau vim yog yus lub dag zog, yus lub tswvyim mus khwv tau los ces yus twb ua neej tsis nco tus Tswv txiaj ntsig lawm, lossis hais dua lwm seem lus ces yog twb tsis lees paub tus Tswv ntag. Thaum ntawd yuav vim nyiaj txiag es poob mus ua kev phem lossis tsis cia siab rau tus Tswv ntxiv, ntawd yog ua txhaum rau tus Tswv.
Lolus “ntsia ntsoov” yog hais txog txojkev ntshaw lossis rau siab mus nrhiav. Lub qhovmuag qhia tshwm tus cwjpwm thiab tibneeg txojkev xav, yog li qhov uas “ntsia ntsoov rau tej nyiaj txiag” qhia tshwm txojkev xav kom npluanuj. Tiamsis qhov tseeb peb pom meej tias muaj ntau tug muaj nyiaj txiag ntau tiamsis kuj ploj mus sai heev zoo li tus dav nthuav tis ya saum nruab ntug. Dav ya sai heev, ya siab thiab muaj zog, tsis muaj ib yam dabtsi yuav muaj cuabkav ntes tau nws, nyiaj txiag kuj yoojyim ploj thiab poob mus ibtxhis li ntawd.
Tswv Yexus ntuas Nws cov menyuam tias tsis txhob khaws nyiaj txiag thiab qhov txhia chaw rau nej hauv ntiajteb no, rau qhov hauv ntiajteb no muaj ntsaum kabrwg thiab xeb noj, thiab muaj tubsab nyiag. Tiamsis cia li khaws nyiaj txiag thiab qhov txhia chaw cia rau saum ntuj ceebtsheej, rau qhov nej tej nyiaj txiag thiab qhov txhia chaw nyob qhov twg, nej lub siab yeej yuav nyob qhov ntawd (Mathais 6:19-21). Nyiaj txiag, khoom qhov txhia chaw tsuas yog ib yam cuabyeej, hnub no nyob tagkis ploj, tus Tswv cov menyuam tsis txhob nqis siab mus khwv dhau kom muaj nyiaj txiag ntau, thiab kuj tsis txhob saib tej khoom qhov txhia chaw yog ib tug mlom rau yus cia siab es ua poob yus tus ntsujplig mus. Peb lub homphiaj ua neej yog txojsia mus ibtxhis, txojkev npluanuj uas nyob mus ibtxhis, yog li cia li taij thov tus Tswv pab kom peb paub tswj siab hauv kev nrhiav nyiaj, tsis vim nyiaj txiag es cia li mus ua txhaum. Thaum tus Tswv pub rau peb muaj nyiaj, khoom qhov txhia chaw, cia li tag siab ua tus Tswv tsaug thiab siv tej khoom uas tus Tswv pub ntawd los mus tshaj tawm Txojmoo Zoo, coj ntiajteb tus ntsujplig rov los cuag tus Tswv, dua li ntawd kuj yuav tsum paub hmov tshua pab tsev neeg thiab lwm tus kwvtij uas tabtom ntsib kev txomnyem.
Thov Vajtswv,
Tus Tswv, nyuam yaus ua koj tsaug vim koj tau pub rau nyuam yaus muaj nyiaj txiag los siv rau lub neej. Thov koj pab kom nyuam yaus paub ua koj tsaug thiab cia siab rau koj kom nyuam yaus khiav dim nyiaj txiag rooj ntxiab. Thov koj pab nyuam yaus paub siv tej nyiaj txiag uas tus Tswv pub los mus ua koj tes haujlwm hauv kev tshaj tawm Txojmoo Zoo thiab pab lwm tus. Nyuam yaus tuav Yexus Khetos lub npe thov, A-mees.
Peb kev xav txog nyiaj txiag zoo li cas? peb tau siv nyiaj txiag rau lub tebchaws uas nyob mus ibtxhis zoo li cas lawm?
Nyeem Vajluskub hauv peb lub xyoo: 2 Xamuyees 21
Kênh Youtube BHKTHN:
