Rôma 10:13-17
Trong tơm: “Kră Yang ưh kơ đei wơh đe năm bơtho, thoi yơ đe gơh năm bơtho adrol? Mă-lei Sư đei wơh đe năm bơtho boih, yua kơ hla bơar Sư đei roi thoi âu: “Bơ̆n ‘bôh đe bơtho tơdrong ‘nao ‘lơ̆ng jơhngơ̆m bơ̆n hiôk dêh iih?” (Rôma 10:15)
Nơ̆r jet tơchĕng pơwao:
– Anih pơtơm tơdrong wơh năm ră roi noh đơ̆ng yơ?
– Lu bơngai ră roi noh kiơ?
– ‘Bok Pôl wă pơma kiơ ‘bơ̆t sư chih khan: “ưh kơsĭ đe lui đĭ đăng hloi ôh.”?
– Kră Yang tơ’blŏk kơ bơ̆n tơdrong kiơ kơplah bơ̆n năm pơklaih ră roi tơdrong Kră Yang?
Lăm kơthơ Rôm chăl 10, Pôl pôk roi gah adrĕch adrung Isơrael sư kuă kơ lui, đei mơ̆n bơngai lui kơ Kră Yang Yêsu Krist mă-lei lăp tŏ sĕt. Đe bơtho ră mă ưh kơ kĕ jing yua kơ lu sư gơnang kơ tơdrong pơm ‘lơ̆ng kơdih, ưh kơ trŏ kơ tơdrong ‘lơ̆ng tơpăt ‘Bok Kei-Dei đơ̆ng lui kơ Yêsu Krist. Đơ̆ng noh, ‘bok Pôl pơma hơđăl tơdrong jang bơtho gah Yêsu, tơm sư “Đon lui” Tơdrong wă bơtho noh rơđah hơđăl dêh păng hmă đĕch: “Đĭ-đăng bơngai mă băt kơ krao apinh Sư, Kră Yang tơgŭm pơklaih lu sư lei lăi đĕch.” (trong 13). Thoi ‘bok Pôl đei bơtho tơ’bôh, tơdrong Kră Yang wơh năm ră roi noh athei pơtơm đơ̆ng bơ̆n wơh bơngai năm ră roi kơ đĭ-đăng bơngai wă kơ băt Kră Yang Yêsu noh ‘Bok Krist, Kon ‘Bok Kei-Dei. Bơngai pơm kơdranh ră roi noh đei tơdrong sư blŭng a noh “tơpang jơ̆ng” lu sư athei “yak năm”. Đơ̆ng tơdrong roi hơ’mon gah tơdrong pơih să khul lui, đei lơ tơdrong wă tơiung khul lui, bơ̆n gơh yua iŏk tơdrong đêl đe tơiung khul lui ei, gah nơ̆r “pơma” wă kơ gơh kơtơ̆ng băt tơ jơ̆p jang noh hăm tơdrong đe chih ră roi. Sơ̆p hla bơar ‘Bok Kei-Dei, pơma pơdah lăm Tv, pơma lăm brŏ, pơma lăm điên thoăi noh đei jơ năr trŏ lăp wă gơh “pơma” tôm nơ̆r, klah asong, pơm kơdranh.
Mă-loi, wă pơlung pơdrŭt lu bơngai mă pơm kơdranh ră roi noh, ‘bok Pôl chih iŏk minh nơ̆r ‘bok Êsai bơngai khan lê̆ hơdrol, khan: Ưh kơ đĭ-đăng lu bơngai mă kơtơ̆ng đe pơm kơdranh ră roi noh lui ngăl ôh. Kư̆m yua kơ lơ tơdrong mơ̆n, mơ’nah kơnh yua kơ lu sư khăng kơ̆l, mơ’nah kơnh yua kơ lu sư tam mă hlôh hơđăl phŏ mơ’nah kơnh yua kơ tam mă truh jơ năr Kră Yang năm ngôi… Tơdrong noh wă khan bơ̆n athei đei jơhngơ̆m mă chơ̆n huay kơ sap, khŏm mă nĭt lăm tơdrong “ră roi” tơdrong Kră Yang Yêsu. Ră roi ưh kơ lăp minh wơ̆t đĕch ôh, khŏm ră roi lơ wơ̆t ưh kơ ră roi hăm nơ̆r pơma đĕch, mă athei roi hăm tơdrong arih kiơ̆ nơ̆r Kră Yang, ‘mêm mơnat kơ bôl buăl thoi Pêtrôs đei bơtho khan: “Bơ̆n athei oei sa pơm mă ‘lơ̆ng ‘bơ̆t anăp lu bơngai ưh kơ lui, na lu bơngai mă jô̆ kơ bơ̆n khan bơngai kơnê̆ sư kơnăl kơ bơ̆n bơngai ‘lơ̆ng, noh na sư gô ư-ang kơ ‘Bok Kei-Dei kơplah năr ‘Bok Kei-Dei tơbăt kơ đon sư.” (I Pêtrôs 2:12) Đei bơngai, sư kơtơ̆ng đe ră roi tơdrong Kră Yang blŭng a, sư lui hloi; thoi kơ kuan krao bơngai Êthiôpi (Tơdrong jang 8:36-39), mă-lei kư̆m đei bơngai kơtơ̆ng đe ră roi bơih, tam mă lui ding mă truh jơ năr Kră Yang năm ngôi ‘mơ̆i na lui. Phŏ đei bơngai đơ̆ng rŏng kơtơ̆ng đe roi ding truh hơdôm jĭt sơnăm ‘mơ̆i na lui sơng iŏk Kră Yang Yêsu thoi bơ̆n ngăl kơtơ̆ng păng mơn đei mơ̆n bơih.
Yua kơ thoi noh, mưh bơ̆n đei ră roi pơm kơdranh ăn kơ lơ bơngai mơ̆ng kơtơ̆ng tơdrong Kră Yang Yêsu bơih lei bơ̆n ưh kơ hiong tơdrong hơmĕng ôh, bơ̆n gô hơmĕng tơpă, ding truh năr ayơ tơ anăp ei kơnh, lu sư gô sơng iŏk Kră Yang Yêsu. Pơma tôm: “Năr tôch kơnh Kră Yang Yêsu Krist gô jur tơ ala teh wă pơgơ̆r păng sek tơlang đĭ-đăng bơngai, mă bơngai lôch mă bơngai arih. Kră Yang ‘Bok Kei-Dei păng Kră Yang Yêsu Krist ‘bôh bơ̆n ling-lang na ih athei kơchăng, athei bơtho tơdrong Sư ling-lang; mă đe mơ̆ng mă đe ưh, ih kư̆ bơtho đĕch, Ih athei khă đe ‘nĕ pă pơm tơdrong yoch păng bơtho đe lui mă kơjăp, bơtho pơlung sư adar adeh.” (II Timôthê 4:1-2).
Tơdrong kiơ pơgăn lu bơ̆n, pơm kơ lu bơ̆n ưh kơ đĭ jơhngơ̆m năm pơm kơdranh ră roi tơdrong Kră Yang?
Kơkuh kơ Ih ơ ‘Bă ‘lơ̆ng rơgoh, apinh Ih wơh inh păng tơgŭm wă kơ inh huay kơ bơ̆l hăl ră roi Tơdrong ‘Nao ‘Lơ̆ng Ih. Mă đei tơdrong tơproh ‘lơ̆ng ‘bônh dah ưh kơ tơproh, anat, đe mơ̆ng dah ưh, apinh tơgŭm inh kư̆ kơ pơm kơdranh tơdrong Ih ling-lang ưh kơ lê̆. Inh krao khan yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: I Samuel 3
Kênh Youtube BHKTHN:
