Mathais 6:1-6
Nqe cim:
“Nej yuav tsum ceevfaj, tsis txhob coj Vajtswv txoj Kevcai kom lwm tus qhuas nej xwb. Yog nej ua li ntawd, nej Leej Txiv tus uas nyob saum ntuj ceebtsheej yuav tsis muab nqi zog rau nej” (Mathais 6:1)
Lus nug rau sawvdaws xav:
– Txoj cai rau txhua tus thaum mus ua tes haujlwm siab dawb pab lwm tus yog dabtsi?
– Tus neeg thov Vajtswv cuav thiab thov Vajtswv tseeb txais tau dab tsi?
– Lub homphiaj ua txhua tes haujlwm zoo ntawm peb yog dab tsi?
Nqe 1 qhia tawm tej kevcai rau txhua tus hais tias thaum “ua nej tej haujlwm uas ncaj ncees” (HMOWSV), uas yog pab cov txomnyem, thov Vajtswv thiab ua kevcai yoo mov (Mathais 6:2-18).
Tim ib, ua tes haujlwm ncaj ncees yog feem xyuam ntawm tus neeg raws Tswv Yexus qab. Thaum hais tias “ceev faj tsis txhob ua nej tej haujlwm uas ncaj ncees tab meeg rau neeg pom”, Tswv Yexus qhia pom hais tias ua tes haujlwm ncaj ncees yog yam uas yuavtsum ua ntawm tus neeg raws Tswv Yexus qab, tiamsis tsis txhob ua tes haujlwm ntawd yuam kev.
Tim ob, tes haujlwm ncaj ncees yuavtsum tau ua los ntawm qhov uas muaj Vajtswv tshwm nyob nrog thiab vim Vajtswv lub koobmeej. Cov nqe 1, 4, 6, 18 qhia pom Vajtswv ntsia pom thiab muab nqi zog rau tus neeg uas “ua tes haujlwm ncaj ncees” los ntawm lub siab ncaj, tsis khavtheeb. Cia li xyuamxim vim tibneeg yuav txawj ua cuav tiamsis yeej tsis muaj ib hnub twg yuav ua tau cuav thiab dag tau Vajtswv (1 Xamuyees 16:7). Vajtswv yeej ntsia pom peb lub siab thiab lub honphiaj uas “ua tes haujlwm ncaj ncees” fij nyiaj, pab cov txomnyem, thov Vajtswv, yoo mov, mus tom tuamtsev. Yuavtsum pheej tshuaj xyuas peb lub siab, txhua yam uas peb ua saib yog xav kom lwm tus pom lossis vim Vajtswv lub koobmeej?
Tim peb, tos ntsoov tej nqi zog ntawm Vajtswv yog yam uas yog. Vajluskub tshiab qhia ntau zaus hais tias tos ntsoov tej nqi zog ntawm Vajtswv mas yeej tsis txhaum (1 Kauleethaus 15:58; Henplais 6:10…). Tiamsis nco ntsoov hais tias nqi zog ntiajteb yog txoj kev qhuas, hwm thiab khoom qhov txhia chaw (Malakaus 12:38-40), txawv tej nqi ntawm Vajtswv. Nqi zog ntawm Vajtswv muaj ob qho tshwjxeeb li no: Vajtswv lo lus cogtseg txog tej koob hmoov hauv Vajluskub Tshiab tsis saib hlob koob hmoov sab nqaij tawv, kev nplua nuj, lossis kev tau luag hwm, tiamsis hais txog tej koob hmoov sab ntsujplig thaum paub tus Tswv txaus siab thiab txais tau lubneej muaj nqis. Dua li ntawd, lolus cogtseg txog Vajtswv yuav muab nqi zog pub ntxiv, tsis yog tsuas yog khoom qhov txhia chaw hauv ntiajteb no xwb, tiamsis kuj yog txhab ntxiv feem xyuam rau yus (Mathais 25:21).
Tswv Yexus hais tias “lawv twb tau lawv tej nqi zog lawm” (nqe 2), hauv lus Kilis muaj lub ntsiab hais tias “twb them nqi txaus tas lawm” lossis “twb txais txaus nyiaj thiab muaj daim ntawv txais nyiaj lawm”. Thaum tus neeg ntsejmuag ncaj siab nkhaus ua tes haujlwm zoo kom lwm tus pom ces nws kuj txais tau nqi zog los ntawm tibneeg uas yog lolus ua tsaug, qhuas, txhawb nqa thiab tsuas tau li ntawd lawm xwb! Tsis muaj lwm yam ntxiv thiab tsis muaj nqi zog dab tsi ntawm Vajtswv tuaj lawm. Tiamsis thaum muaj ib tus neeg ua haujlwm kawg siab ntsws vim Vajtswv lub koobmeej tej thaum yuav tsis tau txais dab tsi ntawm tibneeg tiamsis yuav tau txais nqi zog ntawm Vajtswv. Qhov tseemceeb saib peb xaiv li cas xwb.
Thov Vajtswv,
Tus Tswv, thov kom nyuamyaus tej lus thov thiab tej haujlwm nyuam yaus ua puavleej yog los ntawm nyuam yaus lub siab uas ncajncees thiab qhov tseeb. Nyuam yaus tuav Yexus Khetos lub npe thov, Amees.
Peb xav kom tau txais khoom pub, lus qhuas ntawm leejtwg ?
Nyeem Vajluskub hauv peb lub xyoo: 2 Xamuyees 2
Kênh Youtube BHKTHN:
