Rôm 11:1-10
“Na dang ei ‘Bok Kei-Dei kư̆m wă rơih iŏk lu bơngai Isơrael thoi noh, lu bơngai noh Sư rơih iŏk yua kơ Sư mơnat.” (Rôm 11:5)
Nơ̆r jet tơchĕng pơwao:
– ‘Bok Pôl đei pơma tơ’bôh ‘bar tơdrong pơtih gia hơyơ wă tơ’bôh Kră Yang tơpăt hăm kon pơlei Sư?
– Minh pah kon pơlei Kră Yang oei đei kiơ̆ Kră Yang kiơ̆ tơdrong mơnat, wă pơma tơdrong kiơ gah Kră Yang ‘Bok Kei-Dei?
– ‘Bai pơhrăm năr ‘nâu tơ’blŏk kơ bơ̆n tơdrong kiơ?
Kră Yang ‘Bok Kei-Dei pơma phơ̆t Isơrael jơ̆ adrĕch ưh kơ chu yom păng arăng kơ̆l dêh (Rôm 10:21), Sư đei ‘măn ăn kơ lu adrĕch tơmoi wă pơm kơ kon pơlei Isơrael blĕk ơh, klai. Yua kơ thoi noh, ‘bok Pôl đei tơlĕch minh nơ̆r jet gĭt kăl dêh tơpă. “’Bok Kei-Dei hăm hŭt lê̆ đe Isơrael?” Sư pơma tơpăt “ưh ôh, Sư oei ‘mêm tơpă”. Sư đei tơ’bôh ‘bar tơdrong pơtih gia wă pơdah rup gah Kră Yang tơpăt ưh kơ layơ achăng lê̆ kon pơlei Sư mă khan lu sư ưh kơ chu nơ̆r Sư.
Mă mônh, Sư mơn đêl bơih, minh ‘nu bơngai Isơrael tơpă, Adrĕch adrung Abraham, lăm adrĕch Bênjamin, sư bơngai đêl pơm kơnê̆ kơ tơdrong Kră Yang Yêsu, pơm kơnê̆ păng chă rôp phak lu bơngai lui kơ Yêsu. Mălei tơdrong ‘mêm Kră Yang oei ling lang druh kiơ̆ Sư. Kră Yang tơ’bôh akâu Sư kơplah rok trong năm tơ pơlei Đamas (Tơdrong jang 9). Kră Yang krao sư bơ̆jang pơm Jơ̆ng ‘bang Sư wă kơ sư năm chă bơtho kơ lu adrĕch adrung Isơrael păng Kră Yang rơih iŏk sư wă chă bơtho Tơdrong ‘Nao ‘Lơ̆ng kơ kon pơlei tơmoi (Tơdrong jang 13:2).
Mă ‘bar, Sư yua iŏk I Pơtao 19:10, 18, kơplah ‘bok Êli bơngai khan lê̆ adrol đei tơdrong arih pơmat tat, kon pơlei Kră Yang ưh kơ chu mơ̆ng nơ̆r Kră Yang, pơrăm lê̆ Hnam akŭm, yua đao gưm pơlôch lu ‘bok khan lê̆ adrol. ‘Bok Êli bơngai khan lê̆ adrol tơchĕng khan lăp minh ‘nu sư đĕch oei arih mălei oei chơ chă wă pơlôch. Sư tôch kơ đon, rơdu tơrăn, sư krao khan apinh Kră Yang jah iŏk tơdrong arih sư. Mălei Kră Yang tơbăt kơ sư. Sư oei wei rong tơpơh rơbâu ‘nu bơngai ưh kơkuh kơ yang Baal. Kră Yang pơm minh tơdrong hlĭch dêh. Lăm jơ phŭt mă măng mu kơnê̆ dêh lăm chăl arih, lu bơ̆n oei kơjăp lui gơnang kơ Kră Yang tơpăt oei pơgơ̆r păng Sư đei hơmet lê̆ bơih tơdrong mă ‘lơ̆ng hloh ăn kơ kon pơlei Sư.
‘Bok Pôl đei tơbăt lăm lu Isơrael “’Bok Kei-Dei ưh kơ băt ôh lu bơngai Isơrael, yua kơ Sư rơih iŏk đơ̆ng sơ̆ bơih.” Jơ̆ wă khan lu bơngai mă đei jô̆ ‘lơ̆ng tơpăt yua kơ đei đon lui gơnang kơ Yêsu (trong 5-6). Lăm kơplah mă lơ dêh lu bơngai Isơrael hăt pơm kiơ̆ păng wei răk khôi juăt wă kơ gơh jô̆ ‘lơ̆ng tơpăt păng lu sư ưh kơ gơh đei ôh tơdrong mă lu sư đei chơ chă noh (trong 7), Kră Yang lê̆ lu sư oei lăm măng mu “măt lu sư ưh kơ gơh ‘bôh, đon lu sư ưh kơ gơh kơtơ̆ng” oei pơm kiơ̆ kơ lu sư ‘maih wă truh dang ei (trong 8. Bơtho khôi juăt 29:4). Mălei Kră Yang ‘Bok Kei-Dei tơpăt wei răk nơ̆r Sư pơkă hăm lu yă ‘bok lu bơngai Isơrael, Sư oei kĕ chơ̆n chang gô. Mă khan lei ră, lu sư gơh jô̆ ‘lơ̆ng tơpăt dah ưh ‘noh kiơ̆ kơ đon lui rim ‘nu. Kră Yang tơpăt păng ‘lơ̆ng tơpăt. Sư ưh kơ layơ tơmơ̆t hăm lu bơngai mă ưh kơ kiơ̆ ‘blep trŏ thoi Sư wă. Dang ei lu bơ̆n gơh klaih tôm tơdrong yua kơ đei đon lui ưh kơsĭ đơ̆ng tơdrong pơm ‘lơ̆ng, ‘nĕ kơ chơ chă tơdrong mơnat hăm dôm tơdrong kiơ mă lu bơ̆n đei, yua kơ tơdrong mơnat Kră Yang ăn tôm tơdrong, yua đơ̆ng tơdrong ‘mêm mơnat ăn đĕch noh đơ̆ng Kră Yang.
Lu bơ̆n hăm yua dôm tơdrong khan đơ̆ng bơ̆n pơm ‘mơ̆i na tơplih iŏk tơdrong Kră Yang mơnat ăn đĕch?
Ơ Kră Yang, inh bơnê kơ Ih, yua kơ Ih jơ̆ ‘Bok tơpăt, ‘lơ̆ng tơpăt, ‘bĕnh hăm tơdrong sĭt tơpăt. Apinh Ih tơgŭm inh arih hli yom kơ Ih, yak năm kiơ̆ Ih chông anhăk wă kơ gơh đei mơn đêl tơdrong tơpăt, păng ‘lơ̆ng tơpăt Ih. Krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 9.
Kênh Youtube BHKTHN:
