Klei Aê Diê Blŭ: Klei Mtô Mñă Klei Bhiăn 31:22-30
Êlan Kliăng: “Kyuadah kâo thâo diih jing phung khăng bi kdơ̆ng leh anăn khăng kŏ êdi. Nĕ anei, êjai kâo ăt dôk hdĭp mbĭt hŏng diih, hruê anei diih bi kdơ̆ng leh hŏng Yêhôwa; kdlưn hĭn kơ anăn mơh leh kâo djiê!” (Klei Mtô Mñă Klei Bhiăn 31:27)
Klei êmuh ksiêm mĭn: Ya klei Y‑Môis čih leh? Si ñu čih kơ phung ƀuôn sang Israel jing? Ya klei brei drei ngă čiăng rông klei khăp kơ Aê Diê truh knhal tuč?
Klei Yêhôwa hưn kơ Y‑Môis leh anăn Y‑Yôsuê thâo êlâo kơ klei phung ƀuôn sang Israel bi kdơ̆ng hŏng Aê Diê hlăm êdei anăp jing klei hâo hưn čih leh hŏng hră mơar, dưi dưm giăm Hip Klei Bi Mguôp, boh nik Y‑Môis yua čiăng bi hriăm leh anăn hưn brei phung ƀuôn sang Israel răng. Hĭn mơh, klei hâo hưn anăn ăt lŏ hưn hŏng phung khua mduôn leh anăn phung khua kiă kriê tơdah Y‑Môis djiê, diñu pô jing phung lŏ dơ̆ng bi hriăm, mñă kơ phung ƀuôn sang kơ boh jhat kjham snăk mơ̆ng knuih hdĭp lui Aê Diê. Dưi lač Y‑Môis amâo bi kngăr ôh kơ klei hưn êlâo anei, kyua ñu pô jing mnuih tuôm djiê hdĭp hŏng dŭm gưl ênuk phung ƀuôn sang Israel hlăm dŭm thŭn ti kdrăn tač. Ñu thâo săng klă snăk kơ klei bi kdơ̆ng leh anăn ai tiê khăng phung ƀuôn sang .
Năng ai lu mnuih ƀuh dleh thâo săng kơ klei Aê Diê hưn êlâo kơ klei anei hlăk êjai ară anei phung ƀuôn sang dôk khăp snăk kơ Aê Diê, gưt jih jang Klei Aê Diê Blŭ mtô. Lač anei jing klei hâo hưn mmăt tĭt kơ boh klei jhat ƀai phung ƀuôn sang Israel, ƀiădah klă sĭt jing klei yuôm snăk čiăng mñă kơ phung ƀuôn sang Ñu tơdah mŭt leh hlăm krĭng lăn Aê Diê ƀuăn brei leh, đăm ôh kyua mâo leh klei hdĭp mdrŏng sah lui hĕ ai tiê đăo knang kơ Aê Diê, tui hlue knuih hdĭp amâo doh jăk phung tue, bi luč hĕ knuih sa phung ƀuôn sang doh jăk leh anăn bi čhŏ hĕ pô kyua klei amâo doh jăk. Ai tiê phung ƀuôn sang khăp kơ Aê Diê ară anei amâo djăp čiăng rơ̆ng diñu ăt srăng khăp kơ Aê Diê hlăm êdei anăp, tơdah diñu amâo thâo kral Klei Aê Diê Blŭ leh anăn jih ai tiê hlue ngă grăp hruê.
Hlăm hdră wĭt kơ Ƀuôn Ala Mtao Adiê, grăp čô phung đăo mâo lu ayŏng amai adei nao hrăm mbĭt hŏng pô. Ƀiădah hlăm dŭm wưng mdê mdê hlăm klei hdĭp, drei dưi ƀuh mâo đa đa ayŏng amai adei amâo lŏ nao hrăm mbĭt hŏng pô ôh. Hlăm ênoh anăn mâo phung êlâo dih drei ƀuh diñu khăp snăk kơ Aê Diê leh anăn ăt mâo phung tuôm ngă khua kiă kriê. Boh sĭt klei anei amâo bi kngăr ôh, kyua msĕ si khua kiă kriê Y‑Môis lač leh, dôk hlăm lam anak mnuih drei jing klei bi kdơ̆ng leh anăn ai tiê khăng. Kyua anăn, ai tiê khăp kơ Aê Diê tơdah amâo dưi rông grăp hruê hŏng klei kpĭ mjuăt hriăm klei Aê Diê Blŭ, wah lač, bi kƀĭn kkuh mpŭ kơ Aê Diê leh anăn hdĭp hlue si Klei Aê Diê Blŭ, snăn klei khăp anăn ăt ênưih rai luč hlue hruê mmông, leh anăn knhal tuč srăng truh kơ klei amâo lŏ mâo ôh anôk kơ Aê Diê hlăm klei hdĭp pô. Akâo kơ Khua Yang đru drei ăt djă pioh klei khăp kơ Aê Diê truh knhal tuč.
Si hdră drei khăng kriê pioh ai tiê khăp kơ Aê Diê?
Wah lač: Ơ Khua Yang, jing Pô thâo săng knuih klei bi kdơ̆ng leh anăn ai tiê kâo khăng. Akâo kơ Ih đru kâo grăp hruê pioh nanao mmông ksiêm mĭn Klei Aê Diê Blŭ, knang kơ Ih hlăm djăp boh klei, čiăng ai tiê khăp kơ Aê Diê hlăm kâo dưi đĭ hriê kơ prŏng grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
