Klei Aê Diê Blŭ: Y‑Tit 1:15-16
Êlan Kliăng: “Kơ phung doh jăk jih jang mnơ̆ng jing doh sơăi; ƀiădah kơ phung čhŏ leh anăn kơ phung amâo đăo ôh, amâo mâo sa mta mnơ̆ng jing doh ôh…” (Y‑Tit 1:15a)
Klei êmuh ksiêm mĭn: Si ngă čiăng mâo klei hdĭp doh jăk? Mơ̆ng ya klei čiăng ksiêm dlăng ya jing klei čhŏ amâodah doh jăk? Si drei ngă čiăng mâo knuih hdĭp doh jăk mơ̆ng klei mĭn truh kơ ai tiê?
Khua ƀĭng Y‑Pôl dôk mblang kơ klei doh jăk leh anăn čhŏ. Boh blŭ “čhŏ” lač kơ phung jhat ƀai, rai luč, amâo đăo. Klei ñu mtô mblang nanao leh anăn bi hriăm jing klei hdĭp phung đăo doh jăk knŏng kyua mâo klei đăo hlăm êrah Khua Yang Yêsu Krist tuh leh, amâo djŏ ôh knang kơ klei kăm ya mta Aê Diê hrih mjing leh hŏng klei jăk siam. Ƀiădah hŏng phung mtô soh, diñu knŏng mjhua anăn phung đăo kơ Krist, amâo đăo kơ Aê Diê hŏng jih ai tiê ôh snăn wăt tơdah kăm, hdĭp dleh dlan, kpĭ mjuăt asei mlei ăt kăn dưi mjing kơ pô jing doh jăk rei ti anăp Aê Diê. Kyua klei mĭn leh anăn ai tiê kpă diñu pô čhŏ jhat leh (êlan 15).
Bruă lač kơ sa mta klei jing čhŏ amâodah doh jăk hlue si klei hdĭp phung ksiêm dlăng klei anăn. Kyua mơ̆ng ênuk mphŭn dơ̆ng “jih jang mnơ̆ng Aê Diê hrih leh jing jăk sơăi, leh anăn amâo mâo ôh mnơ̆ng brei arăng hngah tơdah ƀơ̆ng hŏng klei hdơr knga” (I Y‑Timôthê 4:4). Klei soh mŭt leh hlăm lăn ala, ƀiădah Khua Yang Yêsu tla leh nư kơ klei soh ti kyâo bi kal. Čiăng lač kơ sa čô mnuih jing doh jăk amâodah čhŏ, drei amâo dlăng ti êngao ôh, kyua “mnuih dlăng asei mlei ti êngao, ƀiădah Yêhôwa dlăng kơ ai tiê” (I Y‑Samuel 16:7). Phung mâo ai tiê amâo doh jăk, phung mâo klei mĭn jhat… khăng gĭr mjing klei bi êdah ti êngao mgưt, yuôm bhăn, čŏng lač pô jing mnuih thâo kral Aê Diê, hưn Klei Aê Diê Blŭ jăk snăk, mjing mă klei kăm ghă hjăn păn, lač klei anei jing doh jăk, klei adih jing čhŏ, ƀiădah kyua klei mĭn leh anăn ai tiê diñu soh leh anăn ti anăp Aê Diê diñu knŏng jing phung mgưt. “Diñu hưn kơ diñu thâo kral Aê Diê, ƀiădah diñu hngah Aê Diê hŏng bruă diñu ngă. Diñu jing phung arăng bi êmut, phung amâo gưt asăp ôh, leh anăn amâo dưi ngă sa mta bruă jăk ôh” (êlan 16).
Snăn, čiăng mâo sa knuih hdĭp doh jăk djŏ hlue si Aê Diê čuăn, grăp čô brei thâo leh anăn jih ai tiê đăo kơ Khua Yang Yêsu, êrah doh jăk Yang Krist srăng lăm jih klei soh drei. Brei mâo ală leh anăn klei mĭn yuôm bhăn ƀuh djăp mta hlăm klei doh jăk leh anăn ai tiê hdơr kơ Aê Diê. Khădah snăn, phung đăo kơ Krist đăm ôh mjhua klei êngiê čiăng ngă klei kđeh čiăng, ƀiădah “Brei drei dôk dơ̆ng ƀơ̆ng huă hŏng klei djŏ msĕ si êjai hruê; đăm ngă tă tăn amâodah kpiê ruă ôh. Đăm ngă klei čhŏ mrŏ amâodah tlĕ piu ôh; đăm bi mneh msao amâodah nač ôh” (Rôm 13:13). “Brei diih hngah jih jang klei jhat” (I Têsalônik 5:22).
Si drei hdĭp čiăng jing doh jăk truh kơ hruê bi tuôm hŏng Khua Yang?
Wah lač: Ơ Aê Diê doh jăk, akâo kơ Ih đru kâo thâo leh anăn đăo kơ Ih hŏng jih ai tiê. Akâo kơ Khua Yang đru kâo tŭ mă leh anăn bi mni kơ Ih djăp klei Ih brei. Akâo kơ Yang Mngăt Jăk thiăm ai ktang kơ kâo krơ̆ng kjăp klei đăo leh anăn hdĭp doh jăk, bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
