Klei Aê Diê Blŭ: Y‑Mathiơ 6:1-6
Êlan kliăng: “Răng bĕ, đăm ngă ôh klei kpă diih ti anăp mnuih čiăng kơ diñu ƀuh diih; kyuadah tơdah diih ngă snăn diih amâo srăng mâo klei mưn ôh mơ̆ng Ama diih hlăm adiê.” (Y‑Mathiơ 6:1)
Klei êmuh ksiêm mĭn: Ya êlan hdră kluôm tơdah ngă klei jăk kơ arăng? Ya klei mnuih wah lač ai ngăm leh anăn wah lač sĭt srăng mă tŭ? Ya klei mtrŭt kơ drei ngă jih jang bruă jăk?
Êlan 1 bi êdah êlan hdră kluôm tơdah “ngă klei kpă”, jing klei brei mnơ̆ng pap kơ arăng, wah lač, leh anăn klei kăm ƀơ̆ng huă (Y‑Mathiơ 6:2-18).
Tal sa, ngă klei kpă jing bruă klam kơ mnuih tui hlue Khua Yang. Tơdah lač “Răng bĕ, đăm ngă ôh klei kpă diih ti anăp mnuih”, Khua Yang Yêsu brei ƀuh “ngă klei kpă” jing sa bruă bhiăn ngă hlăm klei hdĭp sa čô mnuih tui hlue Ñu, klei yuôm jing đăm ngă klei kpă hŏng êlan hdră soh ôh.
Tal dua, klei kpă brei ngă hlăm klei mâo Aê Diê leh anăn kyua klei guh kơang Ñu. Jih êlan 1, 4, 6, 18 brei ƀuh Aê Diê ƀuh jih leh anăn mưn kơ mnuih “ngă klei kpă” hŏng klei sĭt kpă, amâo djŏ kyua čiăng hưn ktưn ôh. Răng bĕ kyuadah anak mnuih dưi jing ai ngăm leh anăn mplư anak mnuih, ƀiădah amâo tuôm dưi ai ngăm leh anăn mplư Aê Diê ôh (I Y-Samuel 16:7). Khua Yang ƀuh nanao si hlăm lam ai tiê leh anăn ya klei mtrŭt tơdah drei “ngă klei kpă”, myơr, đru mnuih dôk găn klei dleh dlan, amâodah wăt hlăm klei kkuh mpŭ msĕ si klei wah lač, klei kăm ƀơ̆ng huă, nao Sang Aê Diê. Brei ksiêm dlăng ai tiê drei pô nanao, jih jang klei drei dôk ngă čiăng kơ mnuih mkăn ƀuh amâodah kyua klei guh kơang kơ Aê Diê?
Tal tlâo, čang guôn klei mưn mơ̆ng Aê Diê jing klei djŏ. Hdruôm Hră Klei Bi Mguôp Mrâo lu blư̆ mtô čang guôn Khua Yang mưn, kluôm dhuôm amâo jing soh ôh (I Kôrantô 15:58; Hêbrơ 6:10…). Ƀiădah brei drei thâo, klei mưn mơ̆ng lăn ala jing klei bi mni, klei mpŭ, leh anăn klei tŭ dưn hlăm kđeh (Y‑Markôs 12:38-40), jing mdê kluôm dhuôm hŏng klei mưn mơ̆ng Aê Diê. Klei mưn mơ̆ng Khua Yang ba hriê dua mta klei bi knăl: Klei ƀuăn kơ klei mưn mơ̆ng Aê Diê hlăm Klei Bi Mguôp Mrâo amâo kñăm ôh kơ klei jăk jĭn hlăm kđeh, klei mdrŏng sah, amâodah klei mpŭ, ƀiădah čiăng lač kơ klei jăk jĭn myang tơdah thâo Khua Yang mơak leh anăn bi knal kơ sa klei hdĭp mâo klei tŭ. Êngao kơnăn, klei ƀuăn kơ klei mưn mơ̆ng Aê Diê wăt mâo klei lŏ brei thiăm, amâo djŏ klei tŭ dưn knŏng ti lăn ala anei ôh, ƀiădah lŏ mđĭ hĭn bruă klam (Y‑Mathiơ 25:21).
Khua Yang lač, “phung anăn mâo leh klei mưn kơ diñu” (êlan 2), hlăm klei blŭ Grek mblang jing “tla djăp ênŭm leh” amâodah “mă djăp leh ênoh prăk leh anăn hră hrui prăk”. Tơdah sa čô mnuih ai ngăm ngă bruă jăk kyua čiăng kơ mnuih mkăn ƀuh, snăn diñu mă tŭ leh klei mưn mơ̆ng mnuih, jing klei lač jăk, bi mni, mpŭ myưng, leh anăn knŏng dŭm năn yơh! Amâo lŏ adôk mnơ̆ng mkăn ôh leh anăn amâo mâo sa mta klei hriê mơ̆ng Aê Diê ôh. Ƀiădah tơdah sa čô mnuih ngă bruă jăk hŏng jih ai tiê sĭt kpă, kyua klei guh kơang kơ Khua Yang, snăn mnuih anei năng ai amâo mă tŭ sa mta mnơ̆ng mơ̆ng anak mnuih ôh, ƀiădah srăng mă tŭ klei mưn mơ̆ng Aê Diê. Mta phŭn jing klei drei pô čuăn ruah yơh.
Drei čiăng mă tŭ klei mưn leh anăn klei bi mni mơ̆ng ti anôk leh anăn mơ̆ng hlei pô?
Wah lač: Ơ Khua Yang, brei jih jang klei kâo wah lač leh anăn jih jang bruă kâo ngă jing kyua Khua Yang leh anăn hŏng jih ai tiê kpă ênô leh anăn sĭt nik. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 2
Kênh Youtube BHKTHN:
