I Yôhan 4:9
Trong tơm: “’Bok Kei-Dei tơ’bôh kơ bơ̆n tơdrong Sư ‘mêm mơnat kơ bơ̆n tơpă thoi âu: Sư wơh Kon pôm Sư jur tơ ala teh âu wă kơ Sư lôch tang bơ̆n, wă kơ bơ̆n arih ling lang hăm Sư.” (I Yôhan 4:9)
Nơ̆r jet tơchĕng pơwao:
– ‘Bok Kei-Dei tơ’bôh tơdrong Sư ‘mêm mơnat kơ bơ̆n thoi yơ?
– Tơdrong tơ’bôh noh đei kiơ phara kơ kon bơngai bơ̆n tơ’bôh tơdrong ‘mêm mơnat?
– Đei tơ’blŏk kơ bơ̆n thoi yơ tơdrong phĕt ‘blŏk kơ Kră Yang Yêsu jur jing bơngai?
Tơdrong ‘mêm mơnat ưh kơ sĭ đei minh tơdrong đĕch gah ‘Bok Kei-Dei mă-lei Sơ̆p hla bơar ‘Bok Kei-Dei đei chih khan: “’Bok Kei-Dei bơih tơdrong ‘mêm mơnat” (I Yôhan 4:8). Pơma gah tơdrong ‘mêm mơnat, kon bơngai bơ̆n tơchĕng gah tơdrong mơn lăm jơhngơ̆m păng kiơ̆ kơ sĕch akar ‘maih wă, mă-lei ‘Bok Kei-Dei tơ’bôh tơdrong ‘mêm mơnat hăm tơdrong Sư pơm tih tơpă, noh jơ̆ lăp đon khŏm ăn tơdrong mă sư gĭt dêh, Kră Yang Yêsu, Kon pôm ‘Bok Kei-Dei, đei wơh jur tơ ala teh âu, ‘nâu bơih tơ’bôh tơdrong ‘Bok Kei-Dei ‘mêm mơnat kơ kon bơngai bơ̆n tơpă.
Kră Yang Yêsu jur jing bơngai păng chu lôch tang tơdrong yoch kơn bơngai bơ̆n đơ̆ng noh na bơ̆n gơh đei ‘Bok Kei-Dei mơnat tơdrong yoch păng đei tơdrong arih ling-lang. ‘Noh bơih tơdrong ‘mêm mơnat ‘Bok Kei-Dei chu iŏk ‘măn ăn kơ kon bơngai hiong răm. Pơma tơpăt tơpă, kon bơngai bơ̆n đơ̆ng sơ̆ khơ̆ dang ei kư̆m đei bơngai tơ’bôh tơdrong ‘mêm mơnat chu pơmat kơplah chu iŏk lôch tang bơngai nai. Thoi noh lei tơdrong ‘mêm mơnat ‘Bok Kei-Dei đei kiơ phara? ‘Bok Pôl tơ’bôh ăn tơdrong phara ‘nâu thoi âu: “Mă-lei dah kon bơngai bơ̆n, bơ̆n băt kơ buăl bơ̆n ưh kơ đei pơm yoch kiơ ră, mă-lei đe wă phak pơlôch sư, bơ̆n hui bơngai tơpă wă lôch tang buăl bơ̆n. Na kơplah bơ̆n oei pơm yoch, lăp minh ‘nu Yêsu đĕch lôch tang bơ̆n. ‘Noh bơih bơ̆n băt kơ ‘Bok Kei-Dei ‘mêm kơ kon bơngai bơ̆n tơpă” (Rôm 5:7-8).
Kră Yang ‘mêm kơ bơ̆n kơplah bơ̆n oei pơm yoch, kơplah bơ̆n hiong răm. ‘Noh bơih tơdrong mă trŏ kơ bơ̆n ‘blŏk hơdơ̆r kơ phĕt Kră Yang jur jing bơngai. Păng ‘noh bơih yua kơ kiơ bơyan ‘blŏk hơdơ̆r kơ Kră Yang jur jing bơngai noh khan bơyan ‘mêm mơnat. Lăm kơplah bơ̆n oei hơmet kơ năr gĭt kăl ‘nâu, apinh rim ‘nu bơ̆n athei ‘măn jơ tơchĕng pơwao gah tơdrong ‘mêm mơnat ‘Bok Kei-Dei. Tơdrong ‘mêm mơnat ‘noh bơih tih tơpă, gĭt dêh kơplah ‘Bok Kei-Dei ăn Kon pôm Sư kơ kon bơngai bơ̆n.
Yua kơ tơdrong Kră Yang Yêsu jur jing bơngai, chu lôch, păng iung arih dơ̆ng ‘lơ̆ng rŏ na ăn kơ kon bơngai bơ̆n gơh jing kon ‘Bok Kei-Dei, gơh năm lăm tơdrong tơ’bưh ling-lang hăm ‘Bă bơ̆n tơ plĕnh ti. ‘Nâu bơih tơmam gĭt tơpă mă rim ‘nu bơngai kăl kơ sơng iŏk. Rim ‘nu bơngai lui bơih đei sơng iŏk tơdrong ‘mêm mơnat ‘Bok Kei-Dei, athei mă nuih bĕ wă tơ’bôh tơdrong ‘mêm mơnat hlĭch chrơp Kră Yang kơ lơ bơngai nai.
Bơ̆n tơ’bôh tơdrong bơ̆n ‘mêm kơ Kră Yang păng bơ̆n ‘mêm kơ bơngai jih ‘ma lăm năr phĕt ‘blŏk kơ Kră Yang jur jing bơngai sơnăm ‘nâu thoi yơ?
Ơ Kră Yang, bơyan Kră Yang jur jing bơngai ‘nâu, minh wơ̆t dơ̆ng đei tơ’blŏk kơ inh gah tơdrong ‘mêm mơnat tih dêh Sư ăn kơ inh. Mă khan inh bơngai yoch, trŏ kơ hiong răm, mă-lei Kon Sư Kră Yang Yêsu jur tơ ala teh âu, wă kơ inh gơh arih. Ăn kơ jơhngơ̆m inh ‘bĕnh tơdrong ‘mêm mơnat Sư kơ lu bơngai jum dăr bơ̆n, Krao khan hăm anăn Kră Yang Yêsu Krist, Amen.
Đŏk Sơ̆p hla bơar ‘Bok Kei-Dei lăm pêng sơnăm: I Samuel 23
Kênh Youtube BHKTHN:
