Yakaunpaus 2:1-4
Nqe cim:
“Cov kwvtij, nej yog cov uas ntseeg peb tus Tswv Yexus Khetos tus uas muaj tshwjchim loj, nej tsis txhob xaiv leejtwg ntsejmuag li.” (Yakaunpaus 2:1)
Lus nug rau sawvdaws xav:
– Cov lus ntuas kom tsis txhob xaiv neeg ntsejmuag yog dabtsi?
– Yakaunpaus hais txog yam twg Pawg Ntseeg xubthawj muaj kev xaiv ntsejmuag?
– Pawg Ntseeg nimno tau qhia zoo li cas hais txog qhov no?
Yakaunpaus xa cov lus ntuas no mus rau cov ntseeg Yexus Khetos uas nws hu ua “cov kwvtij”, qhia kom lawv “tsis txhob xaiv leejtwg ntsejmuag li.” Lo lus “xaiv ntsejmuag” lossis “saib tsis taus” raws li hauvpaus lus Kilis muaj lub ntsiab hais tias “txais yuav raws li ntsia ntsejmuag lossis saib ntsejmuag”, yog xav hais txog qhov uas ntsia, cwjpwm saib sab nraud lub ntsejmuag, cev ntaj ntsug, meejmom, haivneeg, pab neeg… Nov yog qhov uas cov ntseeg xubthawj kev ua neej ib leeg ua rau ib leeg. Tiamsis Yakaunpaus hais tias tus cwjpwm no tsis tsimnyog cov ntseeg Yexus ua, rau qhov nws tsis phim rau tus lw kev hlub thiab kev ncaj ncees uas Tswv Yexus twb qhia rau sawvdaws.
Hauv nqe 2-4, Yakaunpaus hais txog ib qho xaiv ntsejmuag uas Pawg Ntseeg tseem ua. Nws yog qhov chaw zaum thaum sawvdaws tuaj pehawm Vajtswv hauv tuamtsev: Cov neeg npluanuj, hnav tsoo zoo zoo ces cia mus zaum qhov chaw zoo; cov neeg txomnyem, hnav tej tsoos tsis zoo ces coj mus zaum tej chaw tsis zoo lossis zaum hauv av. Tus uas ua li ntawd “yog nej ua tsis ncaj thiab xaiv neeg ntsejmuag raws li nej lub siab phem xav xwb.” (nqe 4). Txawm yog tsis hais tawm los qhov uas nws ua twb qhia paub tias nws xaiv ntsejmuag, nws xav tias cov neeg npluanuj thiaj pab tau nws lossis Pawg Ntseeg xwb.
Hauv phau ntawv sau keebkwm, cov neeg Indias tus thawjcoj npe hu ua Mahatma Gandhi (1869-1948) hais txog zaj lus thaum nws tseem yog tub kawm. Thaum ntawd nws xav paub txog cov ntseeg Yexus txojkev ntseeg thiab nyiam Tswv Yexus tej lus qhia heev. Muaj ib lub athiv, nws thiaj li txiav txim siab mus nrhiav ib lub tuamtsev pehawm tiamsis thaum mus txog nws raug cov tub txais qhua hauv Pawg Ntseeg txwv tsis pub mus hauv tuamtsev, lawv hais tias lub tuamtsev no tsuas pub cov neeg tawv dawb mus xwb. Qhov kev xaiv ntsejmuag no ua rau nws tig nraub qaum rau cov ntseeg Yexus. Kev xaiv ntsejmuag ua rau cov ntseeg raug thuam hais tias qhov uas lawv qhia kev hlub thiab kev ncaj ncees tsuas yog lam hais lub ncauj qhuav xwb, kev ua neej hauv Pawg Ntseeg tsis yog li ntawd.
Xaiv ntsejmuag yog cov neeg txhaum lub siab xav, thiab nws kuj muaj nyob hauv Pawg Ntseeg ib tiam dhau ib tiam los. Tus uas fij nyiaj ntau ces nws kuj yog tus uas sawvdaws hwm dua. Tus uas muaj meejmom siab nyob rau lub tebchaws kuj tau saib tsimtxiaj dua. Tus Tswv yog tus uas ntsia pom lub siab, vim li cas peb ho xaiv ntsejmuag raws li pom sab nraud? Tus Tswv twb hlub tsis yuav nqi, ua li cas peb muaj kev cais yus cov kwvtij? Thov Vajtswv pab kom peb ua tau lub neej qhia tawm Nws txojkev hlub.
Thov Vajtswv,
Tus Tswv, nyuam yaus los cuag Koj, lub siab lees txhaum hais tias ntau zaus nyuam yaus tau xaiv lwm tus ntsejmuag. Thov Koj zam txim rau tej uas nyuam yaus ua tsis zoo no, thiab thov Vaj Ntsujplig hloov siab tshiab kom ntsia pom txhua tus zoo ib yam li tus Tswv ntsia. Nyuam yaus tuav Tswv Yexus lub npe thov, Amees.
Peb puas tabtom xaiv lwm tus ntsejmuag lossis tsis xaiv thaum peb yuav muab ib yam dab tsi rau luag?
Nyeem Vajluskub hauv peb lub xyoo: I Xamuyees 20
Kênh Youtube BHKTHN:
