Tơdrong jang 1:1-8
Trong tơm: “Mă-lei lăp Yang Bơhngol ‘Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.”
(Tơdrong jang 1:8)
Nơ̆r jet tơchĕng pơwao :
– Lăp Yang Bơhngol ‘Lơ̆ng jur, lu bơngai pơhrăm kiơ̆ Kră Yang Yêsu ‘noh gô đei iŏk kiơ wă kơ pơm kơdranh ră roi tơdrong Kră Yang?
– Kră Yang krao athei lu bơngai pơhrăm kiơ̆ Sư noh pơm kơdranh ră roi tơ lu anih ayơ?
– Dang ei bơ̆n jang tơdrong Sư wơh athei noh, bơ̆n thoi yơ?
Đơ̆ng rŏng kơ Kră Yang Yêsu iung arih đơ̆ng lôch, adrol kơ Sư wă tŏk tơ plĕnh, Sư oei hăm lu bơngai pơhrăm kiơ̆ Sư noh lăm puăn jĭt năr, Sư bơtho lơ tơdrong gah Dêh Char ‘Bok Kei-Dei pơgơ̆r kon bơngai păng athei lu sư oei tơ noh răp gô tơ noh wă kơ gơh đei iŏk ‘Batem hăm Yang Bơhngol ‘Lơ̆ng ‘mơ̆i, na gơh năm pơm kơdranh ră roi tơdrong Kră Yang. Lăm jơ hnơr Pơgơ̆p pơkă so, hui bơngai đĕch Yang Bơhngol ‘Lơ̆ng jur, păng oei hloi ling-lang lăm lu kon Kră Yang tơpă noh. (I Kôrintô 6:19; Rôm 8:9).
Lu bơngai pơhrăm kiơ̆ Sư noh jet wă kơ băt gah jơ năr wă pơjing minh dêh char Isơrael, mă-lei Kră Yang Yêsu khan tơdrong ‘noh lăm Yang ‘Bă gô mơ̆ng kơ Yang ‘Bă đĕch, lu sư ưh kơ kăl kơ băt, kư̆m ưh kơ gơh băt. Tơdrong Kră Yang Yêsu wă noh, wă kơ lu sư pơm kơdranh ră roi tơdrong Sư kơ đe. Pơm kơdranh ră roi sư pha ra kơ bơtho, bơtho noh bơ̆n tơblang tơdrong ‘Bok Kei-Dei, tơblang lăm nơ̆r ‘Bok Kei-Dei wă pơm kiơ, wă khan kiơ, wă kơ bơngai mơ̆ng hlôh, pơm kiơ̆ na đei pŭn hiôk. Na pơm kơdranh ră roi Kră Yang ‘nâu, bơ̆n roi ăn kơ đe tơdrong đêl bơ̆n mơn đơ̆ng Kră Yang pơm ăn kơ bơ̆n, Sư tơplih bơ̆n đơ̆ng kơnê̆ jing ‘lơ̆ng, roi tơdrong pŭn hiôk kơ lu bơngai mă đĭ jơhngơ̆m lui sơng iŏk Kră Yang (Tơdrong jang 4:20). Tơdrong ‘nâu, mă bu bu, mă bơngai ‘nao lui ră, kư̆m gơh pơm kơdranh gơh ră roi ngăl. Mă-lei tơdrong kăl ngơ ngei noh mă bu bu, bơ̆n ‘nĕ kơ gơnang kơ tơdrong bơ̆n gơh hơgei, đei ‘bơ̆r đon tơdrong kĕ pran bơ̆n kơdih, mă-lei bơ̆n kăl kơ gơnang kơ mơsêh Yang Bơhngol ‘Lơ̆ng, noh tu tơm tơdrong kĕ pran gah bơhngol wă pơm kơdranh ră roi tơdrong Kră Yang (Sachari 4:6). Yang Bơhngol ‘Lơ̆ng gô chrih tơbăt kơ bơngai mă mơ̆ng bơ̆n pơm kơdranh noh băt kơdih lu sư yoch; tơbăt kơ lu sư tơdrong ‘lơ̆ng tơpăt, ‘lơ̆ng rơgoh ‘Bok Kei-Dei; kư̆m tơbăt kơ lu sư tơdrong ‘Bok Kei-Dei sek tơlang, Sư hlôi sek tơlang bơih yang kơnê̆ hăm lu bơngai mă kuă kơ chu yom kơ Kră Yang (Yôhan 16:7-11).
Gah anih bơ̆jang pơm kơdranh ră roi, pha kơ wơ̆t blŭng Sư wơh lu jơ̆ng ‘bang pơhrăm jang noh, wơ̆t blŭng a ‘noh, lu jơ̆ng ‘bang pơpôi tơdrong bơtho kơ lu bơngai Juđê đĕch (Mathiơ 10:5-6), wơ̆t ‘nâu, Kră Yang athei lu sư pơm kơdranh ră roi đơ̆ng pơlei Jêrusalem, anih mă lu sư oei, năm ‘net dơ̆ng truh đĭ dêh Juđê mă kon pơlei Isơrael oei lăm noh; đơ̆ng noh năm hlôi truh tơ dêh Samari tơtil dêh Juđê noh; tuch luch, lanh truh tơ jơ̆p jang teh đak (Mathiơ 28:18-20).
Lu bơngai pơhrăm kiơ̆ Kră Yang đơ̆ng rŏng kơ iŏk ‘Batem hăm Yang Bơhngol ‘Lơ̆ng, lu sư chu nơ̆r Kră Yang, năm pơm kơdranh ră roi tơdrong Kră Yang mă tơ’bơ̆p lơ tơdrong pơmat anat anot, đei pơm kơnê̆, wă kơ Tơdrong ‘Nao ‘Lơ̆ng pơih să tơ jơ̆p jang anih truh tơ dang ei. Rim ‘nu kơ bơ̆n athei pơtrơp tơdrong jang đơ̆ng Kră Yang wơh lu kră sơ̆, lu bơngai mă năm adrol kơ bơ̆n hlôi jang bơih, yua iŏk tơdrong Kră Yang Yêsu bơtho lăm tơdrong jang bơtho tơbăt Tơdrong ‘Nao ‘Lơ̆ng. Rim Hnam Akŭm athei adrin tơiung pơtơm năm pơm kơdranh ră roi tơdrong Kră Yang đơ̆ng pơlei, tơring bơ̆n kơdih, adrĕch bơ̆n kơdih, mă-lei kư̆m tơgŭm tơgop dôm tơdrong tơmam bơ̆n đei dŏng ăn gah ră roi tơdrong Kră Yang jơ̆p jang kơ teh đak. Tơdrong pơlong, pơmat tat anat anot oei hơnơ̆ng ‘bơ̆t doh, mă-lei apinh Kră Yang ăn kơ bơ̆n kĕ đơ̆ng Yang Bơhngol ‘Lơ̆ng wă kơ bơ̆n năm hlôi đơ̆ng tơdrong pơgăn, pơkeh nơ̆r Kră Yang wơh athei, pơchĕp pơjao.
Bơ̆n hăm Khul Lui tŏk-bŏk oei pơm kơdranh ră roi tơdrong Kră Yang dang ei thoi yơ?
Kơkuh kơ Ih ơ Kră Yang, apinh Ih ăn kơ inh hlôh wao, păng đei jơhngơ̆m nuih pơ̆n wă pơm kơdranh ră roi tơdrong Ih kơ lu kơtum kơtŏng, ‘nhŏng oh, buăl juăt inh păng lu bơngai tam mă băt kơ Ih wă kơ lu sư kư̆m gơh klaih thoi inh mơ̆n! Inh krao khan yua anăn Kră Yang Yêsu Krist, Amen!
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 2.
Kênh Youtube BHKTHN:
