Klei Aê Diê Blŭ: Y‑Yakơ 2:1-4
Êlan kliăng: “Ơ phung ayŏng adei, đăm dlăng mnuih ti êngao ôh êjai diih tui hlue klei đăo kơ Khua Yang drei Yêsu Krist, Khua Yang kơ klei guh kơang” (Y‑Yakơ 2:1)
Klei êmuh ksiêm mĭn: Klei mtă đăm dlăng mnuih mdê mdê ôh ya čiăng lač? Ya klei Y‑Yakơ bi hmô hŏng klei klă hlăm Phung Sang Aê Diê ênuk tal êlâo čiăng bi êdah kơ klei dlăng mnuih mdê mdê? Mơ̆ng klei anei ya klei bi hriăm kơ Phung Sang Aê Diê ênuk anei?
Y‑Yakơ mơĭt asăp mtă kơ phung đăo leh kơ Yêsu Krist, phung ñu pia jing “ayŏng adei”, mtă kơ digơ̆ “đăm dlăng mnuih mdê mdê ôh”. Boh blŭ “dlăng mdê mdê” amâodah “yap mdê mdê” hlăm klei Grek lŏ mblang jing “jum amâodah mpŭ tui si klei jing” čiăng lač kơ klei bi êdah klei mpŭ tui si klei jing ti êngao, si tô hmô dlăng kơ ƀô̆ mta, kdrăp čŭt hơô, bruă knuă mă, djuê ana, klei jing, lu klei mkăn đa đa… Snăn yơh klei arăng khăng ngă hdơ̆ng mnuih hlăm anôk phung đăo ênuk tal êlâo hdĭp. Ƀiădah Y‑Yakơ lač knuih dôk dơ̆ng ƀơ̆ng huă anei amâo guôp ôh hŏng klei đăo kơ Krist kyuadah klei ngă anăn bi klăk hŏng klei khăp leh anăn klei mtăp mđơr kơ jih jang mnuih tui si Khua Yang Yêsu mtô leh.
Hlăm êlan 2-4, Y‑Yakơ brei sa klei bi hmô klă kơ klei dlăng mnuih mdê mdê Phung Sang Aê Diê srăng tuôm. Anăn jing klei dăp anôk dôk hlăm adŭ bi kƀĭn kkuh mpŭ kơ Khua Yang: Mnuih mdrŏng, hơô ao siam brei dôk ti anôk jăk, bi mnuih ƀun ƀin, hơô ao tĭ rưč, snăn amâo brei anôk dôk ôh amâodah brei dôk gŭ ti lăn. Mnuih ngă msĕ snăn jing mnuih “dlăng mnuih ti êngao, leh anăn phat kđi hŏng klei mĭn jhat” (êlan 4). Wăt tơdah amâo lač dưn ƀiădah sĭt nik pô dlăng mnuih mdê mdê anăn mâo klei mĭn mnuih mdrŏng srăng ba lu klei tŭ dưn kơ ñu leh anăn kơ Phung Sang Aê Diê kyuanăn yơh srăng ngă klei mpŭ hĭn.
Hlăm hdruôm hră aê khua gĭt gai Ấn Độ Mahatma Gandhi (1869-1948) čih yăl dliê wĭt kơ klei hdĭp ñu pô, ñu yăl dliê kơ klei truh ênuk ñu jing hđeh hriăm hră gưl sang hră prŏng. Hlăk anăn ñu čiăng thâo săng kơ klei đăo kơ Krist leh anăn khăp snăk kơ klei Khua Yang Yêsu mtô. Mâo sa hruê kjuh, ñu nao kơ sa boh sang Aê Diê ƀiădah pô drông gang ñu amâo brei mŭt ôh, lač sang Aê Diê anei knŏng pioh kơ phung klĭt kô̆ đuč. Klei dlăng mnuih mdê mdê anei mjing ñu sa čô bi kdơ̆ng hŏng klei đăo Krist. Kyua klei dlăng mnuih mdê mdê anăn snăn arăng djik djak kơ klei đăo kyuadah klei mtô kơ klei khăp leh anăn klei mtăp mđơr jing knŏng klei mtô hyơ hyuôt amâo bi êdah hŏng bruă klă Phung Sang Aê Diê ngă ôh.
Dlăng mnuih mdê mdê jing sa klei bhiăn mâo mơ̆ng đưm hlăm mnuih soh, leh anăn ñu ăt dôk nanao hlăm Phung Sang Aê Diê jih jang ênuk. Pô myơr prăk lu klei blŭ arăng srăng hmư̆ hĭn, pô djă bruă prŏng hlăm lăn ala srăng mâo klei arăng uêñ mĭn leh anăn mpŭ hĭn. Tơdah Aê Diê jing Pô dlăng kơ ai tiê, snăn yơh ya ngă drei phat kđi tui si klei jing ti êngao lĕ? Tơdah Aê Diê pap brei leh kơ drei hơăi mang, ya ngă drei dlăng mdê mdê kơ phung ayŏng adei drei? Akâo Khua Yang đru drei dôk dơ̆ng ƀơ̆ng huă bi êdah klei khăp Ñu kơ jih jang mnuih.
Si ngă hlăm klei drei dôk dơ̆ng ƀơ̆ng huă hŏng mnuih mkăn drei dlăng mnuih mdê mdê mơ̆?
Wah lač: Ơ Khua Yang, kâo hriê kơ Ih čiăng hưn hŏng klei sĭt mâo lu blư̆ kâo dlăng mnuih mdê mdê. Akâo Ih pap brei klei awăt kâo, leh anăn akâo Yang Mngăt Jăk bi mlih ai tiê kâo čiăng kâo dlăng kơ jih jang mnuih msĕ si Ih dlăng kơ digơ̆. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Y‑Samuel 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
